Avropa və Kanada Obamanın böhran əleyhinə planından narazıdır

Avropa Birliyi və Kanada Amerika iqtisadiyyatının xilası üzrə planın bəzi maddələrinin yersiz proteksionizmə gətirib çıxaracağından ehtiyat edirlər.

Onların fikrincə, “Amerika malları al” maddəsi antiböhran vəsaitləri hesabına maliyyələşdirilən layihələr üçün ABŞ-da istehsal olunan xammal və materiallardan istifadə olunmasını nəzərdə tutur. Avropa Birliyinin ABŞ-dakı səfiri bildirib ki, planın bu şəkildə qəbul olunması təhlükəli presedentdir və beynəlxalq ictimaiyyətin inamını sındıra bilər.

Artıq ABŞ Konqresinin Nümayəndələr Palatası tərəfindən bəyənilmiş antiböhran tədbirləri planı ölkə vergiödəyicilərinə 800 milyard dollara başa gələcək. Ağ evdən bildiriblər ki, avropalıların narazılığına səbəb olmuş maddə üzərində dəqiqləşdirmə aparılır. Ancaq vitse-prezident Cozef Bayden keçən həftə məsələyə bu cür yanaşmanın məqsədəuyğun olduğunu bildirmişdi.

Kanadanın ABŞ-dakı səfiri senatın liderlərinə məktub yazaraq qeyd edib ki, əgər ölkə məhz bu yolla getsə, “ABŞ başqalarından proteksionazimdən imtina tələb etmək haqqını itirəcək”.

Doğrudur, Amerika iqtisadiyyatının xilası üzrə proqram demokratların üstünlük təşkil etdiyi Nümayəndələr Palatasında maneəsiz qəbul olunub. Bununla belə, mümkündür ki, senatda respublikaçılar planın təsdiqi ilə bağlı proseduru xeyli ləngitsinlər. Bir çox yüksək vəzifəli respublikaçılar hesab edirlər ki, proteksionizm metodlarından istifadə ticarət müharibəsinə gətirib çıxara bilər.

Tədbirlər paketinə senatda bu həftə baxılacağı gözlənilir. Eyni zamanda, Prezident Barak Obama yaxın günlərdə respublikaçı Cadd Qreqqi ticarət naziri vəzifəsinə təyin edə bilər. Qreqq Respubilkaçılar Partiyasından prezidentin administrasiyasında yer almış üçüncü nümayəndədir. Analitiklər hesab edirlər ki, Prezident Obama bununla antiböhran tədbirlərinin senatdan keçməsi şansının artacağına ümid edir.

Dünən isə ABŞ Prezidenti konqresi xırda məsələlərlə bağlı diskussiya açmamağa və yanvarın 30-da təqdim olunmuş planın qəbulunu yubatmamağa çağırıb.

Paşa ƏMİRCANOV

Xalq qəzeti.-2009.-4 fevral.-S.6.