Çağdaş Azərbaycan ədəbi qurumları

Respublikamızda fəaliyyət göstərən peşəkar ədəbi yaradıcılıqla məşğul olan şəxsləri birləşdirən qurumlar, ədəbi dərgilər, qəzetlər (eləcə də ədəbiyyatşünaslığa, gənc yazarların yaradıcılığına daimi yer verən, daha çox yeni nəsil yazarları tərəfindən araya-ərsəyə gətirilən ictimai fikir nəşrləri), vebsaytlar, ədiblərimizin ev muzeyləri, ədəbiyyatşünaslıq üzrə ixtisaslaşmış elmi-tədqiqat ocaqları, ədəbi ödüllər barədə yığcam bilgilər Dünya Gənc Türk Yazarlar Birliyi adından təqdim etdiyimiz “Çağdaş Azərbaycan ədəbi qurumları” almanaxında toplanıb.

Almanaxda “Ədəbi qurumlar”, “Ədəbi dərgilər”, “Qəzetlər”, “Azərbaycan ədəbi elektron məkanı (vebsaytlar)”, “Muzeylər, poeziya evləri”, “Fondlar”, “Təqaüdlər, mükafatlar”, “Ədəbiyyatşünaslıq, dilçilik və bədii yaradıcılıq üzrə ixtisaslaşmış elmi-tədqiqat ocaqları”, “Repressiya qurbanı olan ədiblər”, “Şəhid şairlərimiz” kimi bölmələrdə respublikamızın ədəbi xəritəsini geniş şəkildə əks etdirməsinə, hansısa hüquqi şəxsin, yaradıcılıq qurumunun, ədəbi elektron ünvanının diqqətdən kənarda qalmamasına çalışmışıq.

Ancaq bu ilk buraxılışdır, yəqin, haqqında bilgi verilməmiş başqa qurumlar, quruluşlar da mövcuddur. Biz bütün təklifləri nəzərə alıb, gələcəkdə bu qəbildən ikinci — daha əhatəli soraq-məlumat kitabını hazırlayıb çap etdirməyi düşünürük.

Bu soraq-kitabı daha çox bölgələrdə yaşayan yaradıcı gənclər üçün nəzərdə tutulub. Bəzən adi bir ünvanın, telefonun axtarışına sərf edilən uzun-uzadı vaxta qənaət etmək baxımından, həmin zamanın məhz yaradıcılığa, axtarışlara, ədəbi görüşlərə sərf edilməsi üçün bu vəsaitin gərəkliyi şübhəsizdir. Habelə ədəbi mühitlə ilk tanışlıqların, xüsusən paytaxt mühitinə ilk addımların bilgisizlikdən yanlış atılmaması, çap olunmaq baxımından alternativlərin mövcud olduğunu göstərmək üçün də bu və bu kimi nəşrlər daha yeni, daha dəqiq bilgilərlə vaxtaşırı çap olunmalıdır.

Soraq-məlumat kitabının redaktorları İlqar İlkin, Rəsmiyyə Sabir və Namiq Hacıheydərlidir.

Qoşalı Əkbər

Xalq qəzeti.- 2009.- 22 avqust.- S. 6.