Media və sosial müdafiə

Azərbaycan Respublikası Əmək və Əhalinin Sosial Müdafiəsi Nazirliyinin İsmayıllı Rayon İcra Hakimiyyəti ilə birgə təşkil etdiyi “Ünvanlı sosial yardım və sosial reabilitasiya” mövzusunda seminarda ölkənin aparıcı kütləvi informasiya vasitələrinin əmək və sosial müdafiə mövzusunda yazan jurnalistləri işgüzar, faydalı diskusiyanın iştirakçısı oldular.

İsmayıllı rayonunun səfalı, axar-baxarlı güşəsində yaradılmış “Qaya” istirahət kompleksi ikinci dəfə idi ki, məmur-jurnalist dialoquna ünvan olmuşdu. Seminarı giriş sözü ilə açan Əmək və Əhalinin Sosial Müdafiəsi Nazirliyi aparatının rəhbəri Rizvan Əliyev bildirdi ki, seminarın keçirilməsində məqsəd media nümayəndələrinə nazirliyin qanunvericilikdə nəzərdə tutulmuş fəaliyyət dairəsi, vəzifələri və s. haqqında məlumat verməkdən, bu sahədə onların bilik və informasiyalarını artırmaqdan ibarətdir. Gələcəkdə əmək və sosial müdafiə mövzusunda yazan jurnalistlərin tədricən akkreditə edilməsi sistemi həyata keçiriləcək. Ümumiyyətlə, nazirliyin həyata keçirdiyi tədbirlərə, layihələrə bu sahədə geniş informasiyası olan, xüsusi hazırlıq keçmiş jurnalistlərin dəvət olunması nəzərdə tutulur.

Nazirliyin mətbuat xidmətinin rəhbəri Elnur Kələntərov iştirakçıların nəzərinə çatdırdı ki, bir il əvvəl burada keçirilmiş ilk seminarda nazirliyin bir sıra idarə və şöbələrinin rəhbərləri öz fəaliyyətləri və media üçün maraqlı olan məsələlər barədə geniş məlumat vermiş, sualları cavablandırmışdılar. Ötən dövrdə nazirliklə KİV arasında əlaqələrin əhatəsi genişlənmiş, fəallığı artmışdır. Builki seminarda nazirliyin yoxsulluq problemləri və ünvanlı sosial yardım siyasəti şöbəsinin fəaliyyəti, ÜSY-ın təyinatı mexanizmi, onun məqsədi, ailələrin gəlirlərinin hesablanması, sosial reabilitasiyaya keçid və s. mövzular diqqət mərkəzində olacaq. Məqsəd jurnalistlərin həm də istirahət etmələrinə, bir-biri ilə daha yaxından tanış olmalarına, fikir mübadiləsi aparmalarına şərait yaratmaqdır.

Sonra nazirliyin yoxsulluq problemləri və ÜSY siyasəti şöbəsinin müdiri Natiq Qasımovun “Sosial yardım və reabilitasiya, davamlı inkişaf”, şöbənin aparıcı mütəxəssisi Musa Ağamalıyevin “Ünvanlı sosial yardım siyasəti: zərurət və təyinat mexanizmi” mövzusunda məruzələri dinlənildi. Natiqlər bildirdilər ki, Azərbaycan Prezidentinin müvafiq fərmanına əsasən, 2006-cı ildən ölkəmizdə ünvanlı dövlət sosial yardımı sisteminin tətbiqinə başlanılıb. Cari ilin birinci yarısında 179504 ailə (817355 nəfər ailə üzvü) dövlətdən ünvanlı yardım almışdır. Ölkədə hər ailəyə düşən ünvanlı yardımın orta aylıq məbləği 98,19 manat, hər ailə üzvünə düşən ünvanlı yardımın orta aylıq məbləği isə 21,56 manatdır.

Yardım təyin olunan ailələrin 73191-i (40,8 faizi) 3 və daha çox uşağı olan, 973-ü (0,5 faiz) tərkibində müharibə əlili olan, 22863-ü (12,7 faizi) digər səbəblərdən əlil olmuş üzvləri olan, 293-ü (0,2 faizi) qəyyumluq təyin edilmiş, 16043-ü (8,9 faizi) məcburi köçkün və 44-ü (0,02 faizi) şəhid ailələridir. Ünvanlı yardım alan ailələrin 77,8 faizi dövlətdən ilk dəfə yardım alanlardır ki, bunu da ünvanlılığın təzahürü kimi qiymətləndirmək olar.

Ünvanlı dövlət sosial yardım sistemi ilə bağlı qanunvericilik sistemi daha da təkmilləşdirilib. Ehtiyac meyarının məbləği artırılıb, ünvanlı yardım üçün tələb olunan sənədlərin sayı azaldılıb. Yardımların əhatə dairəsi genişləndirilib, həmçinin ünvanlı yardımın təyin olunma müddəti 6 aydan bir ilədək uzadılıb, yardımın təyin olunmasından imtina müddəti 2 ildən 1 ilə endirilib. Yardımın şəffaf və ədalətli şəkildə çatdırılması diqqət mərkəzindədir.

Fəal diskussiyalardan sonra seminar mövzusu üzrə test yoxlaması keçirildi. Jurnalistlərə mövzunun mənimsənilməsini təsdiqləyən sertifikatlar təqdim olundu. Nazirliklə KİV-in əlaqələrini günün tələblərinə uyğun qurmaq üçün iştirakçıların rəy və təklifləri də öyrənildi.

Tahir R.

Xalq qəzeti.- 2009.- 21 avqust.- S. 4