Cari ildə dünya mobil telefon bazarı zəifləyə bilər

Bu barədə RİTN-nin mətbuat xidmətindən bildirmişlər. Məlumatda deyilir ki, dünya miqyasında mobil telefon bazarının həcmi 2009-cu ildə 9 faiz azalacaq.

Həmçinin bildirilir ki, bu proqnozları Strategy Analytics təşkilatı hazırlayıb. Belə ki, həmin proqnozlara əsasən, mobil bazarın həcminin azalması 2001-ci ildən sonrakı dövrdə ilk dəfə qeydə alınacaq. Bu ilin birinci yarısının sənaye sektoru üçün əsasən çətin olacağı gözlənilir ki, bu da ilk növbədə maliyyə böhranı nəticəsində ümumi istehlakçı tələbatının azalması ilə bağlıdır. İnkişaf etmiş bazarlarda da bu vaxt üçün adi olan satış həcminin enməsi müşahidə olunacaq.

Proqnozlara əsasən 2009-cu ildə dünya üzrə ümumilikdə 1,08 mlrd. ədəd mobil telefonun satılacağı gözlənilir. Ötən il isə bu rəqəm 1,18 mlrd. olub. 1983-cü ildə mobil sənaye yaranandan isə ümumilikdə satış həcminin azalması yalnız bir dəfə müşahidə olunub. 2001-ci ildə bazar həcminin ötən illə müqayisədə 6% azalması qeydə alınıb.

M.MÜKƏRRƏMOĞLU

Xalq qəzeti.-2009.-5 fevral.- S.7.