Tələbələr əlil körpələrə sevinc bəxş etdilər

Azərbaycan Dövlət İqtisad Universitetinin tələbələri paytaxtın və ölkənin ictimai-siyasi həyatında daim fəal iştirak edirlər. Müxtəlif seçki kampaniyalarında, gənclərlə bağlı elmi-texniki, idman və mədəni tədbirlərdə, bayram və əlamətdar günlərdə təşəbbüskarlıqla çıxış edən tələbələr qayğıya ehtiyacı olan soydaşlarımızı da unutmurlar. 2008-ci ilin başa çatması ərəfəsində, Əlillər günü və Qurban bayramı münasibəti ilə keçirilmiş mərhəmət xarakterli tədbir də bunu aydın göstərdi.

Əmtəəşünaslıq fakültəsinin 408-1-ci qrupunun tələbələri Yeni il ərəfəsində paytaxtın Nizami rayonundakı kar uşaqlar üçün 3 saylı xüsusi internat məktəbində təhsil alan əlil körpələrin qonağı oldular. Direktor Bahar Kərimova bu qəbildən olan uşaqlara dövlətin göstərdiyi qayğıdan, paytaxt ictimiyyətinin fiziki cəhətdən qüsurlu olan uşaqları tək qoymadığından danışdı. 333 uşağın oxuduğu məktəbdə yüksək səliqə-sahman var idi.

Tələbə Gənclər Təşkilatının sədr müavini Mirəli Mahmudov qrup yoldaşları Rəşad, Anar, Vaqif, Orxan və Vüqarın köməyi ilə gətirdikləri müxtəlif hədiyyə və sovqatları uşaqlara payladılar. Direktor müavinləri Günay Ağayeva və Sevda Rzayeva xüsusi qayğıya ehtiyacı olan körpələrlə işin yüksək səviyyədə təşkil edildiyindən söz açdılar. Biz internat məktəbində olanda əlil uşaqlar (bir növbədə 118 nəfər idilər) nahar edirdilər. Ona görə də tələbələrdən Günel Atakişiyeva, Günel Məlikzadə, Pərviz və Xalid cəmi bir neçə dəqiqəliyə kar uşaqların müəllimlərinin köməkçisinə çevrildilər. Təqvim ilinin başa çatması ərəfəsində irəli sürdüyümüz bu təşəbbüs və mərhəmət tədbiri fakültə dekanlığı tərəfindən yüksək qiymətləndirildi.

Natiq QAÇAYEV,

ADİU-nun tələbəsi

Xalq qəzeti.-2008.-14 dekabr.- S.6.