Bakı 2009-cu ildə İslam mədəniyyətinin paytaxtı elan edilmişdir

İSESKO-ya üzv dövlətlərin mədəniyyət nazirlərinin 21-23 noyabr 2007-ci il tarixində Liviyanın Tripoli şəhərində keçirilmiş beşinci konfransının nəticələrinə görə Bakı şəhəri 2009-cu ildə İslam mədəniyyətinin paytaxtı elan edilmişdir. Mədəniyyət və Turizm Nazirliyinin mətbuat xidməti bu münasibətlə keçiriləcək tədbirlərin vaxtını açıqlamışdır. Məlumatda deyilir ki, 2009-cu il fevral ayının 18-də Heydər Əliyev Sarayında “Bakı İslam mədəniyyətinin paytaxtı-2009” mədəniyyət ilinin təntənəli açılış mərasimi keçiriləcək. Tədbirə bir sıra Avropa və İslam dövlətlərinin şəhərlərinin merləri, eyni zamanda, mədəniyyət nazirləri dəvət edilmişdir. İSESKO-nun baş direktoru Əl-Tuveycri açılış mərasimində iştirak edəcəkdir.

Açılış mərasimi çərçivəsində fevralın 18-də və 19-da şəhərimizin mərkəzi meydanlarında şənliklər, “Bakı-İslam mədəniyyətinin paytaxtı-2009” vebsaytının və ”Qədim Bakı” kitabının təqdimatı keçiriləcək. Ümumiyyətlə, il ərzində mədəniyyət paytaxtı ili çərçivəsində yüzdən çox milli və beynəlxalq tədbirin keçirilməsi nəzərdə tutulur. Sonrakı tədbirlərlə bağlı əlavə məlumat veriləcəkdir.

Qeyd etmək lazımdır ki, 2008-ci ilin 2-3 dekabrında Bakıda Avropa Şurasına üzv dövlətlərin mədəniyyət nazirlərinin iştirakı ilə “Mədəniyyətlərarası dialoq Avropa və ona qonşu regionlarda sülhün və davamlı inkişafın əsasıdır” mövzusunda konfrans keçirilmişdir. Konfransın gedişində Bakı Bəyannaməsi qəbul edilmiş, iştirakçı dövlətlərin, eləcə də tərəfdaş dövlətlərin mədəniyyətlərarası dialoq sahəsində mədəni əməkdaşlığını və fəaliyyətlərinin əlaqələndirilməsinin inkişafını nəzərdə tutan “Bakı prosesi”nin əsası qoyulmuşdur.

Bu il həmçinin İslam ölkələrinin mədəniyyət nazirlərinin VI konfransı keçiriləcəkdir. Azərbaycan tərəfi ənənəsinə sadiq qalaraq “Bakı prosesi” çərçivəsində həmin konfransa bir sıra Avropa dövlətlərini də dəvət etməyi planlaşdırır.

M. MÜKƏRRƏMOĞLU

Xalq qəzeti.-2009.-8 fevral.-S.2.