Nəğmələrdə yaşayan Şəhriyar

“Salam olsun şövkətizə, elizə,

Mənim də bir adım gəlsin dilizə”.

XX əsr Azərbaycan poeziyasının güney qolunu yüksək zirvəyə qaldırmış Məmmədhüseyn Şəhriyarın dillər əzbəri olan bu sözləri unudulmaz şairə xalq ehtiramının, onun sənət irsinə soydaşlarımızın sonsuz sevgisinin ifadəsi kimi səslənməkdədir. Almaniyada yaşayan azərbaycanlıların bu misraların çağırışı ilə təşkil etdikləri və şairin xatirəsinə həsr olunmuş silsilə konsertlərdə tanınmış sənətkarlar Şəhriyar şeirlərinə bəstələnmiş nəğmələri və onun qəzəlləri əsasında muğamlarımızı ifa etmişlər.

Azərbaycan Dövlət Akademik Opera və Balet Teatrının səhnəsində bu nəğməli xatirə estrafetini populyar ifaçı, respublikanın əməkdar artisti Gülüstan Əliyeva və güneyli soydaşımız Fəraməz Gərmrudi davam etdirdilər. Hər iki sənətçi ölməz şairin poeziyasına sevgilərini könülləri riqqətə gətirən, şəhriyarsevərləri coşduran muğam və mahnı nömrələri ilə ifadə etdi. Şəhriyarın qəzəlləri və mahnı bəstələnmiş şeirləri salona toplaşmış o tay-bu taylı soydaşlarımızı şairin könül dünyasına qovuşdurdu, onun solmaz sənət gülşənini musiqinin qanadlarında yüksəklərə çaldırdı.

Xatirə konsertində Gülüstan Əliyeva və Fəraməz Gərmrudi Şəhriyar kimi sənətkarları yetirən xalqın yaratdığı el nəğmələrini də səsləndirdilər, duetlər oxudular. Şəhriyar sənəti və sevgisi həmin axşam müxtəlif ünvanlı soydaşlarımızı mənən yaxınlaşdırdı, doğmalaşdırdı. Ulu Vətənimizin hər iki tayını təmsil edən xanəndələrin mahir ifalarının qiyməti olan alqışlar Şəhriyar ruhuna ərməğan oldu.

Respublikanın xalq artisti Teymur Göyçəyevin idarəsi ilə Qara Qarayev adına kamera orkestrinin müşayəti, əməkdar artistlər Malik Mansurovun tarda və Elşən Mansurovun kamanda, sənətçilər Şirzad Fətəliyevin balabanda, Kamran Kərimovun nağarada şövqlü ifaları konsertin ümumi uğurunu təmin etdi. Musiqiləri kamera orkestri, xanəndə və xalq çalğı alətləri üçün bəstəkar-pianoçu Ceyhun Allahverdiyev işləmişdi. Konsertdən sonra hər iki xanəndədən qısa müsahibələr aldıq. Gülüstan Əliyeva dedi:

— İndiyədək müxtəlif mövzulu çox konsertlərim, çıxışlarım olub. Şəhriyarın xatirəsinə həsr olunmuş konsertlər silsiləsində sənət dostum Fəraməz bəylə çıxışıma daha ciddi hazırlaşdım. Bu konsert 50 milyonluq xalqımıza bir sənət hesabatı, sevimli şairimiz Şəhriyarın adına layiq musiqi səsləndirmək şansı idi. Fəraməz bəylə bir səhnədə çıxışım sənət bioqrafiyama zənginlik gətirdi.

Fəraməz Gərmrudi isə təəssuratını belə ifadə etdi:

— Həyatımın çox unudulmaz bir gününü yaşadım. Mənim babamın məzarı Bibiheybətdədir. Özüm güneydə doğulmuşam, Tehranda yaşamışam. Bu axşam babamın uyuduğu bu taya, Şəhriyar sevgisi ilə böyüdüyüm o taya övladlıq borcumu verməyə çalışdım. Mənə elə gəlir ki, belə konsertlər ayrı düşmüş soydaşlarımızı ana dilimizin və milli musiqimizin cazibəsi ilə bir araya gətirir, azərbaycançılıq duyğusunu yüksəldir.

Tahir AYDINOĞLU

Xalq qəzeti.-2008.-23 dekabr.- S.7.