Qətər Azərbaycanın ərazi bütövlüyünün

bərpa edilməsini qətiyyətlə dəstəkləyir

“Ölkələrimiz arasında dostluq və qardaşlıq münasibətlərinin tarixi qədim olsa da bu münasibətlər Qətər dövlətinin əmiri əlahəzrət Şeyx Həməd bin Xəlifə Al Tani və onun Azərbaycandakı dostu-qardaşı, cənab Prezident İlham Əliyevin səyləri nəticəsində bu gün yüksək bir səviyyəyə qalxmışdır. Dövlət başçıları ölkələrarası dostluğun və əməkdaşlığın daim inkişaf etdirilməsi və genişləndirilməsi üçün çox mühüm addımlar atmışlar. Mən bu gün azərbaycanlı dostlarım qarşısında fəxrlə deyə bilərəm ki, işğalçılığı, separatçılığı və terrorçuluğu daim pisləyən, bu əməllərə qarşı mübarizə aparan Qətər dövləti üzv olduğu bütün beynəlxalq təşkilatların tribunasından Azərbaycanın mövqeyini müdafiə etmiş, bu dövlətin ərazi bütövlüyünün bərpa edilməsinin zəruriliyini bildirmişdir”.

Bu fikirləri Qətər dövlətinin milli bayramı münasibəti ilə Bakıda keçirilmiş tədbirdə fövqəladə və səlahiyyətli səfir Mübarək bin Fəhd Cəsim əl-Səni söylədi. Səfir qeyd etdi ki, Azərbaycan Prezidenti cənab İlham Əliyevin 2004-cü ilin noyabr-dekabr aylarında Qətərdə rəsmi səfərdə olması, ikitərəfli əməkdaşlığın müxtəlif sahələrini əhatə edən mühüm sənədlərin imzalanması və sonrakı görüş və müzakirələr Azərbaycan — Qətər dostluq və əməkdaşlıq münasibətlərini yüksək səviyyəyə qaldırmışdır.

Milli Məclis sədrinin müavini Valeh Ələsgərov turizm, mədəniyyət, iqtisadiyyat, ticarət və elmi-texniki sahələrdə Azərbaycan — Qətər əməkdaşlığının daha da genişləndirilməsi üçün böyük potensial olduğunu söylədi.

Natiq qeyd etdi ki, Yaxın və Orta Şərqin coğrafiyaca kiçik, lakin çox zəngin və nüfuzlu dövlətlərindən olan Qətərin daim Azərbaycanın mövqelərini dəstəkləməsi ölkəmizdə hörmət və ehtiramla, beynəlxalq aləmdə isə maraq və diqqətlə qarşılanır: “Dövlət başçılarının şəxsi dostluq münasibətləri Bakı — Doha əməkdaşlığını daha da genişləndirəcəkdir”.

Tədbirdə Milli Məclisin və hökumətin üzvləri, Azərbaycanda akkreditasiya olunmuş səfirlər, paytaxt ictimaiyyətinin nümayəndələri və KİV təmsilçiləri iştirak edirdilər.

İttifaq MİRZƏBƏYLİ

Xalq qəzeti.-2008.-20 dekabr.- S.3.