Samuxda daha qışdan qorxmurlar

Elə ki qış gəlirdi Samuxun necə deyərlər, qara günləri başlanırdı. Qaz yox, işıq yox, yollar palçıq. Adamların əhval-ruhiyyəsi də tamam bambaşqa. Kimi dindirirdin, məişət problemlərindən danışırdı, gileylənirdi. Özü də bu cür acınacaqlı vəziyyət təkcə Samuxun kəndlərində deyil, hətta rayonun mərkəzində də hökm sürürdü. Əslində artıq şəhər statusu alan rayon mərkəzi o zamanlar həmin kəndlərdən heç nəyi ilə fərqlənmirdi.

Aradan çox vaxt keçməyib. Rayon icra hakimiyyəti başçısının birinci müavini Tahir Qarayevlə rayon mərkəzinin küçələrindən keçirik. Hamar asfalt yollar, səliqəli səkilər diqqətimi cəlb edir. İnanmaq olmur ki, həmin palçıqlı-çirkli, tozlu-torpaqlı küçələrdir. Sulu qar yağmasına, şaxta olmasına baxmayaraq bir dənə də evin bacasından tüstü çıxmır.

–İndi hər bir kəsin evində qazı, işığı var, odun sobası kimin nəyinə gərəkdir,– deyə T.Qarayev rayonun kənd və qəsəbələrinin qazlaşdırılmasından söhbət açır. Tahir müəllim deyir ki, rayon icra hakimiyyəti hələ iyul, avqust aylarında kəndlərdə sorğular aparıb, sakinlərin demək olar ki, hər biri ilə görüşüb, onların problemlərini öyrənib. Xüsusilə payız-qış aylarında yarana biləcək çətinliklər götür-qoy edilib. Vaxtında görülmüş tədbirlər öz müsbət səmərəsini verib. Rayon icra hakimiyyətinin başçısı V.Hacıyev bir sıra nazirlik və şirkətlərin rəhbərləri ilə müntəzəm əlaqə saxlayıb, lazımi köməkliklər göstərilməsini xahiş edib. Sağ olsunlar, Samuxun problemlərinə heç biri biganə qalmayıb. Bax elə bunun nəticəsidir ki, qışın oğlan çağında Samuxda adamların əhval-ruhiyyəsi çox yüksəkdir. Samuxlular onlara belə gözəl şərait yaratdığı üçün ölkə başçısı İlham Əliyevə hədsiz minnətdarlıqlarını hər an bildirirlər. Təsadüfi deyil ki, 15 oktyabr prezident seçkiləri günü Samuxda yüksək siyasi fəallıq müşahidə olunurdu.

Şamuxda qışa hazırlığa hələ bir neçə ay əvvəl başlanması indi öz müsbət nəticəsini göstərib. Buna həm sakinlərlə, həm də ayrı-ayrı təsərrüfat rəhbərləri ilə görüşüb söhbət etdikdən sonra bir daha əmin olduq. Rayon qaz istismar idarəsinin rəisi R.Hüseynov dedi ki, hələ bu ilin yanvarında Tatlı, Zazalı və Qiyaslı kəndlərində qaz təminatı bərpa edilmişdir. İyunun 19-da rayonun Alıuşağı kəndi də təbii qazla təmin olunmuş, burada texniki baxış keçirilmiş, kənddaxili qaz xətlərində təmir işləri aparılaraq 230 ədəd məişət qaz sayğacı quraşdırılmışdır. Qonşu Şəmkir rayonunun Qasım İsmayılov kəndi də idarənin gücü ilə bu ilin iyun ayında təbii qaz ala bilmişdir. Samuxun Qara-arx kəndindən həmin kəndə diametri 225 mm, uzunluğu 3200 metr olan yeraltı polietilen boru çəkilmişdir. Qara-arx kəndinin özünün daxili qaz xətləri bərpa edilmiş və kənd daxilində olan 2 ədəd QTŞ təftiş edilərək 71 ədəd qaz sayğacı quraşdırılmış və beləliklə, 2008-ci ilin sentyabrında kəndin qaz təminatı bərpa edilmişdir.

Rayonun Nəbiağalı qəsəbəsində qaçqınlar üçün yeni salınmış yaşayış massivinə də diametri 63 mm olan boru vasitəsilə uzunluğu 1800 metr olan qaz xətti çəkilmiş və bu ilin mayında sakinlər mavi yanacaqla təmin olunmuşlar.

Rayonun Çobanabdallı, Kolayır, Sərkar, Lək kəndlərində və İnstitut qəsəbəsində yeni salınmış yaşayış massivlərinə də təbii qaz xətti çəkilmiş, qaz sayğacları quraşdırılmışdır. İndi sakinlər heç bir əziyyət çəkmirlər.

Qarabağlar kəndinin qaz təminatını daha da yaxşılaşdırmaq üçün dairəvi birləşmə quraşdırılmış və hazırda kənd təbii qazla tam təmin olunmuşdur.

Yaxın günlərdə, yəni Yeni il ərəfəsində rayonun Seyidlər, Sarıqamış və Qədilli kəndlərinin sakinləri də sevinəcəklər.

Rayon elektrik şəbəkəsinin kollektivi də soyuq günlərdə işıq problemlərinin yaranmaması üçün bütün qüvvəsini səfərbərliyə almışdır. İl ərzində istehlakçılara fasiləsiz, dayanıqlı enerji vermək üçün indiyədək ərazinin müxtəlif yerlərində 7,35 kilometr uzunluğunda 0,4 kilovoltluq, 10,9 kilometr uzunluğunda 10 kilovoltluq hava xətləri əsaslı təmir olunmuşdur. Bundan əlavə istismara yararsız 67 ədəd dayaq dəyişdirilmiş, müxtəlif gücə malik 13 ədəd transformator təmir olunmuşdur.

Rayonun mənzil-kommunal təsərrüfat-istehsalat birliyinin əməkçiləri də qışa yaxşı hazırlaşmışlar. Hələ xeyli əvvəl birliyə məxsus traktor və yükünü özüboşaldan avtomaşınlar təmir olunaraq hazır vəziyyətə gətirilmişdir. Samux şəhəri, İnstitut və Qarayeri qəsəbələrinin daxili yollarının buz örtüyünün əridilməsi üçün duz-qum qarışığı tədarük olunmuşdur. Park və xiyabanlarda, o cümlədən Heydər Əliyev parkında bütün mövsümi işlər başa çatdırılmış, ağaclara don suyu vurulması və digər işlər üçün tədbirlər görülmüşdür. Yol idarəsi ilə birgə tədbirlər planı hazırlanmış, işçilər lazımi alətlərlə, xüsusi geyimlə təmin olunmuşlar. Birliyin xidmət etdiyi ümumi yaşayış binalarının istilik sistemləri işə salınmış və yanacaq problemləri həll edilmişdir.

Sulu qarı lopa qar əvəz edir. Binalar, ağaclar ağ örpəyə bürünür, qayğısız məktəb şagirdləri fasilə vaxtı bir-birlərini qar “atəşinə” tuturlar. Hamı deyir, gülür, sevinir. Bir vaxtlar qarın yağmasından qanları qaralanlar indi uşaq kimi sevinirlər. Çünki bilirlər ki, qar onlara bərəkət, bol ruzi gətirəcək. Bax buna görə də Samuxda daha qışdan qorxmurlar.

Hamlet QASIMOV

Xalq qəzeti.-2008.-24 dekabr.-S.6.