Yığmamız finalda

Qarşıdakı məsul yarışlara, o cümlədən mayda keçiriləcək dünya çempionatının seçmə oyunlarına hazırlaşan Azərbaycanın qadınlardan ibarət milli komandasının voleybolçuları bu günlər Dubayın qonağıdırlar. Faiq Qarayevin yetirmələri orada təşkil edilən beynəlxalq turnirin finalında oynayacaqlar.

Voleybolçularımız həlledici görüşdə turnirin qalibi adı uğrunda mübarizə aparmaq hüququnu italiyalı rəqibləri ilə oyunda qələbədən (3:1) sonra qazanmışlar.

Elə buradaca qeyd edək ki, Avropa Voleybol Konfederasiyasının “Çelenc kuboku” turnirində mübarizəni davam etdirən Bakının qadınlardan ibarət “Rabitə” klubunun dörddəbir finalda İspaniyanın Albasete şəhərinin eyniadlı komandasına qarşı keçirəcəyi ilk oyunun başlanma vaxtı da məlum olmuşdur. Rəqiblər fevralın 11-də Quba Olimpiya İdman Kompleksində meydana saat 17-də çıxacaqlar.

Oqtay BAYRAMOV

Xalq qəzeti.-2009.-4 fevral.-S.6.