Proqnoz tapşırıqlar artıqlaması ilə yerinə yetirilib

“Bakı Metropoliteni” hərəkət xidmətinin iqtisadçısı Aida Süleymanova bildirib ki, noyabr ayında metro ilə 15 milyon 550 min əvəzinə 18 milyon 550 min 700 sərnişin (güzəştli sərnişinlər bura daxil deyil) daşınıb ki, bu da proqnoz tapşırıqlara 119,3 faiz əməl etmək deməkdir. Bundan əlavə, noyabr ayında 412 min 400 güzəştli sərnişin metrodan istifadə edib.

İlin əvvəlindən indiyə kimi isə metro ilə 155 milyon 100 min əvəzinə 176 milyon 87 min 900 sərnişin daşınıb ki, bu da proqnoza 114 faiz əməl etmək deməkdir. Bundan başqa, ilin əvvəlindən indiyədək 4 milyon 440 min 100 güzəştli sərnişin metrodan istifadə edib.

Metro stansiyalarının artması və sərnişinlərin çoxalması ilə əlaqədar qatarların sayı da artırılıb. Belə ki, əvvəllər 24 qatar işləyirdisə, indi onların sayı 30-a çatdırılıb.

Qəzənfər QASIMOV

Xalq qəzeti.-2008.-5 dekabr.- S.7.