Xalqımızın sevimli qəzeti
“Xalq qəzeti”nin 90 yaşının tamam olması ölkəmizdən kənarda yaşayan azərbaycanlıları da ürəkdən sevindirir, qəzetlə bağlı xoş xatirələri, unudulmaz məqamları yada salır. Bu qəzet Azərbaycanda doğulub-böyümüş hər bir soydaşımızın ikinci Əlifba, Ana dili kitabı olmuşdur. Çoxları səlis, aydın yazıb-oxumağı bu qəzetdən öyrənmişdir. Mütəxəssislər haqlı olaraq “Xalq qəzeti”ni sovet dövründə Azərbaycan dilini qoruyan qeyrətli bir mərkəz, inkişaf etdirən canlı bir məktəb adlandırırlar. Təkcə bu xidməti bəs edərdi ki, “Xalq qəzeti” XX əsr tariximizdə təqdirəlayiq yer tutmuş olsun.
Lakin “Xalq qəzeti”nin ötən onilliklərdə ictimai-siyasi, elmi-mədəni həyatımızda da rolu hədsiz dərəcədə çox olmuşdur. Xalqımızın xarici aləmlə və respublikamızın hər bucağı ilə informasiya əlaqəsinin aparıcı yükünü uzun illər “Xalq qəzeti” daşımışdır. İnsanlarda elmi dünyagörüşünün, siyasi və əxlaqi mədəniyyətin formalaşmasında da onun xidmətləri danılmazdır. Qəzetin elmi-kütləvi mövzuda ardıcıl çap etdiyi müxtəlif səpkili yazılar ümumi savadlanma prosesində faydalı olmuşdur.
Ölkəmizdə tibbi biliklərin yayılmasında, geniş sanitariya maariflənməsində, gigiyena qaydalarının ardıcıl təbliğində də “Xalq qəzeti” həmişə öndə getmişdir. Respublikamızda səhiyyənin inkişafı, tibbi təhsilin təşkili, sahənin problemlərinin aradan qaldırılması da qəzetin səhifələrində geniş yer tutmuşdur. Çoxminli səhiyyə işçiləri “Xalq qəzeti”ni dünən olduğu kimi, bu gün də özlərinin sevimli qəzeti hesab edirlər.
20 ildir ki, elmi-tibbi fəaliyyətimlə bağlı Moskva şəhərində yaşayıram. Bu dövrdə “Xalq qəzeti”nin keçmiş sovet məkanında yaşayan soydaşlarımızın fikir-düşüncəsində necə mühüm yer tutduğunun canlı şahidiyəm. Biz Vətəndən kənarda yaşayan azərbaycanlılar doğma yurdumuzda baş verən hadisələr barədə doğru-dürüst məlumatı bu qəzetin səhifələrindən öyrənirik. Rusiyadakı Azərbaycan diasporunda Azərbaycanla bağlı obyektiv ictimai rəyin formalaşmasında “Xalq qəzeti” mötəbər mənbədir. Biz müstəqil dövlətimizin fəaliyyəti və xalqımızın arzu-düşüncələri barədə zəruri məlumatı almaqda “Xalq qəzeti”nə də borcluyuq.
Vətəndən uzaqlarda yaşayan soydaşlarımızın həyatı, qayğıları, diaspor hərəkatı, xaricdəki görkəmli həmvətənlərimiz barədə qəzetin yazılarını həmişə maraqla və razılıqla oxuyuruq. “Xalq qəzeti” milli birliyin və həmrəyliyin yaradılmasında, bu sahədə prioritetlərin tanıdılmasında da xeyirxah fəaliyyəti ilə seçilir.
“Xalq qəzeti”nin rəsmi bir nəşr kimi səhifələrində xalqımız bu gününü görür, 90 illik keçmişimizə və arzuladığı sabaha baxa bilir. Bütün bunlara görə biz kənarda yaşayan azərbaycanlılar bu qəzetin əlamətdar yubileyini ümumxalq bayramı hesab edir, sevincimizi qəzetin kollektivinin təntənəsinə qatırıq. Qoy xalqımız var olduqca “Xalq qəzeti” də yaşasın, gərəkli sözü ilə Vətənimizə xidmətini davam etdirsin.
Abdulla ABDULLAYEV
Xalq qəzeti.-2009.-29 avqust.-S. 2.