Nizami rayonunda cari ilin I rübünə yekun vurulmuşdur

Dünən Bakı şəhəri Nizami Rayon İcra Hakimiyyətində 2009-cu ilin birinci rübündə rayonun sosial-iqtisadi inkişafının yekunlarına və qarşıda duran vəzifələrə həsr olunmuş hesabat yığıncağı keçirildi. Tədbir iştirakçıları öncə müasir Azərbaycan dövlətçiliyinin memarı, ümummilli lider Heydər Əliyevin rayon icra hakimiyyəti binasının foyesindəki büstü önünə gül dəstələri qoydular.

Rayonun sənaye, təhsil, səhiyyə, mədəniyyət, xidmət sahələrinin, hüquq-mühafizə orqanlarının, eləcə də ictimaiyyət nümayəndələrinin iştirak etdikləri yığıncağı Nizami Rayon İcra Hakimiyyətinin başçısı Mehbalı Əliyev açdı. Tədbir iştirakçıları ulu öndərimiz Heydər Əliyevin xatirəsini bir dəqiqəlik sükutla yad etdilər. Azərbaycan Respublikasının dövlət himni səsləndirildi. Sonra Nizami rayonunun sosial-iqtisadi inkişafını, burada aparılan abadlıq-quruculuq işlərini əks etdirən film nümayiş olundu.

Nizami Rayon İcra Hakimiyyətinin başçısı Mehbalı Əliyev 2009-cu ilin ilk rübü ərzində rayonun sosial-iqtisadi inkişafının yekunlarına və qarşıda duran vəzifələrə həsr olunmuş geniş hesabat məruzəsi ilə çıxış etdi. Natiq ulu öndər Heydər Əliyev tərəfindən əsası qoyulmuş sosial-iqtisadi islahatların Prezident İlham Əliyev tərəfindən uğurla davam etdirilməsi nəticəsində cari ilin birinci rübündə ölkəmizdə ümumi inkişafın davam etdiyini diqqətə çatdırdı. Azərbaycanda sosial-iqtisadi sahələrdə həyata keçirilən bütün islahatların əsas məqsədinin vətəndaşların rifahının yaxşılaşdırılmasına yönəldiyini vurğulayan məruzəçi ümumi inkişafı xarakterizə edən makroiqtisadi göstəricilərin getdikcə yaxşılaşdığını və bunun Azərbaycanı regionun lider dövlətinə çevrilməsinə imkan yaratdığını bildirdi.

Cari ilin birinci rübünün Azərbaycan Respublikası üçün kifayət qədər uğurlu və yüksək nailiyyətlərlə zəngin bir dövr olduğunu qeyd edən natiq dedi ki, aprel ayının 22-də Prezident Sarayında dövlət başçısı cənab İlham Əliyevin sədrliyi ilə Nazirlər Kabinetinin 2009-cu ilin birinci rübünün sosial-iqtisadi inkişafının yekunlarına həsr olunmuş iclasında son illər ərzində ölkə iqtisadiyyatında müşahidə olunan iqtisadi artımın hazırda da davam etməsi müsbət hal kimi qiymətləndirilmişdir. Belə ki, Prezident İlham Əliyev statistik göstəricilər əsasında Azərbaycanda sosial vəziyyətin, sənaye istehsalının, özəl bölmənin, neft-qaz sektorunun, qeyri-neft bölməsinin, o cümlədən kənd təsərrüfatının və digər bütün sahələr üzrə istehsalın yüksəlməsini və inkişafını təhlil edərək son beş ildə ölkədə iqtisadiyyatın həcminin 2,6 dəfə, sənaye istehsalının isə 2,5 dəfə artdığını, ötən il minimum əmək haqqının və pensiyanın minimum məbləğinin 60 manata çatdırılmasını və yoxsulluğun 13,2 faizə düşməsini qeyd etmişdir. Bununla yanaşı, dövlət başçısı qəbul olunmuş mühüm və ümummilli proqramların da uğurla icra edilməsini yüksək qiymətləndirmiş və gələcək inkişafın başlıca istiqamətlərini bəyan etmişdir.

Son illər ölkəmizin sosial-iqtisadi həyatında baş verən tərəqqi paytaxtın Nizami rayonunda da aydın hiss olunur. Bu barədə məlumat verən Rayon İcra Hakimiyyətinin başçısı Mehbalı Əliyev bildirdi ki, ölkə iqtisadiyyatında baş vermiş sürətli inkişaf Nizami rayonunun sosial-iqtisadi həyatını daha da canlandırmış, rayon sakinlərinin qarşılaşdığı sosial problemlərin həlli istiqamətində konkret addımlar atılmış, genişmiqyaslı abadlıq-quruculuq işləri görülmüş, xidmət sahələrinin fəaliyyəti yüksəlmiş, çoxsaylı yeni iş yerləri açılmışdır. Rayonda sənaye istehsalının həcmi ötən il 2003-cü illə müqayisədə 2,8 dəfə, əsas kapitala yönəldilmiş investisiya 7,7 dəfə, pərakəndə əmtəə dövriyyəsi 96,9 faiz, əhaliyə göstərilən pullu xidmətlər 5,2 dəfə artmışdır.

Natiq bildirdi ki, 2009-cu ilin birinci rübündə Nizami rayonunda 7027 hüquqi və fiziki şəxs fəaliyyət göstərmişdir. Hesabat dövründə sənaye sahəsi üzrə istehsalın həcmi 67,4 milyon manat təşkil etmişdir ki, bu da 2008-ci ilin müvafiq dövrü ilə müqayisədə 19,4 faiz çox olmuşdur. İstehsal olunmuş sənaye məhsulunun 37,9 faizi qeyri-dövlət sektorunun payına düşmüşdür. Məhsul istehsalında artım, əsasən, kimyəvi maddə və məhsulların, elektrik enerjisi, qaz, buxar istehsalı və bölüşdürülməsi sahəsində qeydə alınmışdır. İlin ilk üç ayı ərzində rayon üzrə benzin istehsalı 7,3 faiz, neft-bitum istehsalı isə 46,5 faiz artmışdır. Həmin dövrdə istehsal olunmuş məhsulun 102,6 faizi istehsalçılara göndərilmişdir.

2009-cu ilin birinci rübündə rayonun nəqliyyat və rabitə müəssisələrinin uğurlu fəaliyyətini qeyd edən natiq həmçinin iqtisadiyyatın və sosial sahələrin inkişafı üçün bütün maliyyə mənbələri hesabına əsas kapitala 7,3 milyon manat həcmində investisiya yönəldildiyini, bunun da 6,2 milyon manatının dövlət, 1,1 milyon manatının isə qeyri-dövlət müəssisələrinin payına düşdüyünü diqqətə çatdırdı. Qeyd olundu ki, hesabat dövründə əsas kapitala yönəldilmiş investisiyanın 6,4 milyon manatı, yəni 87,7 faizi istehsal təyinatlıdır. Cari ilin ilk rübündə rayon üzrə pərakəndə əmtəə dövriyyəsi və pullu xidmətlərin həcmi 8,4 faiz artaraq 155,5 milyon manat olmuş, özəl müəssisələr tərəfindən əhaliyə 148,9 milyon manatlıq istehlak malları satılmış, 46,4 milyon manatlıq pullu xidmətlər göstərilmişdir. Həmçinin bildirildi ki, ötən ilin yekununa görə, rayon üzrə işçilərin orta aylıq nominal əmək haqları 19,3 faiz artaraq 276,5 manat olmuşdur. Orta aylıq əmək haqqı sənayedə 15,6 faiz, nəqliyyat sahəsində 11,2 faiz, rabitədə 25,3 faiz, ticarətdə 12,5 faiz, sosial sahədə 22,1 faiz artmışdır.

M.Əliyev bildirdi ki, 2009-cu ilin birinci rübündə Nizami rayonunda 342 yeni iş yeri açılmışdır ki, bunun da 24-ü yeni yaradılmış müəssisələrin, 8-i mövcud müəssisələrin, 310-u isə fiziki şəxslərin payına düşmüşdür. Bütövlükdə 2003-cü ilin oktyabr ayından 2009-cu ilin aprel ayının 1-dək rayonda 12 mindən çoxu daimi olmaqla 14108 yeni iş yeri yaradılmışdır. Cari ilin birinci rübündə rayon əhalisinin sosial müdafiəsinin gücləndirilməsi sahəsində görülmüş işlər barədə məlumat verən natiq bildirdi ki, ölkə başçısı tərəfindən imzalanmış fərman və sərəncamların məhz əhalinin sosial rifahının yüksəldilməsinə yönəldilməsinin nəticəsidir ki, əvvəlki dövrlərlə müqayisədə əhalinın maddi rifah halı getdikcə yaxşılaşır.

Məruzəçi dövlət başçısının Nazirlər Kabinetinin məlum iclasında Bakının abadlaşdırılması, yol və kommunikasiya sistemlərinin yenidən qurulması, nəqliyyat infrastrukturunun daha da təkmilləşdirilməsi, ekoloji sağlamlığın təmin edilməsi, xüsusən də paytaxtda yaşıllıqların qorunması və yeni ağacların əkilməsi ilə bağlı tövsiyə və göstərişləri rəhbər tutularaq Nizami rayonunda bu sahədə mühüm işlərin görülməsi planlaşdırılır.

Son illər rayonun səhiyyə və təhsil müəssisələrinin işinin əsaslı şəkildə yaxşılaşdırılması məqsədilə həyata keçirilən tədbirlər cari ilin birinci rübündə də davam etmişdir. İlin əvvəlindən rayonda abadlıq-quruculuq işləri aparılmış, əhalinin sosial problemlərinin həlli istiqamətində mühüm tədbirlər həyata keçirilmişdir. Sakinlərin işıq, qaz, istilik və içməli su ilə təminatının yaxşılaşdırılması da rayon rəhbərliyinin diqqət mərkəzində olmuşdur. Rayon icra hakimiyyətinin başçısı bütün bu işlər barədə geniş məlumat verməklə yanaşı, mövcud problemlərə də toxundu, onların qısa müddətdə aradan qaldırılmasının vacibliyini diqqətə çatdırdı.

Məruzə ətrafında çıxış edən digər natiqlər rəhbərlik etdikləri sahələrin rüb ərzindəki fəaliyyəti ilə bağlı hesabat verdilər, ölkənin sosial-iqtisadi inkişafı yolunda bundan sonra da səylə çalışacaqlarını bildirdilər.

Yığıncağın sonunda iclasın qərarı oxundu, Azərbaycan Respublikasının Prezidenti cənab İlham Əliyevə rayon ictimaiyyəti adından müraciət qəbul olundu.

Mirbağır YAQUBZADƏ

Xalq qəzeti.- 2009.- 30 aprel.- S. 5.