Türk ordusunun Zəfər günü münasibətilə

Ulu öndər Heydər Əliyevin “bir millət-iki dövlət” adlandırdığı Azərbaycanla Türkiyə arasındakı dostluq və qardaşlıq münasibətlərinin inkişafına yaradıcı ziyalılarımız da öz töhfələrini verirlər. Respublikanın xalq artisti, Bakı Musiqi Akademiyasının professoru, görkəmli bəstəkar Tofiq Bakıxanov bu sahədə daha çox yaradıcılıq nümunələri ərsəyə gətirmiş sənətkarlarımızdandır.

Türk folklorunu və qardaş xalqın musiqi ənənələrini dərindən öyrənən bəstəkar 1967-ci ildən bəri türk musiqisi və Türkiyə mədəniyyəti mövzusunda onlarla əsər yazmışdır. Musiqi yaradıcılığının müxtəlif janrlarında qələmə alınan bu əsərlər Türkiyədə və Şimali Kipr Türk Cümhuriyyətində keçirilən çoxsaylı festivallarda səsləndirilmiş, ən məşhur sənətkarlar tərəfindən ifa edilmişdir. Bəstəkarın son əsəri Türkiyə mövzusunda olsa da, burada əsas məsələ qardaş xalqın folkloru və ya musiqi ənənələri deyil, tamamilə başqa mövzudadır.

Məlumdur ki, hər il avqustun 30-da Türkiyədə türk ordusunun Zəfər günü qeyd edilir. Tofiq Bakıxanovun bu günlərdə musiqisevərlərə təqdim etdiyi “Dünya durduqca yaşa” marşı da məhz “Zəfər günü”nün müəllifi, böyük sərkərdə və dövlət xadimi Mustafa Kamal Atatürkə həsr olunmuşdur. Türkiyə Cümhuriyyətinin Azərbaycandakı səfirliyinin əməkdaşı Nizami Zöhrabinin sözlərinə yazılmış bu marşı oxucularımıza təqdim edirik.

“Dünya durduqca yaşa”

Türk Cümhuriyyətinin qurucusu Mustafa Kamal Paşaya ithaf olunur

Sən Haqdan törəmisən,

Türkə Haqq kərəmisən.

Vermədin ömrü boşa,

Mustafa Kamal Paşa.

Nəqarət

Qurduğun Cumhuriyyət

Simgəsidir Türklüyün!

Türklüyünə dayanan

Qüdrətin, böyüklüyün!

Dar gündə zaman-zaman,

Xalqınla oldun haman

Əl-ələ, həm baş-başa,

Mustafa Kamal Paşa.

Nəqarət

Hər yerdə hörmət ilə,

Qurduğun dövlət ilə,

Çəkilir adın qoşu,

Mustafa Kamal Paşa.

Nəqarət

Keçsə də min il yenə

Deyəcək hər Türk sənə:

Durduqca dünya yaşa,

Mustafa Kamal Paşa.

Musiqisi — Tofiq Bakıxanovun

Sözləri — Nizami Zöhrabinindir

İttifaq Mirzəbəyli

Xalq qəzeti.-2009.-29 avqust.- S. 8.