Azərbaycanın iqtisadi qüdrətinin artması və beynəlxalq aləmdə nüfuz qazanması xalqın hakimiyyətə olan inamını daha da gücləndirib

ABŞ-ın nüfuzlu “Gallup” təşkilatının apardığı rəy sorğusunun nəticəsi də bunu təsdiqləyir

“Gallup” təşkilatı Amerika Birləşmiş Ştatlarında yerləşir. Çox nüfuzlu və mötəbər qurum kimi ümumdünya səviyyəsində tanınmış bu təşkilat bütün dünya üzrə müstəqil tədqiqat aparır. İnsan resurslarını öyrənən, statistik araşdırma xidmətləri göstərən “Gallup” apardığı sorğular ərzində liderliyə, qanuna və hüquq qaydasına, qidalanmaya, işə, iqtisadiyyata, səhiyyəyə və 130 dünya ölkəsinin əhalisinin rifahına aid dəlillər toplamışdır. Hər il dünyada müxtəlif rəy sorğuları keçirir. “Gallup” təşkilatı müsəlman dünyasında və Qərbdə də təhsilə, dinə, mədəniyyətə və demokratiyaya aid məlumatlar toplamışdır.

“Gallup” təşkilatı dünyanın 10 müsəlman ölkəsində də sorğu aparmışdır. Aparılmış sorğular nəticəsində məlum olmuşdur ki, bu ölkələrin əhalisinin böyük əksəriyyəti İslam qanunlarının demokratiya ilə heç bir ziddiyyət təşkil etmədiyinə və demokratiya şəraitində bu qanunların çox gözəl şəkildə tətbiq edilə bilməsinə əmindirlər. Rəy sorğusu nəticəsində həm də bəlli olmuşdur ki, bu ölkələrdə yaşayan müsəlmanların mütləq əksəriyyəti demokratik dəyərləri qəbul edir.

“Gallup” təşkilatı bir müddət əvvəl Azərbaycanda da rəy sorğusu aparmış və ölkə əhalisinin 77 faizinin hakimiyyətin fəaliyyətindən razı qaldığını bildirmişdir. Bu barədə daha ətraflı məlumat əldə etmək üçün Milli Məclisin deputatı Rüstəm Xəlilova müraciət etdik.

O dedi:

— Hazırda sosioloji tədqiqatlarla məşğul olan çoxlu sayda beynəlxalq qurumlar var. “Gallup” onlar arasında ən çox tanınan təşkilatlardandır. Bu təşkilat dünyanın əksər dövlətlərində sosioloji tədqiqatlar aparır və çox obyektiv, inamlı nəticələr barədə məlumatlar yayır. Bu yaxınlarda Azərbaycanda tədqiqatlar aparan “Gallup” təşkilatı belə bir nəticəyə gəlmişdir ki, Azərbaycan əhalisinin 77 faizi hakimiyyətin fəaliyyətindən razıdır. Yəni, xalq indiki hakimiyyətlə həmrəy olduğunu bildirir, bu iqtidarın daxili və xarici siyasətini bəyənir, ona inanır. Azərbaycanın sürətli inkişaf yoluna qədəm qoyması, əhalinin rifah halının yüksəldilməsi, quruculuq-abadlıq işlərinin geniş vüsət alması, insan hüquq və azadlıqlarının yüksək səviyyədə qorunması əhali tərəfindən müsbət qiymətləndirilir. Mötəbər təşkilatın keçirdiyi rəy sorğusunda Azərbaycan bütün postsovet ölkələrini qabaqlayıb.

Əgər sorğunun nəticələrinə fikir versək, görərik ki, Gürcüstanda əhalinin 21, Ukraynada 4 faizi, Azərbaycanda isə əhalinin böyük əksəriyyəti hökumətin fəaliyyətindən razılığını bildirib. Təbii ki, bu göstərici təsadüfi deyildir. Son beş ildə Azərbaycan bütün sahələr üzrə çox sürətlə inkişaf edib. İqtisadiyyatın artımındakı sürət tempinə görə müstəqil dövlətimiz təkcə regionda deyil, dünyada lider dövlətdir. Bir faktı da qeyd etmək yerinə düşərdi. Ötən il Dünya Bankı tərəfindən açıqlanan “Doinq Business-2009" hesabatında Azərbaycan dünya ölkələri arasında ən islahatçı dövlət elan edilmişdir. Ötən beş ildə qazanılmış uğurları gözlərimiz önünə gətirəndə bir daha şahidi oluruq ki, respublikamızın bütün bölgələrində təhsil ocaqları, səhiyyə müəssisələri, Olimpiya-idman kompleksləri, istirahət-əyləncə mərkəzləri və digər sosial obyektlər tikilib istifadəyə verilmişdir. Regionların sosial-iqtisadi inkişafı Dövlət Proqramının qarşıya qoyduğu vəzifələrin layiqincə yerinə yetirilməsi nəticəsində fəaliyyətini dayandırmış müəssisələr bərpa olunmuş, beynəlxalq standartlara tam cavab verən çoxlu sayda sənaye və istehsal sahələri tikilmişdir. Bunun da sayəsində beş il ərzində 766 min iş yerləri yaradılmış, əhalini ən çox narahat edən işsizlik problemi demək olar ki, aradan qaldırılmış, yoxsulluğun səviyyəsi 49 faizdən 13,2 faizə enmişdir.

Hakimiyyətin yeritdiyi uğurlu daxili və xarici siyasət sayəsində müstəqil dövlətimizin dünya birliyində mövqeləri daha da möhkəmlənmiş, əlaqələri genişlənmişdir. Azərbaycanın hərtərəfli inkişafına yönəlmiş davamlı tədbirlər cəmiyyətin böyük rəğbətinə səbəb olmuş, ona görə də “Gallup” kimi nüfuzlu bir təşkilatın apardığı rəy sorğuları zamanı respondentlərin böyük əksəriyyəti hakimiyyətə inandığını, dövlətin yeritdiyi daxili və xarici siyasəti bəyəndiyini bildirmişdir. Ölkədə yaranmış davamlı ictimai-siyasi sabitlik, həmçinin insan hüquq və azadlıqlarının qorunmasının daim dövlətin diqqət mərkəzində saxlanılması da əhali tərəfindən yüksək qiymətləndirilib. Bilirsinizmi, hər hansı bir təşkilat tədqiqat aparanda yalnız bir sahə üzrə maraqlanmır. Onlar ölkənin hərtərəfli inkişafı ilə maraqlanır, ətraflı sorğular aparır, ən başlıcası isə bu sorğular anonim şəklində olur. Ona görə də belə tədqiqatların nəticələri heç kimdə şübhə doğura bilməz.

Məsələn, “Gallup” təşkilatının tədqiqatına fikir verək. Bu təşkilatın keçirdiyi rəy sorğusunda Azərbaycan bütün postsovet ölkələrini qabaqlayıb. Əgər burada şübhəli və qabaqcadan hazırlanmış bir tədqiqat olsaydı, o zaman digər ölkələr öz etirazlarını bildirərdilər. Məgər postsovet ölkələrində bilmirlərmi ki, 2005-ci ildən başlayaraq, Azərbaycan iqtisadi artım tempinə görə dünyada lider ölkə olmuşdur? Bütün dünyaya bəllidir ki, Azərbaycan iqtisadiyyatı 2,6 dəfə artmış, adambaşına düşən gəlir 5500 dollara çatmışdır. Sənaye istehsalının həcmi 2,5 dəfə yüksəlmişdir. Həyata keçirilən uğurlu islahatlar əhalinin həyat səviyyəsini xeyli yaxşılaşdırmışdır. Minimum əmək haqqı 8,3 dəfə, minimum pensiyanın məbləği 4 dəfə artmışdır. Bunlar adi rəqəmlər deyil, son beş ildə Azərbaycanın sürətli inkişaf yolunda inamla irəlilədiyini təsdiqləyən faktlardır. Bu gün dünyanın inkişaf etmiş ölkələri Azərbaycanla əməkdaşlığa böyük maraq göstərir. Bir vaxtlar hamının əfsanə kimi qəbul etdiyi Bakı-Tbilisi-Ceyhan əsas ixrac neft və Bakı-Tbilisi-Ərzurum qaz kəmərləri məhz möhtərəm Prezidentimiz cənab İlham Əliyevin uzaqgörənliyi, müdrikliyi sayəsində həyata vəsiqə aldı. Hazırda tikilməkdə olan Bakı—Tbilisi—Qars dəmir yolunun reallaşması da möhtərəm Prezidentimizin siyasi fəaliyyətinin məhsuludur. Bütün bunlardan sonra Azərbaycan dünyada iri infrastruktur layihələrin reallaşdırılmasında zəngin təcrübəsi olan dövlət kimi tanınıb.

Bu layihələr həyata vəsiqə aldıqdan sonra bundan gələn gəlir hesabına ölkə iqtisadiyyatı daha da inkişaf etdi, insanların yaşayış şəraiti xeyli yaxşılaşdı. Ən başlıcası ordu quruculuğu sahəsində çox mühüm irəliləyişlər oldu.

Dövlətimizin başçısı bu günlərdə keçirilən Nazirlər Kabinetinin 2009-cu ilin blirinci yarısının sosial-iqtisadi inkişafının yekunlarına həsr olunmuş geniş iclasında da bu məsələni xüsusi vurğulayaraq dedi: “Ordu quruculuğu məsələlərinə ənənəvi olaraq diqqətimizi əsirgəmirik. Azərbaycan müharibə şəraitində yaşayır və belə olan halda, ilk növbədə, bu məsələlərə ən böyük diqqət göstərilməlidir. Keçən ay ordu günü ərəfəsində keçirilmiş genişmiqyaslı hərbi təlimlər bir daha bizim gücümüzü göstərdi. Keçən il biz hərbi parad keçirməklə öz hərbi texnikamızı nümayiş etdirdik, bu il öz döyüş qabiliyyətimizi nümayiş etdirdik. Mən çox şadam ki, bu gün Azərbaycan ordusunun vəziyyəti elədir ki, qarşıda duran istənilən vəzifəni uğurla icra edə bilər. Bizim bütün səylərimiz bu məqsədə xidmət edir — Azərbaycanın ərazi bütövlüyü bərpa olunsun, işğalçı qüvvələr ölkəmizin zəbt edilmiş torpaqlarından çıxarılsın”.

Azərbaycan vətəndaşları bütün bu uğurları, nailiyyətləri görür. İlham Əliyev kimi praqmatik düşüncəli, intellektual səviyyəli, demokratik düşüncəli bir şəxsiyyəti Azərbaycan Prezidenti seçməklə fəxr edir, qürur hissi keçirirlər.

“Gallup” təşkilatının faktlara əsaslanaraq gəldiyi nəticə hamımızı sevindirir. Ölkəmizin adının belə bir nüfuzlu təşkilat tərəfindən uca tutulması, dövlətimizin fəaliyyətinin yüksək dəyərləndirilməsi bəzi bədxahların ovqatını tamamilə korlayıb. Bundan ötrü təəssüflənməyə dəyməz. “Bəlkə də qaytardılar” xülyasından hələ də əl çəkməyən belələri öz şəxsi mənafelərini hər şeydən, hətta, xalqın taleyüklü məsələlərindən də üstün tutduqlarını ört-basdır edə bilmədilər. Onlar Azərbaycan əhalisinin hakimiyyətin fəaliyyətindən bu dərəcədə razı qalmasından çox ciddi narahat olmağa başlayıblar və “Gallup” təşkilatının faktlara söykənən rəy sorğusuna kölgə salmağa çalışırlar. Belələri vaxtaşırı çayxanalara toplaşaraq öz aralarında “rəy sorğuları” keçirir və bir-birlərini “reytinqli”, “ən yaxşı siyasətçi” adlandıraraq bundan təsəlli tapırlar. Özlərini demokrat adlandıran, belə özlərindən müştəbehlər 14-15 ildir ki, adi bir partiya sədrliyindən bərk-bərk yapışaraq əsl “demokratiya” nümayiş etdirirlər. Öz gözlərində tiri görməyib başqalarının gözündə tük axtaran belə vəzifə hərislərinə xalq çoxdan “yox” deyib. Bu gün “Gallup” kimi nüfuzlu bir təşkilatın sosioloji tədqiqatına kölgə salmağa çalışan həmin adamlar yanılırlar. Azərbaycan əhalisinin böyük əksəriyyətinin hakimiyyətin fəaliyyətindən razı qalması onları bərk narahat edib. Əslində onlar xalqın yaddaşından birdəfəlik siliniblər və bir daha geriyə qayıtmayacaqlar. Azərbaycan isə möhtərəm Prezident İlham Əliyevin rəhbərliyi altında beynəlxalq aləmdə öz mövqelərini daha da möhkəmləndirəcək, daim irəliyə, yüksəlişə doğru gedəcək.

Əliqismət Bədəlov

Xalq qəzeti.- 2009.- 8 avqust.- S. 2.