Azərbaycan Ordusu qarşıda duran bütün vəzifələri həll etməyə qadir bir ordudur

Bu gün Azərbaycan sözün əsl mənasında, bölgədə ən yüksək mövqelərə malik bir ölkədir. Əlbəttə, bu mövqeni şərtləndirən mühüm amillər vardır. Bu amillər böyük iqtisadi potensial və güclü ordudur. Güclü ordu güclü dövlət deməkdir. Bizim məqsədimiz güclü ordu yaratmaqdır. Biz bunu edirik, yaradırıq, biz daha da möhkəm orduya malik olacağıq.

İlham ƏLİYEV,

Azərbaycan Respublikasının Prezidenti,

Silahlı Qüvvələrin Ali Baş Komandanı

Azərbaycan Respublikası Silahlı Qüvvələrinin yaradılması müstəqil Azərbaycanın dövlət quruculuğunun mühüm nailiyyətlərindən biridir. Milli Ordumuzun yaradılmasının tarixi əslində Azərbaycanın müstəqilliyinin, suverenliyinin salnaməsidir.

Azərbaycan Milli Ordusunun əsası hələ XX əsrin əvvəllərində qoyulmuşdur. Bu, bizim tariximizdə çox əlamətdar və yadda qalan siyasi hadisə idi. 1918-ci ildə müstəqil Azərbaycan Demokratik Respublikası yarandıqdan sonra onun Milli Ordusu da yaradıldı. Dövlətin dövlət olması üçün Milli Ordunun təşəkkül tapması ən vacib amillərdən biridir. Çünki ordu Vətəni müdafiə edir, yadelli düşmənlərdən qoruyur. Güclü, qüdrətli ordusu olmayan dövlət uzun müddət öz müstəqilliyini qoruya bilməz. 1918-ci ildə öz müstəqilliyini elan etmiş Azərbaycan Xalq Cümhuriyyətinin uzun müddət yaşaya bilməməsinin əsas səbəblərindən biri də güclü, qüdrətli orduya malik olmaması idi.

1991-ci ildə Sovet İttifaqının dağılması nəticəsində Azərbaycan öz dövlət müstəqilliyini yenidən bərpa etdi. Həmin vaxt ən zəruri vəzifələrdən biri Milli Ordunun yaradılması idi. Əfsuslar olsun ki, o dövrdə hakimiyyətə rəhbərlik edənlər Azərbaycanın milli, nizami ordusunu yarada bilmədilər. Ordu quruculuğu prosesi tamamilə unudulmuşdu. Vahid ordunun olmaması üzündən Azərbaycan məğlubiyyətlərə uğrayır, Ermənistanın təcavüzü qarşısında aciz qalır, torpaqlarımızı itirirdik. Ölkədə yaranmış anarxiya, xaos və özbaşınalıqdan istifadə edən ayrı-ayrı şəxslər sərhəd bölgələrindəki əsgər və zabitləri öz ətraflarında cəmləşdirərək mövqelərini möhkəmləndirməyə çalışırdılar. Müxtəlif adamlara xidmət göstərən özünümüdafiə batalyonları isə əhalidə xof yaradır, bəzən isə erməni separatçıları ilə əlaqəyə girərək çirkin işlərlə məşğul olurdular. Belə özbaşınalığın və başıpozuqluğun acı nəticəsi nəhayət ki, 1993-cü ildə özünü açıq şəkildə büruzə verdi. AXC-Müsavat cütlüyünün Milli Qəhrəman səviyyəsinə qaldırdığı korpus komandiri, polkovnik Surət Hüseynov başçılıq etdiyi silahlı qoşun birləşmələrini sərhəd bölgəsindən ayıraraq paytaxta, hakimiyyətin üzərinə yönəltdi. Nəticədə öz silahlı qüvvələrimiz qarşı-qarşıya gəldi... və qardaş qanı töküldü.

Xalqın təkidli tələbi və xahişi ilə 1993-cü ilin iyununda yenidən siyasi hakimiyyətə qayıdan, ümummilli lider Heydər Əliyev ordu quruculuğu prosesini vacib və zurəri məsələ kimi diqqət mərkəzində saxladı. Ulu öndər qətiyyətlə deyirdi ki, Azərbaycan Respublikası özünü müdafiə etməyə qadir orduya malik olmalıdır. 1991-1993-cü illər ərzində hər gün döyüş bölgələrindən şəhid cənazələri gətirilirdi. Azərbaycan xalqı bu illər ərzində on mindən çox şəhid vermişdi. Yüzlərlə igid döyüşçümüz Vətən uğrunda gedən vuruşlarda yaralanmış, sağlamlığını itirmiş, ağır bədən xəsarətləri almışdı. Bütün bunlar orduda vahid komandanlığın olmamasının acı nəticələri idi.

1991-ci ilin sentyabr ayında Azərbaycan Respublikasının Ali Soveti Müdafiə Nazirliyinin və həmin ilin oktyabr ayında isə Silahlı Qüvvələrin yaradılması haqqında qanun qəbul etsə də, nizami ordu yaradılmadı. O zamankı ölkə rəhbərliyinin düşüncəsinin məhsulu olaraq özünümüdafiə ərazi taburları yaradıldı və bunun da son aqibəti hamımızın yadındadır.

Ümummilli lider Heydər Əliyevin Azərbaycan xalqı qarşısında ən böyük xidmətlərindən biri də nizami, Milli Ordunu yaratmasıdır. Məhz ulu öndərin müstəsna fəaliyyəti nəticəsində Azərbaycanda ordu quruculuğu prosesi çox sürətlə aparıldı. Ümummilli lider erməni işğalçılarının aramsız atəş açmalarına baxmayaraq, səngərlərdə Azərbaycan əsgərləri ilə çiyin-çiyinə dayandı, onlara ürək-dirək verərək ruhlandırdı, mənəvi dayaq, etibarlı arxa oldu. Zaman keçdikcə Azərbaycan Silahlı Qüvvələrini özünümüdafiə dəstələrindən beynəlxalq standartlara cavab verən, vahid komandanlıqdan idarə olunan qüdrətli hərbi struktura çevirdi. Orduda vəziyyət köklü surətdə dəyişdi. Ulu öndər o zaman çıxışlarının birində demişdir: “Azərbaycanın dövlət quruculuğunda əsas yerlərdən biri güclü ordumuzun yaradılmasıdır... Azərbaycan bir tərəfdən Ermənistanın təcavüzünə məruz qaldığına, ikinci tərəfdən təkcə bu gün yox, gələcəkdə də həmişə öz torpaqlarını, öz mənafelərini qorumaq üçün güclü orduya malik olmalıdır”.

Ordu quruculuğu prosesinin sürətlənməsi Azərbaycanın sülh danışıqlarında mövqelərini daha da möhkəmləndirdi. Böyük tarixi şəxsiyyət Heydər Əliyevin uzaqgörənliyi sayəsində Azərbaycanda Silahlı Qüvvələrin Hərbi Akademiyası, Təlim və Tədris Mərkəzi, Azərbaycan Ali Hərbi Məktəbi, Azərbaycan Ali Hərbi Dənizçilik Məktəbi, Azərbaycan Ali Hərbi Təyyarəçilik Məktəbi, Azərbaycan Dövlət Tibb Universitetinin nəzdində hərbi tibbi fakültə, orta hərbi tibb məktəbi, habelə Cəmşid Naxçıvanski adına Hərbi Lisey yaradıldı. 2001-ci ilin avqust ayında Azərbayan Silahlı Qüvvələrinin həyatında çox əlamətdar, tarixi hadisə baş verdi. İlk dəfə olaraq Azərbaycan Ali Hərbi Məktəbinin müasir standartlara uyğun proqramla hazırlanmış məzunlarının ilk buraxılış mərasimi keçirildi. Bu, NATO standartlarına keçmiş hərbi təhsil sisteminə müvafiq hazırlıq almış ilk zabit kadrlarımız idi. Bu, ümummilli lider Heydər Əliyevin ordu quruculuğu prosesində, Milli Ordu yaradılması sahəsində gərgin əməyinin bəhrəsi idi.

Azərbaycan Respublikası ilə NATO arasında fərdi əlaqələndirmə proqramı əsasında Silahlı Qüvvələrimizin nümayəndələri NATO-nun hərbi məktəbləri, kollecləri və başqa strukturlarında keçirilən sülhməramlı kurslarda, Avropada təhlükəsizlik sahəsində əməkdaşlıq, adi silahlara nəzarət, böhran vəziyyətini idarəetmə, ətraf mühitin mühafizəsi, inteqrasiya proseslərinin genişləndirilməsi və digər tədbirlərdə iştirakı Milli Ordumuzun peşəkarlığını daha da artırmışdır.

Ümummilli liderin ideyalarını layiqincə həyata keçirən möhtərəm Prezidentimiz İlham Əliyev ordu quruculuğu prosesini daha da sürətləndirdi. Ordunun güclənməsi üçün lazım olan bütün imkanlardan səmərəli istifadə olundu. Möhtərəm Prezidentimiz də mütəmadi olaraq cəbhə bölgələrində dayanan əsgərlərlə səngərlərdə görüşür, Azərbaycan Ordusunun hansı səviyyədə olmasını şəxsən müşahidə edirdi. Ali Baş Komandan bir daha əmin olurdu ki, orduda ruh yüksəkliyinin artırılması, peşəkarlıq, müasir standartlara uyğunlaşma prosesi çox sürətlə gedir. Bununla yanaşı, Milli Ordumuzun maddi-texniki bazasının möhkəmləndirilməsi də ciddi nəzarətdə saxlanılırdı. Müqayisə üçün diqqətə çatdırım ki, son beş il ərzində Azərbaycanın hərbi xərcləri 10 dəfədən çox artmış və hazırda 2 milyard dolları ötmüşdür. Son bir neçə il ərzində ölkədə müasir tələblərə cavab verən çox güclü hərbi sənaye kompleksi yaradılıb. Dövlət başçımızın sərəncamı ilə Müdafiə Sənayesi Nazirliyinin yaradılması bu baxımdan diqqəti daha çox cəlb edir. Hərbi sənaye kompleksinin yeni tərkib hissəsi olan zavodların açılmasından sonra ölkəmizdə bu sahədə istehsal olunan məhsullar dünya standartlarına uyğundur. Möhtərəm Prezidentimizin rəhbərliyi altında Azərbaycanın hərbi potensialının gücləndirilməsi, beynəlxalq standartlara cavab verən müasir ordunun yaranması və Milli Ordumuzun daha da qüdrətlənməsi üçün xeyli iş görülmüşdür. Artıq işğal altında olan torpaqlarımızı azad etməyə qadir nizami ordumuz var. Biz Azərbaycan Silahlı Qüvvələrinin yaradılmasının 90-cı ildönümü münasibətilə Bakıda — Azadlıq meydanında keçirilən hərbi parad zamanı da bunun şahidi olduq. Təkcə Azərbaycan xalqı deyil, dünyanın əksər ölkələri müstəqil dövlətimizin necə güclü, qüdrətli orduya malik olduğunu müşahidə etdi. Hərbi paradda Silahlı Qüvvələrin bütün qoşun növlərinin, hərbi birlik və birləşmələrin, hərbi tədris müəssisələrinin, həmçinin qanunvericilikdə nəzərdə tutulan başqa silahlı birləşmələrin 4510 nəfərlik şəxsi heyəti, 210 modernləşdirilmiş hərbi texnika, döyüş vertolyotları, təyyarələri, gəmiləri və qayıqlar iştirak edirdi. Bu möhtəşəm tədbir möhtərəm Prezidentimiz İlham Əliyevin, qüdrətli şəxsiyyət Heydər Əliyev ideyalarına sədaqət və ehtiramının təcəssümü idi. Həmçinin Azərbaycan Silahlı Qüvvələrinin güc və qüdrətinin nümayişi idi. Hərbi paradın keçirilməsindən bir gün sonra ölkəmizə səfərə gəlmiş NATO baş katibinin Cənubi Qafqaz və Mərkəzi Asiya üzrə xüsusi nümayəndəsi Robert Simmons dövlət başçımızla görüşərkən Azərbaycan- NATO əməkdaşlığının hazırkı vəziyyəti və perspektivlərindən məmnunluqla söhbət açmış, hərbi paradın yüksək səviyyədə keçirildiyini vurğulamış və bu münasibətlə Prezident İlham Əliyevi təbrik etmişdir. Ümumiyyətlə, NATO nümayəndələrindən hər hansı biri ölkəmizə səfər edərkən Azərbaycan Silahlı Qüvvələrinin bu nüfuzlu qurumun standartlarına uyğunlaşdırılması istiqamətində görülən işləri yüksək qiymətləndirmişdir. Azərbaycan əsgər və zabitlərinin sülhməramlı qüvvələrin tərkibində Kosovoda, İraqda və Əfqanıstanda yüksək fəallıq gbstərmələri də NATO əməkdaşları tərəfindən müsbət dəyərləndirilmişdir.

Prezident İlham Əliyevin rəhbərliyi altında Azərbaycan Ordusunun beynəlxalq standartlar, xüsusilə NATO səviyyəsində inkişafı üçün bütün zəruri addımlar atılır. Ordu quruculuğunun, peşəkarlığın daha da artırılması üçün mühüm əhəmiyyət kəsb edən tədbirlər müvəffəqiyyətlə, ardıcıl surətdə həyata keçirilir. Təsadüfi deyildir ki, bu gün orduda fərarilik halları tamamilə aradan qaldırılıb.

Hazırda Azərbaycan Silahlı Qüvvələri müasir texnika ilə təchiz edilmiş, Vətənin müdafiəsinə daim hazır vəziyyətdə olan yüksək nizam-intizama malik bir ordudur. Buna baxmayaraq, ordu quruculuğu prosesi uğurla davam etdirilir. Bu gün Azərbaycan Ordusu sözün həqiqi mənasında bölgədə ən güclü ordudur. Güclü ordu güclü dövlət deməkdir. Azərbaycan Ordusu qarşıda duran bütün vəzifələri həll etməyə qadir bir ordudur.

Əliqismət Bədəlov

Xalq qəzeti.- 2009.- 25 avqust.- S. 3.