Lənkəranda bayram sevincləri

Təqvimdə qışın oğlan çağı olsa da, Lənkəran həmişəki kimi “istiqanlı”, güllü-çiçəklidir. Son günlər bura yolu düşən hər kəs özünü əsl festival şəhərindəki kimi hiss edir. Oynaq işıqlarla haşiyələnən şəkilli vitrinlər, gəlin kimi bəzədilmiş həmişəyaşıl küknarlar, uşaq təki, “atılıb-düşən” fəvvarələr, ağacdan-ağaca, dirəkdən-dirəyə çəkilmiş əlvan bayraqlar şəhərin üzünü güldürür. Şirin ləhcəli lənkəranlıların təbəssüm dolu çöhrələri də şəhərin əsl bayram ovqatından soraq verir. Burada 31 dekabr — Dünya Azərbaycanlılarının Həmrəylik Gününə və Yeni ilin gəlişinə hazırlıq qibtəediləndir.

Mərkəzi meydanda — Heydər Əliyev xatirə parkında iri bir küknar ağacına işıqlı oyuncaqlarla elə bəzəklər vurulub ki, deyirsən yaşıl libaslı, daş-qaşlı, zər-zibalı bir gözəldir. Yenidən qurulmuş bu park lənkəranlıların sevimli istirahət yerinə çevrilib.

...Xalq sənətkarlığı şəhərciyində düzənlənən “Çay bayramı” Lənkəranın özünəməxsus etno-mədəni səviyyəsini layiqincə göstərdi. İştirakçılar bayram şirniyyatından daddılar, hərəyə bir stəkan ətirli Lənkəran çayı içdilər və qayım-qədim folklor örnəklərini həvəslə seyr elədilər.

...Qala xiyabanı yenidən qurulub. Suda fırlanan qlobuslar, memarlıq abidələrinin maketləri diqqət çəkir. Xiyabanda qoyulmuş kiçik abidələr Lənkəranın ağsaqqal ziyalılarına hörmətin təzahürüdür. Heykəllərin konkret adamları xatırlatması rəmzi xarakter daşıyır. Burada rastlaşdığım qocaman müəllim Mirhaşım Talışlı sevincini məmnuniyyətlə dilə gətirdi:

— Sağ olsun Prezidentimiz İlham Əliyev! Onun qayğısı ilə bölgələrimiz bax, beləcə inkişaf edib! Həyatımız daha da gözəlləşib! Mən Lənkəran Dövlət Universitetinin dosentiyəm. Prezident təqaüdü alıram. Xoşbəxtəm. Dünyanın elə paytaxt şəhərləri var ki, Lənkəran onlardan daha gözəldir. Eşq olsun bu gözəlliyi yaradanlara, qoruyanlara, artıranlara! İcra başçımız Süleyman Mikayılov çox zövqlü, çalışqan və qayğıkeş rəhbərdir. Onun fəaliyyəti sayəsində rayonumuz xeyli abadlaşıb. Qış qayğılarımız azalıb. Elə buna görə də camaat bu gün sözün əsl mənasında bayram ovqatındadır. Qoy, illərimiz beləcə bir-birindən uğurlu gəlib keçsin!

...Lənkəran şəhərinin dəmiryol vağzalı meydanında keçirilmiş Yeni il satış-yarmarkası bayram ərəfəsində lap yerinə düşdü. Mən hələ ötən il Novruz bayramı ərəfəsində burda təşkil olunmuş yarmarkadan qəzetimiz üçün reportaj hazırlamış, adını da “Könüllər şadlandı bu səxavətdən” qoymuşdum. Bu dəfə də sakinlər bayram süfrələri üçün ucuz qiymətə çeşidli təamlar alıb dolu zənbillərlə evlərinə dönmək imkanı əldə etdilər. Könülləri yenidən şadlandı.

...Osman Mirzəyev adına qarışıq tipli uşaq evində keçirilən Yeni il şənliyi burada tərbiyə alan balaca soydaşlarımızın yadından, yəqin ki, hələm-hələm çıxmayacaq. Rayonun rəhbərliyi, qonaqlar onları öz balaları kimi öpüb-əzizlədilər, hədiyyələrlə sevindirdilər. Uşaqlar çevrələrinin heç vaxt boş qalmadığından necə də məmnun idilər!

..."Sultan" şadlıq sarayında təşkil edilən şənlik də hər kəsə unudulmuz təsir bağışladı. Ötən il Rusiya Prezidenti Dmitri Medvedevin Bakıda iki “Şöhrət” ordeni təqdim etdiyi BVM veteranı Ağadadaş Səmədov tədbirə dövlətimizin ona bağışladığı təzə minik avtomobilində gəlmişdi.

— Əvvəlcə ulu öndər Heydər Əliyevin və iki dəfə Sovet İttifaqı Qəhrəmanı Həzi Aslanovun abidəsini ziyarət elədim — deyə o, bildirdi. — Ümummilli lider müstəqil Azərbaycanın memarı və qurucusu, əbədiyyət simvolumuzdur. Həzi Aslanov da mərdlik rəmzimizdir. Sonra bura gəldim. Biz qocalara, veteranlara böyük diqqət göstərilir. Bundan çox razıyam. Qoy, Azərbaycan hər zaman beləcə çiçəklənsin, dünyanın lider dövlətlərindən olsun! Balalarımız qan-qada görməsin! Mən inanıram ki, ilk növbədə sürətlə artan iqtisadi qüdrətimizlə düşməni diz çökdürəcək və Qarabağımızı geri alacağıq.

Lənkəranda son illər çox iş görülüb. Rayonun sosial-iqtisadi inkişafı göz önündədir. Müasir infrastruktur formalaşıb. Hər tərəf gözəl, səliqəli, abaddır. Gələn il və sonrakı illərdə bu zəfər yürüşü daha da qətiyyətlə davam edəcək. Həyat daha da gözəlləşəcək. Bayram tədbirlərinin nikbin ab-havası bu inamı daha da artırır.

Mən Lənkəranı tərk edəndə axşam düşürdü. Burada yaşayıb-yaradan qələm dostlarım Sərraf Talıblı və Ağaddin Babayevlə şəhərin küçələrini “piano dilləri kimi çalan” yağışdan, gur işıqlardan əməlli-başlı duyğulanmışdıq. Sərraf dedi:

— Görürsən, Lənkəran gündüz də, axşam da əlvan tabloya bənzəyir. Baxdıqca baxmaq istəyirsən.

Ağaddinsə doğma şəhərin bu unudulmaz axşam mənzərəsindən heyranlığını şeirlə ifadə elədi:

Nur selində yuyunur

Şəhərim başdan-başa,

Şəfəqlər damla-damla

Qonur torpağa-daşa,

Əfsanəmi, nağılmı?

Tamaşadır, tamaşa

Lənkəran axşamları...

Mən yerinə düşən bu misralarda bir yağış alliterasiyası olduğunu söylədim.

“İstiqanlı” cənub şəhərinə ötən həftə çoxlu qar düşmüşdü. Bu həftə yağış yağdı. Bəs, gələn həftə hava necə olacaq? Hər bir halda Lənkəran yenə də nur selində yuyunacaq, aydınlıq içində olacaq.

Əli NƏCƏFXANLI

Xalq qəzeti.-2008.-30 dekabr.- S.13.