Açıq turnirin qalibi

Bakının Nizami rayonundakı 145 saylı məktəbin 8-ci sinif şagirdi Əli Əsgərov bu günlərdə keçirilmiş yeniyetmələr arasında cüdo üzrə açıq turniri uzun müddət unutmayacaq. “Lokomotiv” cəmiyyətinin yetirməsi Səbail Rayon Gənclər və İdman İdarəsinin Bakı şəhərindəki 9 saylı UGİM-lə birgə təşkil etdiyi və Dünya Azərbaycanlılarının Həmrəyliyi Gününə həsr olunan yarışda dörd dəfə tatami üzərinə çıxmış və hər dəfə də rəqiblərinə inamla qalib gələrək birinci yerin sevincini yaşamışdır.

Ən başlıcası isə cüdonun incəliklərinə məşqçi Xalid Abbasovun rəhbərliyi altında yiyələnən Əli bütün qələbələrini ippon fəndi ilə qazanmışdır. Görünür, o da bir çox yaşıdları kimi məşhur həmyerlisi, XXIX Yay Olimpiya Oyunlarının çempionu Elnur Məmmədlinin Pekin Olimpiadasında çıxışlarını diqqətlə izləmiş və onun ifasında dünyanı heyran qoyan ippon fəndini yaxşı öyrənmişdir. Axı, Elnurun həmin unudulmaz uğurundan sonra ölkəmizdə idmanın bu növünə maraq daha da artmış, cüdoda hələ ilk addımlarını atan yeniyetmələr çempion həmvətənləri kimi mahir usta olmaq arzusu ilə yaşamağa başlamışlar.

Açıq turnirin iştirakçıları üç yaş qrupunda yarışmışlar. Əli 1995-ci il təvəllüdlü cüdoçularla görüşlərdə 55 kq-dan yuxarı çəki dərəcəsində yaxşı hazırlıq nümayiş etdirmişdir. Onun bütün dörd görüşdə ippon fəndi ilə qalib gəlməsi çox şeydən xəbər verir.

Onu da qeyd edək ki, indiki qələbə artıq üç ildir cüdo ilə məşğul olan 13 yaşlı Əli Əsgərovun ilk müvəffəqiyyəti deyil. O, ötən il Qurban bayramına həsr olunmuş turnirdə, Bakı şəhərinin açıq birinciliyində də fəxri kürsünün ən yüksək pilləsinə qalxmış və daha bir neçə yarışda mükafatçılar sırasında yer tutmuşdur. Qarşıda isə yeni turnirlər durur.

Oqtay BAYRAMOV

Xalq qəzeti.-2008.-17 dekabr.- S.8.