“Xalq qəzeti” redaksiyasının yaradıcı kollektivinə

Əziz dostlar! Sizi Azərbaycan mətbuatı tarixində özünəməxsus yer tutan “Xalq qəzeti”nin 90 illik yubileyi münasibəti ilə ürəkdən təbrik edir, hamınıza uzun ömür, möhkəm can sağlığı, yeni-yeni yaradıcılıq uğurları arzu edirəm.

Bu gün Azərbaycandakı qəzet bolluğunda mənim üçün “Xalq qəzeti”nin xüsusi yeri və əhəmiyyəti var. Çünki adı dəyişsə də, xalqa bağlılıq, milli dəyərlərimizə sədaqət, obyektivlik və peşəkarlıq xüsusiyyətləri, ən əsası isə yaradıcılıq üslubu dəyişməz qalmış bu qəzetlə məni az qala yarım əsrlik “dostluq əlaqələri” bağlayır. Mənim üçün ikiqat sevindirici haldır ki, bu gün “Xalq qəzeti” müstəqil Azərbaycan dövlətçiliyinin və ölkəmizdə gedən genişmiqyaslı quruculuq işlərinin salnaməçisinə çevrilmişdir. “Xalq qəzeti”nin 90 illik yubileyi təkcə qəzetin yaradıcı kollektivi üçün deyil, onun çoxsaylı oxucuları üçün də əlamətdar hadisədir.

“Xalq qəzeti” nəşr edildiyi illər ərzində zəngin sənətkarlıq təcrübəsi toplamış, xalqımızın maarifləndirilməsində, respublikamızın ictimai-siyasi, sosial-iqtisadi həyatında baş verən yeniliklərin işıqlandırılmasında mühüm rol oynamışdır. Ölkəmizdə baş verən ictimai-siyasi proseslərə münasibətdə daim hadisələrə obyektiv baxışını qorumağa cəhd göstərmiş bu qəzet oxucuların rəğbətini qazanmışdır. “Xalq qəzeti” ən ağır sınaqlar dövründə də həmişə xalqımızla bir yerdə olmuş, onunla birlikdə böyük inkişaf yolu keçmişdir. Bir oxucu kimi deyə bilərəm ki, “Xalq qəzeti” müstəqil Azərbaycanın mətbuat orqanları arasında dövlətçilik mövqeyinə, cəmiyyəti düşündürən mövzularda dərc etdiyi yazılarına görə daim seçilir.

Ölkəmizin neft sənayesi bu gün də 100 il əvvəl olduğu kimi, böyük yüksəliş dövrü keçirir. Bu yüksəlişin təməli xalqımızın ümummilli lideri Heydər Əliyevin müəllifi olduğu yeni neft strategiyasının həyata keçirilməsi ilə qoyulmuşdur. Ulu öndərin müəllifi olduğu inkişaf və tərəqqi strategiyası möhtərəm Prezidentimiz İlham Əliyevin rəhbərliyi altında ölkəmizə ilbəil yeni uğurlar qazandırır.

Azərbaycan Respublikası iqtisadi cəhətdən inkişaf etdikcə, ölkədə demokratik dəyərlər gün-gündən özünə daha möhkəm yer tutur. Bu dəyərlərdən ən vacibi olan müstəqil, güclü mətbuatın inkişafı daim dövlətimizin başçısı cənab İlham Əliyevin diqqət mərkəzindədir. “Xalq qəzeti” möhtərəm Prezidentimizin uğurla yürütdüyü səmərəli daxili və xarici siyasət kursunu daim dəstəkləyir və layiqincə təbliğ edir.

Əminəm ki, Azərbaycan neftçiləri ilə “Xalq qəzeti” arasında qurulmuş faydalı əməkdaşlıq münasibətləri qarşıdakı illərdə də uğurla davam edəcək, qəzet bundan sonra da Azərbaycan mətbuatında tutduğu öncül yeri qoruyub saxlayacaqdır. Arzum budur ki, “Xalq qəzeti”nin səhifələri hələ bundan sonra da uzun illər müstəqil Azərbaycanın əldə etdiyi nailiyyətlərdən və ölkəmizin daha böyük uğurlarından bəhs edən xəbərlərlə açılsın. Sizə bir daha uğurlar arzulayır, qələminiz iti olsun, — deyirəm.

Hörmətlə,

Xoşbəxt YUSİFZADƏ

Xalq qəzeti.-2009.-29 avqust.-S. 5.