Nərimanov rayonunda 2009-cu ilin ilk rübünün yekunları müzakirə olunmuşdur

Azərbaycanın sosial-iqtisadi inkişafı davam edir, ölkəmizin beynəlxalq nüfuzu getdikcə artır. Sosial-iqtisadi həyatın bütün sahələrində əldə olunmuş yüksək nailiyyətlər əhalinin rifah halının ilbəil yaxşılaşdırılması üçün geniş imkanlar yaradır. 2008-ci ildə sosial-iqtisadi inkişaf sahəsində əldə olunmuş uğurlar cari ilin birinci rübündə də davam etmiş, ölkədə ümumi daxili məhsul istehsalı 4,1 faiz artmış, qeyri-neft sektorunda 14 faizlik artım qeydə alınmışdır. Bütün bunlar barədə Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2009-cu ilin birinci rübünün sosial-iqtisadi inkişafının yekunlarına həsr olunmuş iclasda ətraflı danışılmış, qazanılmış uğurlar yüksək qiymətləndirilməklə yanaşı, qarşıda duran vəzifələr və onların həlli yolları müəyyənləşdirilmişdir.

Ölkədə ilin əvvəlindən əldə olunmuş yüksək nailiyyətlər, böyük iqtisadi yüksəliş, nəhəng quruculuq və abadlıq işləri, makroiqtisadi göstəricilər dinamikasında müşahidə olunan sabit tempi, eləcə də əhalinin həyat səviyyəsinin yüksəldilməsində paytaxtın Nərimanov rayonunun da payı vardır. Bu barədə dünən Nərimanov Rayon İcra Hakimiyyətində 2009-cu ilin birinci rübünün yekunları və qarşıda duran vəzifələrə həsr olunmuş iclasda geniş danışıldı, əldə edilmiş uğurlar və qarşıda duran vəzifələr ətraflı təhlil olundu.

Hesabat yığıncağının iştirakçıları öncə müasir Azərbaycan dövlətinin qurucusu, ümummilli lider Heydər Əliyevin rayon icra hakimiyyəti binasının foyesindəki büstü önünə gül dəstələri qoydular. Rayonun sənaye, təhsil, səhiyyə, mədəniyyət və digər təşkilatlarının, hüquq-mühafizə orqanlarının, eləcə də ictimaiyyət nümayəndələrinin iştirak etdikləri yığıncağı Nərimanov Rayon İcra Hakimiyyətinin başçısı Abdin Fərzəliyev açdı. Ölkənin davamlı inkişaf prosesində paytaxtın Nərimanov rayonunun da mühüm rol oynadığını bildirən natiq diqqəti 2009-cu ilin birinci rübündə əldə olunmuş uğurlara yönəltdi.

Qeyd olundu ki, 2009-cu ilin birinci rübünün yekunlarına görə rayon iqtisadiyyatının əsasını təşkil edən sənayenin dinamik inkişafı davam etdirilmiş və bu müddət ərzində xidmətlər də daxil olmaqla 35,6 milyon manatlıq məhsul istehsal olunmuşdur. Hesabat dövründə sənaye məhsulunun ümumi həcmində qeyri-dövlət sektorunun xüsusi çəkisi 81,4 faiz təşkil etmişdir. İlin əvvəlindən sənaye müəssisələrində işləyənlərin sayı 7118 nəfər və onların orta nominal əmək haqları 18,2 faiz artaraq 266,1 manat təşkil etmişdir. Ötən üç ayda yeni iş yerlərinin açılması ilə bağlı işlər davam etdirilmiş, rüb ərzində 539 daimi iş yeri yaradılmışdır.

Rayon üzrə əsas kapitala ümumi investisiya qoyuluşunun 5,3 milyon manat təşkil etdiyini və bunun keçən ilin müvafiq dövrünə nisbətən 3,1 dəfə çox olduğunu bildirən natiq rayonun tikinti sektorunda da yüksək göstəricilər əldə edildiyini diqqətə çatdırdı. Tikinti təşkilatları tərəfindən öz gücləri ilə yerinə yetirilmiş işin həcmi 49,5 milyon manat təşkil etmişdir. Rüb ərzində tikinti təşkilatlarında çalışan işçilərin sayı 3445 nəfər artaraq 9545 nəfər təşkil etmiş, onların orta əmək haqları 352,5 manat olmaqla əvvəlki dövrə nisbətən 19,4 faiz artmışdır.

İqtisadiyyatın başqa sahələrində olduğu kimi, əhalinin həyat səviyyəsini xarakterizə edən əsas göstəricilərdən biri olan pullu xidmətlərin həcmi də xeyli artmışdır. Belə ki, rüb ərzində 35,2 milyon manatlıq pullu xidmətlər göstərilmiş və artım sürəti 110,4 faiz təşkil etmişdir. Rayon ərazisində fəaliyyət göstərən ticarət müəssisələri üzrə pərakəndə əmtəə dövriyyəsinin həcmi 134,8 milyon manat olmuş, ictimai iaşənin əmtəə dövriyyəsinin həcmi 3,2 milyon manat və artım sürəti 170,6 faiz təşkil etmişdir.

Rayonun abadlaşdırılması, mənzil-kommunal obyektlərinin istismarı vəziyyətinin yaxşılaşdırılması sahəsində 2009-cu ilin ilk rübü ərzində müvafiq işlər görüldüyünü bildirən natiq daha sonra dedi: — Nazirlər Kabinetinin geniş iclasında möhtərəm Prezidentimiz yaşıllıqların qorunmasına dair ciddi iradlarını bildirərək yeni yaşıllıq zolaqlarının salınması və bu məqsədlə 3 milyon ədəd ağac əkilməsi barədə ciddi göstəriş və tapşırıqlar vermişdir. Prezidentin çağırışına qoşularaq tərəfimizdən “Yaşıl rayon” devizi altında xüsusi qərargah yaradılmışdır. Bu ilin aprel–may aylarında yaradılmış xüsusi qərargahın köməyi ilə 4-5 min ədəd yeni ağacın əkilməsi nəzərdə tutulmuşdur. Artıq bu işlərə başlanılaraq keçən həftənin şənbə və bazar günləri Heydər Əliyev prospekti boyunca İtaliyadan gətirilmiş dekorativ şam ağacları əkilmişdir. İlin bütün fəsillərində əkilməsi mümkün olan bu cür ağacların rayonun digər mərkəzi küçə və prospetlərində əkilməsi həyata keçiriləcəkdir. Bugünkü yığıncaqdan istifadə edərək hər bir müəssisə rəhbərindən “Yaşıl rayon” devizinə qoşularaq daxili və ətraf ərazilərdə geniş yaşıllaşdırma işlərinin aparılmasını və onların qorunub saxlanılmasını xahiş edirəm.

Natiq həmçinin cari ilin birinci rübündə rayon əhalisinin, eləcə də idarə və müəssisələrin işıq, qaz və içməli su ilə təminatı sahəsində görülmüş işlərdən bəhs etdi. Qeyd olundu ki, rayon ərazisində yerləşən ayrı-ayrı şirkət və nazirliklərin nəzdində fəaliyyət göstərən mənzil-kommunal istismar sahələri tərəfindən müxtəlif ünvanlarda yerləşən binaların dam örtükləri, daxili kommunikasiya xətləri, yağış suları axıdan navalçalar, ümumi girişlərdəki pəncərə və qapılar dəyişdirilmiş və kəskin qəzalı vəziyyətdə olan evlərin təmiri üçün zəruri tədbirlər həyata keçirilmiş, məişət tullantılarının vaxtında daşınması təmin edilmişdir.

Məruzəçi rayonun təhsil, səhiyyə, mədəniyyət ocaqlarında dövlət büdcəsi və daxili imkanlar hesabına aparılan təmir-bərpa işlərindən də geniş bəhs etdi. Natiq həmçinin 18 mart ümumxalq səsvermənin, eləcə də əhalinin siyahıya alınması kampaniyasının ölkəmizin hər yerində olduğu kimi, Nərimanov rayonunda da uğurla, yüksək mütəşəkkilliklə keçdiyini diqqətə çatdırdı. Bildirdi ki, dövlət başçısının müəyyənləşdirdiyi sosial-iqtisadi strategiyanın, qəbul olunmuş mühüm dövlət sənədlərindən irəli gələn vəzifələrin icrası ilə bağlı tədbirlər bundan sonra da müvəffəqiyyətlə davam etdiriləcəkdir.

Məruzə ətrafında çıxış edən digər natiqlər rəhbərlik etdikləri sahələrin işi ilə bağlı hesabat verdilər,Prezident İlham Əliyevin müəyyənləşdirdiyi sosial-iqtisadi strategiyanın yerinə yetirilməsi istiqamətində bundan sonra da səylə çalışacaqlarını bildirdilər. Rayon icra hakimiyyətinin başçısı Abdin Fərzəliyev yığıncağa yekun vurdu, qarşıda duran vəzifələrin icrası ilə bağlı aidiyyatı təşkilatların rəhbərlərinə konkret tapşırıq və tövsiyələrini verdi. Axırda iclasın qərar layihəsi oxundu.

Mirbağır YAQUBZADƏ

Xalq qəzeti.- 2009.- 29 aprel.- S. 4.