Dinamik iqtisadi inkişaf ölkəmizə daha böyük uğurlar gətirəcək

Azərbaycan sosial-iqtisadi inkişafının yeni mərhələsini yaşayır. Bu mərhələ cənab İlham Əliyevin xalq tərəfindən yenidən böyük etimad göstərilərək Prezident vəzifəsinə seçilməsi ilə başlayır. Bu mərhələdə ölkəmizin daha da qüdrətlənməsi naminə daha genişmiqyaslı tədbirlər, tikinti-quruculuq işləri, nəhəng layihələr həyata keçiriləcəkdir. Bu mərhələnin mənzərəsini Prezident İlham Əliyev andiçmə mərasimində belə ifadə etmişdir: “...Azərbaycan xalqını əmin etmək istəyirəm ki, bundan sonra da Vətənimizin uğurlu inkişafı üçün, Azərbaycanın çiçəklənməsi üçün mən əlimdən gələni əsirgəməyəcəyəm, Azərbaycan xalqına bundan sonra da xidmət edəcəyəm”.

Dövlət başçısı İlham Əliyevin xalqın dəstəyilə yenidən Prezident seçilməsinin əsasında beş il ərzində sosial-iqtisadi sahələrdə əldə edilən uğurlar dayanır. Belə ki, həmin müddətdə Azərbaycan bölgədə öz mövqelərini daha da gücləndirmiş, müstəqilliyini möhkəmləndirmişdir. Dövlət quruculuğu prosesi sürətlənmişdir. Siyasi və iqtisadi islahatlar uğurla aparılmışdır.

İqtisadi göstəricilərlə əlaqədar Prezident İlham Əliyev andiçmə mərasimində demişdir: “Son dörd il ərzində Azərbaycan dünya miqyasında iqtisadi artım sürətinə görə birinci ölkədir. Son dörd il ərzində iqtisadi artım, yəni ümumi daxili məhsulun artımı baxımından bizdən yuxarı ölkə olmamışdır. Bu, böyük nailiyyətdir. Bütövlükdə, beş il ərzində Azərbaycan iqtisadiyyatı, Azərbaycanda ümumi daxili məhsul 2,7 dəfə artmışdır. Mən deyə bilərəm ki, dünya miqyasında bu, görünməmiş bir nəticədir...”.

Son beş ilin digər iqtisadi göstəriciləri də uğurludur. Məsələn, bu ilin yekunlarına görə, adambaşına düşən ümumi daxili məhsulun təxminən 6 min dollar təşkil edəcəyi proqnozlaşdırılır. Sənaye istehsalında da yüksək artım müşahidə olunur. Beş ildə bu sahədə istehsal 2,7 dəfə artmışdır. Dövlət büdcəsinin səviyyəsi ildən-ilə yüksəlmişdir. Əgər 2003-cü ildə dövlət büdcəsi 1,2 milyard dollar təşkil edirdisə, bu il icmal büdcə 15 milyard dollara bərabərdir. Valyuta ehtiyatları da böyük həcmdə artmışdır. 2003-cü ildə Azərbaycanın valyuta ehtiyatları 1,6 milyard dollar səviyyəsində idi. 2008-ci ilin oktyabr ayına olan məlumata görə isə bu göstərici 17 milyard dollar təşkil edir. Gələn illərdə bu məbləğ artacaqdır. Son beş il ərzində Azərbaycan iqtisadiyyatına 44 milyard dollar sərmayə qoyulmuşdur. Bu isə bütün müstəqillik dövründə qoyulan sərmayələrin 77 faizini təşkil edir. Bu barədə Prezident İlham Əliyev andiçmə mərasimində demişdir: “...Azərbaycan həm xarici investorlar üçün cəlbedici ölkə kimi maraq doğurur, həm də çox şadam ki, Azərbaycana böyük həcmdə daxili investisiyalar qoyulur. Burada, əlbəttə ki, dövlət investisiyalarının payı daha çoxdur, ancaq özəl, yerli şirkətlərin qoyduğu sərmayə də mühüm rol oynayır. Bu, çox vacibdir. Çünki bu, ölkəmizin inkişafına, Azərbaycanda güclü sahibkarlıq sinfinin yaranmasına xidmət göstərəcəkdir. Orta sinfin yaranması artıq reallıqdır və Azərbaycanın bundan sonrakı illərdə hərtərəfli inkişafı bu amillərlə ölçüləcəkdir”.

Kənd təsərrüfatının inkişafına da xüsusi diqqət yetirilmişdir. Aqrar sahənin texnika və gübrələrlə təchizatına mühüm əhəmiyyət verilmişdir. Bunun üçün “Aqrolizinq” SC yaradılmış, onun tabeliyindəki aqroservislərin fəaliyyəti gücləndirilmişdir. Son beş il ərzində ölkəyə dövlət xətti ilə 7 min kənd təsərrüfatı texnikası gətirilmiş, texnika parkları yeniləşdirilmişdir. Məhz bütün bu tədbirlərin nəticəsidir ki, 2008-ci ildə kənd təsərrüfatı istehsalı 8,3 faiz artmışdır.

Məcburi köçkünlərə göstərilən qayğı barədə də bir neçə kəlmə qeyd etmək yerinə düşər. Son beş il ərzində dövlət başçımız yurd-yuvalarından didərgin düşən insanlarla dəfələrlə görüşmüş, onların problemlərinə həssaslıqla yanaşmış, çətinliklərin aradan qaldırılması üçün müvafiq qurumlara konkret tapşırıqlar vermiş, icrasını diqqət mərkəzində saxlamışdır. Bununla əlaqədar dövlət başçımızın fikirlərinə diqqət yetirək: “...Mən məcburi köçkünlərlə çoxsaylı görüşlər zamanı onların problemlərinin həlli üçün səylərimi göstərmişəm, onlara söz vermişdim. Söz vermişdim ki, bir dənə də çadır şəhərciyi qalmayacaq və bu gün Azərbaycanda bir dənə də çadır şəhərciyi yoxdur. 2004-cü ildə qəbul edilmiş məcburi köçkünlərin yaşayış səviyyəsinin yaxşılaşdırılması və məşğulluğun artırılması Dövlət Proqramının uğurlu icrası bizim niyyətimizi, bizim siyasətimizi göstərir. 2007-ci ildə proqrama əlavələr edildi, əlavə vəsait nəzərdə tutulur. Son beş il ərzində 12 çadır şəhərciyi ləğv edilmişdir. Onların əvəzinə müasir binalar, müasir qəsəbələr salınmışdır. 36 yeni qəsəbə salınmış, onlarda 47 min nəfər məcburi köçkün məskunlaşdırılmışdır. Bu qəsəbələrdə 34 məktəb, 24 tibb məntəqəsi tikilib və insanların yaşaması üçün lazım olan digər tədbirlər görülübdür. Son beş il ərzində bu məqsədlər üçün 1 milyard dollar xərclənib, proqrama əlavələr hesabına əlavə minimum 500 milyon dollar xərclənəcəkdir. Bu vəsait də Azərbaycan Dövlət Neft Fondunun hesabına, Azərbaycan dövlətinin hesabına və yenə də deyirəm, Heydər Əliyevin neft siyasətinin hesabına yaradılır. Əgər bu, olmasaydı, əgər Bakı—Tbilisi—Ceyhan neft kəməri işə düşməsəydi Neft Fondunda pul olmazdı, heç Neft Fondu da olmazdı”.

Prezident İlham Əliyev ötən beş il ərzində xalqımızın ən yaralı yeri olan Ermənistan- Azərbaycan, Dağlıq Qarabağ münaqişəsinin həll edilməsi, doğma torpaqlarımızın geri qaytarılması sahəsində də uğurlu siyasət aparmışdır. Dövlət başçımız Dağlıq Qarabağın əzəli Azərbaycan torpağı olduğunu, onun heç vaxt Ermənistanın tərkibinə qatılmayacağını və Azərbaycanın daxilində ikinci bir erməni dövlətinin yaranmayacağını bəyan etmişdir. Etiraf olunmalıdır ki, cənab İlham Əliyev erməni millətçilərini danılmaz faktlarla yerində oturtmağa qadir nüfuzlu söz sahibidir.

Son beş ildə Azərbaycanın hərbi qüdrəti güclənmişdir. Bu, əlbəttə, mövcud sahəyə diqqət və qayğının nəticəsidir, büdcədən bu sahəyə ayrılan xərclərin getdikcə artırılması ilə əlaqədardır. Bir faktı deyim: 2003-cü ildə Azərbaycanın ümumi hərbi xərcləri 163 milyon dollar olmuşdur. 2008-ci ildə isə 1 milyard 850 milyon dollar təşkil edir.

Prezident İlham Əliyev hərbi sahəyə göstərilən bu diqqətin təsadüfi olmadığını belə əsaslandırmışdır: “...Bunun nə demək olduğunu hamı yaxşı başa düşür. Əminəm ki, bizim torpaqlarımızı işğal edən Ermənistan yaxşı başa düşür və daha da yaxşı başa düşməlidir. Onlar hərbi xərclərə imkan daxilində vəsait ayıra bilərlər. Biz isə istədiyimiz qədər”.

Bütün yuxarıda qısaca qeyd edilənlər deməyə əsas verir ki, xalqımız dövlət başçısı İlham Əliyev ideyalarına, varisliyə sədaqətli olduğunu onun real fəaliyyətində görmüş, buna görə də ikinci müddətə Azərbaycan Prezidenti seçilməsi üçün yekdilliklə səs vermişdir.

Vaqif BAYRAMOV.

Xalq qəzeti.-2008.- 6 dekabr.-S.1.