Heydər Əliyev Azərbaycanın idman

nailiyyətlərini beynəlxalq səviyyəyə qaldırdı

Azərbaycanın müstəqilliyini qoruyub saxlayan, möhkəmləndirən, əbədi edən ümummilli lider Heydər Əliyevin ölkəmizin bütün sahələr üzrə inkişaf yoluna qədəm qoymasında xidmətləri əvəzsizdir. İndi müstəqil Azərbaycanın dünya miqyasında böyük nüfuza malik olması, mövqelərinin getdikcə möhkəmlənməsi məhz ulu öndərin uzaqgörən daxili və xarici siyasətinin nəticəsidir.

Müstəqilliyini yeni qazandığı illərdə respublikamızın bütün sahələrində vəziyyət olduqca acınacaqlı idi. O dövrdə hakimiyyətdə olanlar ölkəni siyasi böhrandan çıxarmaq əvəzinə daha da gərginləşdirirdilər. Dövlət idarəçiliyində naşı olanların bir-birinin ardınca buraxdıqları kobud səhvlər müstəqil Azərbaycanı beynəlxalq aləmdən təcrid edirdi. Başı daxili münaqişələrə qarışmış dövlət məmurları ətraflarına qeyri-qanuni silahlı dəstələr toplayaraq yalnız özlərini və topladıqları var-dövləti qorumaqla məşğul idilər. Həyatımızın inkişafı, insanların sağlamlığı, xarici dövlətlərlə əlaqələrin yaradılmasında və inkişafında ən yaxşı vasitə olan idman da büsbütün unudulmuşdu. Hakimiyyətdə olanların idmana münasibəti son dərəcə aşağı səviyyədə idi. Onlar sanki unudurdular ki, idman dostluq və əməkdaşlıq sahəsində əlaqə yaratmaq üçün ən yaxşı siyasətdir.

Bədən tərbiyəsi və idmana laqeyd münasibət tanınmış idmançıların və məşqçilərin xarici ölkələrə üz tutmalarına gətirib çıxarırdı. Azərbaycanın adlı-sanlı idmançıları müxtəlif ölkələrin bayraqları altında yarışlara çıxır, məşqçilərimiz üçün doğma respublikamızda idmançı yetişdirməyə şərait yaradılmırdı. Məlumdur ki, Azərbaycan qədim idman tarixinə, ənənəsinə malik ölkələrdən biridir. İdmançılarımız həmişə İttifaq, Avropa və dünya miqyaslı turnirlərdə uğurla çıxış edərək fəxri kürsünün ən yüksək pilləsinə qalxıblar. Bunu yüksək dəyərləndirən Heydər Əliyev çıxışlarının birində demişdi: “Xalqımız, millətimiz genetik xüsusiyyətlərinə görə fiziki cəhətdən sağlam insanlardan ibarət olan xalqdır, millətdir. Fiziki sağlamlıq və fiziki güc, mənəvi sağlamlıqla bərabər Azərbaycan xalqına, millətinə xas olan xüsusiyyətdir. Amma bu xüsusiyyət həmişə bizim daxilimizdə qalıbdır. Keçmiş dövrlərdə də, əsrlərdən - əsrlərə pəhləvanlarımız da, güləşçilərimiz də, oxatanlarımız da, fiziki imkanlarını cürbəcür oyunlarda nümayiş etdirənlərimiz də olubdur. Ancaq məlum olan səbəblərə görə bunlar yalnız öz ölkəmizin çərçivəsində qalıb, dünya miqyasına çıxmayıbdır”.

Müstəqilliyimizin ilk illərində bədən tərbiyəsi və idmana münasibət çox aşağı səviyyədə idi. İdman meydançaları və zalları, idman avadanlıqları baxımsızlıq ucbatından dağılıb məhv olmaq dərəcəsinə çatmışdı. Azərbaycanın ən böyük stadionu ayrı-ayrı adamlar arasında bölünərək, müxtəlif bazarlar, dükanlar, yeməkxanalar yaradılmışdı. Bu, idman həvəskarlarını hiddətləndirsə də heç nə etmək mümkün deyildi. Yalnız ulu öndərin yenidən hakimiyyətə qayıdışından, qətiyyətindən, idmanın inkişafına xüsusi diqqət göstərməsindən sonra qısa müddət ərzində stadionda təmizləmə işləri aparıldı və idmançıların ixtiyarına verildi.

Heydər Əliyev 1993-cü ildə yekdilliklə prezident seçildikdən az sonra Azərbaycanın tanınmış idmançılarını, qabaqcıl idman xadimlərini qəbul etdi. O, bütün problemlərlə yaxından tanış oldu. Bildirdi ki, idmançılar dövlətin xüsusi qayğısı ilə əhatə olunmalıdır. Çünki onlar beynəlxalq miqyasda ölkəmizin idman şərəfini qoruyur, Azərbaycanı dünya miqyasında tanıdır, bayrağımızı yüksəkliyə qaldırır, dövlət himnimizin səsləndirilməsinə nail olurlar. Ona görə də idmanın inkişafına geniş imkanlar yaradılmalıdır. İstedadlı, bacarıqlı idmançıların beynəlxalq turnirlərdə, olimpiya oyunlarında iştirakına şərait yaradılmasını başlıca vəzifələrdən biri kimi qarşıya qoydu.

Beynəlxalq yarışların Azərbaycanda keçirilməsi, bununla da ölkəmizin beynəlxalq aləmdə tanınması da vacib məsələlərdən biri kimi qeyd edildi. Bir il sonra– 1994-cü ildə isə Beynəlxalq Olimpiya Komitəsi, Milli Olimpiya Komitələri Assosiasiyası və Avropa Olimpiya Komitəsinin prezidentlərini Azərbaycanda qəbul etməklə ölkəmizdə olimpiya hərəkatının genişlənməsinə təkan verdi. Bir qədər sonra isə Azərbaycan Gənclər və İdman Nazirliyinin yaradılması haqqında sərəncam imzaladı. Bununla da gənclərin idmana cəlb olunması, yeni perspektivli idmançıların yetişdirilməsi üçün möhkəm baza yaradıldı. İdmanın inkişafını daim diqqətdə saxlayan ümummilli lider Əl oyunları sarayında idman oyunlarına baxış keçirilən zaman demişdi: “İndi müstəqil Azərbaycanda idmanın inkişafı, bədən tərbiyəsinin geniş yayılması üçün daha çox imkan yaradılmışdır. Bu imkanlardan Azərbaycan vətəndaşları səmərəli istifadə etməkdədirlər... Biz indi müstəqil bir dövlət kimi dünya miqyasında keçirilən bütün ictimai, mədəni, siyasi tədbirlərdə iştirak edirik və bu baxımdan, Azərbaycan idmançılarının müxtəlif beynəlxalq idman yarışlarında iştirak etməsi respublikamız üçün çox əhəmiyyətlidir”.

Yeni inkişaf mərhələsinə keçid dövrünə qədəm qoyulmasına baxmayaraq, müəyyən çətinliklər olsa da, idmanın inkişafı üçün tələb olunan vəsaitin ayrılmasında hər hansı problem yaranmırdı. O ərəfədə ölkəmizdə səfərdə olmuş Beynəlxalq Həvəskar Boks Assosiasiyasının prezidenti Ənvər Çoudrini qəbul edən ümummilli lider Azərbaycanda boksun vəziyyəti, onun inkişafı, perspektivləri barədə ətraflı fikir mübadiləsi aparmışdır. Ə.Çoudri qısa vaxt ərzində idman sahəsində görülmüş işləri, inkişafı yüksək qiymətləndirmiş və boksun inkişafı üçün əlindən gələni əsirgəməyəcəyini bildirmişdi.

Azərbaycan boksçularının Avropa, Dünya və Olimpiya oyunlarında fəxri kürsünün ən yüksək pillələrinə yüksəlmələri, Azərbaycan bayrağının bütün dövlətlərin bayraqlarından yüksəyə qaldırmaları və Dövlət himnimizin səsləndirilməsi ulu öndərin idmana hədsiz qayğısının təzahürü idi. Onu da qeyd edim ki, Sidney oyunlarına beş lisenziya qazanan boksçularımız ölkənin idman şərəfini ləyaqətlə qorudular və ilk olimpiya medalını qazandılar. Ümummilli lider respublikada idmanın, Olimpiya hərəkatının ən böyük pərəstişkarı və təbliğatçısı idi. Ən böyük nailiyyət də Sidneydə keçirilən XXVII Yay Olimpiya Oyunlarında qazanıldı. İdmançılarımız iki qızıl və bir bürünc medal qazanaraq 199 ölkə arasında Azərbaycanı 34-cü pilləyə qaldırdılar. İdmançılarımızı daha da ruhlandıran, onların qələbədən-qələbəyə can atmalarına mənəvi ruh verən ulu öndər olimpiyaçıları qəbul edərək sevinclə, qürurla dedi: “Siz bizə sevinc gətirmisiniz. Siz bizim xalqımızda böyük ruh yüksəkliyi yaratmısınız. Siz Azərbaycan xalqının, Azərbaycan övladlarının nəyə qadir olduğunu bütün dünyaya nümayiş etdirmisiniz. Sizə bir daha təşəkkür edirəm. Sizi bir daha təbrik edirəm”.

Ümumiyyətlə, ulu öndərin qayğısı sayəsində Azərbaycan idmançıları adlı-sanlı idman yarışlarında 1019 medal qazanıblar. Bu, çox böyük nailiyyətdir.

1997-ci ildə cənab İlham Əliyev Milli Olimpiya Komitəsinin prezidenti seçildikdən sonra Azərbaycan idmanında əsaslı dönüşün bünövrəsi qoyuldu. Dünya və Avropa çempionatlarının və turnirlərinin Bakıda keçirilməsinə start verildi. Məhz cənab İlham Əliyevin təşəbbüsü ilə ölkəmizdə Olimpiya idman komplekslərinin tikintisinə başlandı. Hazırda bu iş uğurla davam etdirilir. İndi respublikamızın müxtəlif regionlarında, hətta cəbhə bölgələrində də beynəlxalq standartlara uyğun Olimpiya idman kompleksləri tikilib istifadəyə verilmişdir. Ağdam rayonundan sonra Füzuli rayonunda da belə bir kompleksin tikintisi planlaşdırılıb.

Ən müasir idman ləvazimatları ilə təchiz olunmuş, beynəlxalq standartlara uyğun Olimpiya idman komplekslərinin tikintisi Azərbaycanda idmana olan marağı daha da artırdı. Dünyanın ən mötəbər yarışlarının Bakıda keçirilməsi bir daha təsdiqləyir ki, Azərbaycan idman sahəsində qazandığı müvəffəqiyyətlərə görə artıq dünya miqyasında sayılıb-seçilən dövlətlərdəndir.

2016-cı ildə Olimpiya oyunlarının Azərbaycanda keçirilməsi barədə Azərbaycan Prezidenti, MOK-un prezidenti cənab İlham Əliyevin təşəbbüslə çıxış etməsi ölkəmizdə idmanın sürətlə inkişaf etməsindən xəbər verir. Bu gün dünyanın ən güclü idmançılarının Azərbaycan idmançılarından ehtiyat etməsi ümummilli liderin idmana olan diqqətinin və möhtərəm Prezidentimiz tərəfindən uğurla davam etdirilən siyasətin nəticəsidir. Möhtərəm Prezidentimiz idmanın inkişafını gənclərin gələcəyi, millətin gələcəyi üçün vacib hesab edərək deyib: “Bizim arzumuz budur ki, Azərbaycanın hər bir guşəsində idmanla məşğul olmaq üçün lazımi şərait yaradılsın. Biz istəyirik ki, Azərbaycanın hər gənci, hər bir uşağı idmanla məşğul olsun, öz fiziki hazırlığını yüksək səviyyəyə qaldıra bilsin. Bizə sağlam millət, sağlam xalq lazımdır”.

Ağacan ABİYEV,

Bədən Tərbiyəsi və İdman

Akademiyasının rektoru, professor,

MOK-un baş katibi,

Milli Məclisin deputatı

Xalq qəzeti.-2008.- 14 dekabr.- S.5.