Zaqatalada bayram tədbirləri

“Gənclər günü” ilə əlaqədar rayonda geniş tədbirlər keçirilib

Mərasim iştirakçıları ilk öncə Azərbaycan xalqının ümummilli lideri Heydər Əliyevin adını daşıyan parka gələrək ulu öndərin abidə kompleksini ziyarət edərək, önünə əklil və tər çiçəklər düzüblər.

Sonra isə Dombabinə kəndində daxili imkanlar hesabına yeni inşa olunan güləş zalının açılışı mərasimi olub. Rəmzi qırmızı lent kəsildikdən sonra tədbir iştirakçıları burada yaradılan şəraitlə yaxından tanış olublar. Qısa müddət ərzində müasir standartlara uyğun tikilib istifadəyə verilən güləş zalında 150 oturacaq yeri və yeni avadanlıqlar quraşdırılıb.

Daha sonra rayon Olimpiya idman kompleksində ümumrayon tədbiri keçirildi. İlk öncə tədbir iştirakçıları rayon gənclərinin əl işləri və rəsm əsərlərindən ibarət sərgiyə baxdılar.

Bayram tədbirinin əvvəlində Azərbaycan Respublikasının dövlət bayrağı təntənəli şəkildə salona gətirildi. Rəqs kollektivlərinin təqdim etdikləri maraqlı kompozisiyalar, habelə gənc əsgər və idmançıların əlbəyaxa döyüş, güləş, karate və digər növlər üzrə nümunəvi çıxışları buraya toplaşanlarda xoş ovqat yaratdı.

Sonra tədbirdə Zaqatala idmançılarının 2008-ci ildə qazandıqları uğurlardan, rayonda bu sahənin inkişafına yönələn tədbirlərdən bəhs edən film nümayiş etdirildi.

Əlamətdar gün münasibəti ilə gəncləri təbrik edən Zaqatala Rayon İcra Hakimiyyətinin başçısı Asif Əsgərov XX əsrin sonunda dövlət müstəqiliyini bərpa etmiş Azərbaycan Respublikasında gənclərlə iş sahəsində yaranmış boşluğun ümummilli liderimiz Heydər Əliyevin ikinci dəfə hakimiyyətə qayıdışından sonra aradan qaldırıldığını, düz 10 il əvvəl ulu öndərimizin imzaladığı sərəncamla fevral ayının 2-nin Azərbaycanda Gənclər Günü kimi təqvimə salındığını, müstəqil Azərbaycan cənclərinin ilk dəfə 1996-cı ilin həmin günü Heydər Əliyevin təşəbbüsü ilə keçirilən forumda bir araya gəldikləri xüsusi vurğulamışdır. Daha sonra natiq bu gün də gənclər siyasətinin Azərbaycan Respublikasının Prezidenti cənab İlham Əliyev tərəfindən uğurla davam etdirilərək mahiyyətcə və keyfiyyətcə yeni mərhələyə qədəm qoyduğunu, dövlət başçısının gəncləri aparıcı qüvvəyə çevirmək və onların sosial-iqtisadi problemlərinin həllini təmin etmək məqsədi ilə təsdiq etdiyi və 2005-2009-cu illəri əhatə edən “Azərbaycan Gəncliyi Dövlət Proqramı”nın bunun bariz nümunəsi olduğunu qeyd etdi.

Tədbirdə çıxış edən gənclər və idman nazirinin müavini İsmayıl İsmayılov və digər natiqlər gəncləri respublikamızda, o cümlədən Zaqatala rayonunda təhsil, səhiyyə, mədəniyyət, idman və digər sahələrin inkişafı üçün görülmüş bütün işlərə görə Azərbaycan Respublikasının Prezidenti, Milli Olimpiya Komitəsinin rəhbəri cənab İlham Əliyevə, Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban zanım Əliyevaya öz təşəkkürlərini bildirdilər və respublikamızın parlaq gələcəyi naminə fəaliyyətində möhtərəm Prezidentimizi daim dəstəkləyəcəklərini xüsusi qeyd etdilər.

Sonra 2008-ci ildə təhsil, səhiyyə, dövlət qulluğu, idman, mədəniyyət və digər sahələrdə cəmi 30 nominasiya üzrə yüksək nailiyyətlər qazanmış rayon gənclərinə qiymətli hədiyyələr, gənclər arasında dünya və Avropa çempionatlarının bürünc mükafatçısı Sərxan Əhmədov və gənclər arasında dünya çempionatının bürünc mükafatçısı Ramin Qurbanova isə Azərbaycan Respublikasının Prezidenti cənab İlham Əliyevin hədiyyəsi olan VAZ-2107 markalı avtomobil təqdim edildi. Onların məşqçilərinə “Samsunq” plazma ekranlı televizorlar verildi.

Cüdo üzrə Pekin Yay Olimpiadasının qəhrəmanı, “Şöhrət” ordenli Elnur Məmmədli, Pekin Yay Olimpiadasının bürünc mükafatçısı Mövlüd Mirəliyev, cüdo üzrə yığma komandanın baş məşqçisi, “Şöhrət” ordenli Ağayar Axundzadə də müxtəlif mükafatlara layiq görüldülər.

Bayram şənliyi respublikamızın incəsənət ustalarının geniş konsert proqramı ilə başa çatdı.

İ. MUSAOĞLU

Xalq qəzeti.-2009.-1 fevral.-S.6.