Xaricdəki soydaşlarımız müstəqil Azərbaycanın inkişafından qürur və iftixar hissi ilə söz açırlar

Ulu öndər Heydər Əliyevin siyasi kursunun mühüm tərkib hissələrindən olan xaricdə yaşayan soydaşlarımızla əlaqələrin genişləndirilməsi, diaspor quruculuğunun sürətləndirilməsi öz yüksək nəticələrini verməkdədir. Artıq müstəqil Azərbaycanın paytaxtı iki dəfə dünya azərbaycanlılarının ən ali məclisinə – qurultaya ev sahibliyi etmişdir. Prezident İlham Əliyevin təşəbbüsü və bilavasitə iştirakı ilə keçirilmiş II qurultay (16 mart, 2006-cı il) Azərbaycan diasporunun tarixində yeni bir mərhələnin başlanğıcı idi.
Zaman bütün dövlətlərdən və xalqlardan inkişafın növbəti mərhələsini təmin etmək üçün daha konkret addımlar və daha mütəşəkkil fəaliyyət tələb edir. Dünya Azərbaycanlılarının II qurultayında yaradılmış Əlaqələndirmə Şurasının İdarə Heyətinin diaspor fəallarımızın iştirakı ilə Bakıda özünün növbəti iclasını keçirməsi də bu baxımdan əhəmiyyətli idi. Həm tədbir iştirakçıları, həm də bu iclasa qatılmayan soydaşlarımız Əlaqələndirmə Şurasının sonuncu iclasında müzakirə edilmiş məsələləri, qarşıda duran vəzifələrin icrası üçün müəyyən edilmiş qərar və layihələri böyük məmnunluqla qarşılamışlar.
Qazaxıstanın Kustanay şəhərində yaşayan iş adamı, soydaşımız Azad Qaçayevin fikirləri də bu barədədir:
— Əslində “10 il, 15 il əvvələ qədər xarici ölkələrdə Azərbaycan diasporu yox idi” — deyənlər bir qədər haqlıdırlar. Çünki xaricdə yaşayan azərbaycanlılar olsa da, onların mütəşəkkil təşkilatları yox idi. Bu işi ulu öndərimiz Heydər Əliyev başladı və uğurla davam etdirdi. Son beş ildə isə Azərbaycanın indiki Prezidenti, cənab İlham Əliyev diaspor təşkilatlarımızın daha da qüdrətlənməsi üçün çox mühüm bir addım atdı: Azərbaycan və türk diaspor təşkilatlarının fəaliyyətini əlaqələndirmək və onları daha da qüdrətli etmək. Cənab İlham Əliyev bu variantdan hələ Azərbaycan Milli Məclisinin Avropa Şurası Parlament Assambleyasındakı daimi nümayəndə heyətinin rəhbəri olarkən istifadə etmiş və qurumun sənədlərində Ermənistanın işğalçı dövlət kimi tanınmasına nail olmuşdu. Ona görə də indi dünyanın bütün ölkələrində bu tezis – Azərbaycan və türk diasporlarının fəaliyyətinin əlaqələndirilməsi tezisi uğurla həyata keçirilir. Doğrudur, Qazaxıstanda buna o qədər də ehtiyac yoxdur. Çünki biz qazaxlarla eyni soydan, eyni kökdənik. Ancaq Avropa ölkələrində bu məsələ çox böyük əhəmiyyət kəsb edir.

Dekabrın 18-də Bakıda keçirilmiş iclasdan əvvəl öyrənmişdim ki, beynəlxalq aləmdəki Azərbaycan və türk diaspor təşkilatları öz fəaliyyətlərini əlaqələndirməklə yanaşı müxtəlif ölkələrdəki yəhudi icmaları ilə də geniş iş birliyinə nail olublar. Bakıda keçirilən iclasda isə bu faktın rəsmi şəkildə elan edilməsini eşitdim və məmnun oldum. Məlumatda bildirilirdi ki, iclasda Şuranın 27 ölkədə yaşayan üzvləri, habelə dünyanın 17 ölkəsindən Şura üzvü olmayan nüfuzlu Azərbaycan icma və birliklərinin rəhbərləri, türk və yəhudi icmalarının təmsilçiləri iştirak ediblər. Bu, çox yaxşı haldır. Son məqsədə, Azərbaycan dövlətinin qüdrətləndirilməsinə xidmət edən istənilən addım alqışlanmalıdır.

Bu gün bizi ruhlandıran, hər birimizin qəlbində qürur və iftixar hissləri yaradan əsas məsələ müstəqil Azərbaycanın hərtərəfli inkişafıdır. Azərbaycanın adını istənilən siyahıda öndə görəndə istər-istəməz deyirik: – Can, Azərbaycan!

Qələmə aldı: İttifaq MİRZƏBƏYLİ

Xalq qəzeti.-2008.-21 dekabr.-S.2.