“Təhlükəsiz iş yeri – layiqli əmək” müsabiqəsinə yekun vuruldu

“Kənd — Qida — İş” Həmkarlar İttifaqı İcraiyyə Komitəsinin 23 iyul 2008-ci il tarixli qərarı ilə cari ilin iyul-noyabr aylarında “Təhlükəsiz iş yeri — layiqli əmək” adı altında sahə baxış müsabiqəsi keçirilmişdir. Sahə Həmkarlar İttifaqının 20-dən çox müəssisə və təşkilatının iştirak etdiyi müsabiqədə əsas məqsəd müəssisə və təşkilatlarda əməyin mühafizəsi üzrə qanunvericiliyə və qaydalara əməl edilməsinə ictimai nəzarəti gücləndirmək, işləyənlərin sağlam və təhlükəsiz əmək şəraiti hüquqlarının tam həyata keçirilməsinə kömək göstərmək idi.

Dekabrın 16-da Kənd Təsərrüfatı və Qida Sənayesi İşçiləri Həmkarlar İttifaqı Federasiyasının növbəti IV məclisi keçirilmişdir. Məclisi giriş sözü ilə açan Kənd və Qida Sənayesi İşçiləri Həmkarlar İttifaqı Federasiyasının sədri Tofiq Quliyev 2008-ci ildə istehsalatda əməyin mühafizəsi, bədbəxt hadisələrin və zədələnmələrin qarşısının alınması sahəsində görülən işlər, eləcə də qarşıda duran vəzifələr barədə geniş məruzə ilə çıxış etdi.

Sonra sədrin müavini Təhmasib Əliyev çıxış edərək ölkəmizdə orta və kiçik sahibkarlığa, fermerlərin, kənd təsərrüfatı istehsalçılarının fəaliyyətinə əməli dəstək verildiyi və əlverişli şərait yaradıldığı kimi, həmkarlar təşkilatlarının fəaliyyəti üçün də geniş imkanlar yaradıldığını dedi. Sahə Həmkarlar İttifaqı Tovuz Rayon Komitəsinin sədri Sahib Abdullayev, “Azərsun Holdinq” MMC sədri Turan Əliyev, Sahə Həmkarlar İttifaqı Abşeron Rayon Komitəsinin sədri Ədalət Nağıyeva, Hidrogeoloji Meliorativ Xidmət İdarəsinin Həmkarlar İttifaqı Komitəsinin sədri İlqar Namazov, sahə Həmkarlar İttifaqı Qazax Rayon Komitəsinin sədri Fərhad Qocamanov öz çıxışlarında ilin yekunları, görülən işlər və qarşıda duran vəzifələrdən söz açdılar. Tədbirin sonunda müsabiqədə qalib gələn dörd müəssisənin adı açıqlandı və onlara – “Azərsun Holdinq” Şirkətlər qrupu üzrə Qafqaz Metal Qablaşdırma Sənaye MMC-yə, Qafqaz Kağız Sənaye MMC-yə, Azərsun Ticarət və Dağıtım MMC-yə, həmçinin “Gilan holdinq” Şirkətlər qrupu üzrə “Gilan Qəbələ” konserv zavodu MMC-yə Federasiyanın I dərəcəli diplomu və qiymətli hədiyyələr təqdim olundu.

Qaliblər bildirdilər ki, bundan sonra da çalışdıqları sahələrdə təhlükəsizlik qaydalarına əməl edilməsi və əmək hüquqlarının qorunması üçün bütün imkanlardan səmərəli istifadə edəcəklər.

Rafiq SALMANOV

Xalq qəzeti.-2008.-17 dekabr.- S.7.