Bakı - yeniləşən, gözəlləşən şəhər

Bakı şəhərinin son durumu paytaxtını sevən sıravi bir vətəndaş kimi məndə son dərəcə qürur doğurur. Ona görə də ürəyimdə gəzdirdiyim fikirlərimi mənimlə həmrəy olanlarla bölüşmək istəyirəm. Bu yaxınlarda qatarla Tiflisdən Bakıya gəlirdim. Mənimlə bir kupeyə iki gürcü düşmüşdü. Biri uzun müddət Rusiyada yaşayan və Gürcüstandan — öz vətənindən qayıdırdı, digər gürcü isə yalnız 25 il əvvəl Bakıda olmuş, indi isə işi ilə əlaqədar Bakıya ezamiyyətə gəlirdi.

Həmişə olduğu kimi, ümumi güzaran haqqında söhbətlə bərabər hərə öz şəhəri haqqında da yenilikləri söyləyirdi. Bakıda 25 il əvvəl olmuş gürcü Tiflisi öyməyə, onun gözəlliyini tərif etməyə başladı. Mən də öz növbəmdə Bakının son durumunu söyləyəndə o qaşlarını çatıb, Tiflisə heç bir Qafqaz şəhərinin bənzəmədiyini deyib, söhbəti mübahisəyə çevirdi. Bu vaxt, o biri gürcü, yəni bir ay bundan əvvəl Bakıda olub, sonra Tiflisə gedənin ana dilində ona söylədiyi sözlər məndə böyük qürur doğurdu. Onlar mənim gürcü dilini başa düşdüyümü bilmirdilər. Ona görə də, təxminən on dəqiqə öz dillərində Bakının indi necə olduğunu müzakirə etdilər. Mən isə gülümsəyirdim. Doğrudur, Bakıda çoxdan olmuş gürcü bununla razılaşa bilmirdi. Amma, o birisi ona sabah Bakını gəzməyi məsləhət bildi.

Mən 50 ildən çoxdur ki, Bakıda yaşayıram. Bu müddət ərzində çoxlu vəzifəli şəxslərin Bakıda gördükləri işlərin şahidi olmuşam. Hər dəfə Bakıda yeni bir yaraşıqlı bina tikiləndə, park salınanda, küçələr asfaltlananda uşaq kimi sevinmişəm.

Amma Bakıda son 4-5 ildə görülən işləri görəndə qanad açıb uçmaq istəyirəm. Çünki, əvvəllər Moskvaya, Tallinə, Tiflisə gedəndə, onların gözəl prospektlərini, parklarını görəndə qüssələnirdim. İndi Bakıda belə parkların, küçələrin sayını itirmişəm. Mən bilirəm ki, bu yazını oxuyanlardan bəziləri özünə məxsus yozmalar da edəcəklər. Ancaq bir Allah şahiddir ki, mən bunu öz ürəyimin arzusu ilə yazıram. 70 yaşı haqlamışam, heç bir vəzifədə, heç nədə tamahım yoxdur. Ancaq vətənimizin paytaxtının vurğunuyam, onu gözəl görəndə sağlamlaşıram.

Bakı nəinki gözəlləşir, həm də yenidən qurulur. Bunu görməmək mümükün deyil. Əlbəttə, bütün bunlar hörmətli Prezidentimiz cənab İlham Əliyevin iradəsi ilə, göstərişi və arzusu ilə həyata keçirilir. Özü də sürətlə həyata keçirilir. Bu işdə onun göstərişi ilə yaradılan Azərbaycan Respublikası Neft Şirkəti nəzdində Sosial İnkişaf İdarəsi işçilərinin, bu idarənin rəisi cənab Bədəl Bədəlovun xidmətlərini də deməmək günah olardı. Bu qeydləri yazmaq fikrinə düşərkən, mən Sosial İnkişaf İdarəsinin binaları təmir edən fəhlələri, briqadirləri, mühəndislərinin bəziləri ilə söhbətlər aparmalı oldum.

Köhnə sovet dövründən fərqli olaraq, bu idarənin iş intizamı, dəqiq və düz işləmələri məni heyran qoydu. Mən bəzi binaların sakinləri ilə görüşüb, onları narahat edən şeyləri də öyrənmək istədim. Məsələn, Bülbül prospekti, 30-da yaşayan mənzil sahibləri ilə söhbət əsasında məlum oldu ki, onların narahat olduqları məsələlərlə əlaqədar Sosial İnkişaf İdarəsinə edilən hər bir müraciətə (istər şikayət, istərsə də müxtəlif təkliflərə) 3-4 gün ərzində reaksiya verilib və tədbir görülür. Məlum olduğu kimi, əvvəllər hərə öz balkonunda bir neçə televiziya antennası asırdı, bununla da bina yöndəmsiz şəklə düşürdü. İndi isə, təmirçilər bütün antennaların hamısını binanın ən hündür yerində bir yerə yığıb, səliqə ilə quraşdırıblar. Lakin ev sahiblərinin bəziləri həmin vaxt mənzillərində olmadıqlarından xəbərdar edilə bilməyiblər. Ona görə də narazılıq edərək, şikayət edənlər olmuşdu. Buna görə də antenna ustaları mənzilləri gəzərək, hər kəsin antenna yerini göstərdilər, hətta evlərində televizorlarını da yüngül təmir etdilər. Eləcə də, elektrik xətləri, divar sobaları və s. haqqında olan bütün narazılıqlar təmin olunub. İndi mən və mənim kimi şəhərini sevənlərin müəyyən arzuları var, onlar da həyata keçsə biz özümüzü xoşbəxt sanardıq. Məlumdur ki, bir çox şəhərlərin sevimli prospekti və ya küçələri var. Məsələn, Tiflisdə Rustaveli prospekti, Kiyevdə Kreşsatik küçəsi, Moskvada Qızıl meydan və s. Bizim şəhərdə də belə küçələr çox olsa daha yaxşı olardı. Məsələn, Bülbül prospekti buna münasibdir. Belə ki, bu küçə həm ulu öndərimiz Heydər Əliyev sarayının qarşısından keçərək, bulvara qədər uzanır, həm də şəhərin tam mərkəzindədir. Əlbəttə, Heydər Əliyev adına saraya gələn qonaqların çoxu onun qarşısındakı bağı da gəzirlər. Ona görə də, bu sarayın yaxınlığındakı evlərin balkonları qədimi stildə düzəlsə, çox gözəl olardı. Xüsusən, Ü.Hacıbəyov adına Konservatoriya ilə, Heydər Əliyev adına sarayın kassası arasında yerləşən binalar (Bülbül prospekti — 30,32) sarayın qabağındakı bağla kompleksvari bütövlük təşkil edir. Bu parkın və sarayın ümumi gözəlliyi xatirinə həmin binaların (Konservatoriyaya qədər) qədimi stildə təmiri oranı şəhərin ən gəzməli-görməli yerinə çevirərdi.

Bütün bunlar arzulardır və belələrini çox sadalamaq olar. Əsas odur ki, nəinki 15-20 il bundan əvvəl Bakıya gələnlər, hətta Bakının özündə yaşayanlar da paytaxtımızın gözəlliyinə heyran olur, az qala şəhərimizi tanımırlar.

Əlbəttə, şəhərimizin gözəlləşməsinə əngəl törədən təşkilatlar da var. Məsələn, Bakı şəhərində ayrı-ayrı rayonlar üzrə sanitariya, gigiyena idarələrinin nə ilə məşğul olduqları məlum deyil. Zibil yerləri dərmanlanmır, bəzən zibil yeşikləri yaraşıqlı küçə boyunca düzülür, antisanitariya hökm edir. Bu işdə Nəsimi rayonu gigiyena və epidemiologiya mərkəzinin işi göz önündədir. Onlar antisanitariya ilə bağlı hər hansı şikayəti başqa rayona istiqamətləndirir, zirzəmilərdəki restoranların fəaliyyətinə fikir vermirlər və s. Biz əminik ki, hörmətli Prezidentimiz bir dəfə bunlara da diqqət yetirməyə vaxt ayıracaq. Göstərilən qüsurlar başlanmış böyük və gözəl işi dayandıra bilməz.

Bu sözlər şəhərini qəlbən sevənlərin ürək sözləridir. Belə xoş sözlərin yaranmasına səbəb olanların hamısına, başda Prezidentimiz cənab İlham Əliyev olmaqla, minnətdarlığımızı bildirməyi özümüzə borc bilirik.

Vəli Musayev

Xalq qəzeti.- 2009.- 8 avqust.- S. 4.