Azərbaycan hökumətinin məruzəsi yüksək qiymətləndirilmişdir

Xarici İşlər Nazirliyinin mətbuat xidmətindən daxil olmuş məlumatda deyilir ki, fevralın 4-də Cenevrə şəhərində BMT Baş Məclisinin 2006-cı il 15 mart tarixli 60/251 saylı qətnaməsinə müvafiq olaraq İnsan Hüquqları Şurasının universal dövri icmal mexanizmi üzrə işçi qrupunun 4-cü sessiyası çərçivəsində dövlətlərin insan hüquqlarına dair öhdəliklərinin yerinə yetirilməsinin öyrənilməsi məqsədi ilə Azərbaycan Respublikasının milli məruzəsinə baxılmışdır.

Azərbaycan Prezidentinin 2009-cu il 13 yanvar tarixli sərəncamına uyğun olaraq, xarici işlər nazirinin müavini X.Xələfovun başçılıq etdiyi nümayəndə heyəti milli məruzənin təqdim edilməsində iştirak etmişdir.

Azərbaycan nümayəndə heyətinin başçısı X.Xələfov milli məruzənin təqdim edilməsi zamanı çıxış edərək sənədin hazırlanması ilə əlaqədar həyata keçirilmiş tədbirlər, ölkəmizdə insan hüquqlarının və əsas azadlıqlarının təmin olunması üçün yaradılmış hüquqi əsaslar, insan hüquqlarının və əsas azadlıqlarının təşviqinin möhkəmləndirilməsinə yönəldilmiş səylər barədə ətraflı məlumat vermiş, 2009-cu il martın 18-də keçiriləcək referendumun insan hüquqları və azadlıqlarının daha da möhkəmləndirilməsi və inkişafı baxımından əhəmiyyətini vurğulamışdır. Nümayəndə heyətinin başçısı Azərbaycanın insan hüquqlarının beynəlxalq səviyyədə müdafiəsi mexanizmlərində iştirakı, onların fəaliyyətinə töhfəsi, bu sahədə çalışan beynəlxalq təşkilatlarla sıx əməkdaşlığı barədə tədbir iştirakçılarını məlumatlandırmışdır.

Həmçinin X.Xələfov qanunvericiliyin təkmilləşdirilməsi, məhkəmə-hüquq, o cümlədən penitensiar sistemdə aparılan islahatlar və ölkəmizin iqtisadi nailiyyətlərindən danışmış, eyni zamanda, Heydər Əliyev Fondu tərəfindən sosial, təhsil, səhiyyə və mədəniyyət sahələrində həyata keçirilmiş proqram və layihələr barədə məlumat vermişdir.

Nümayəndə heyətinin başçısı Azərbaycan Respublikasının müstəqilliyinin bərpa edilməsindən indiyədək keçən qısa müddət ərzində insan hüquqlarının təmin edilməsi sahəsində əldə olunmuş irəliləyiş və nailiyyətlərlə yanaşı, Azərbaycanın qarşılaşdığı çətinliklər və problemlər barədə də danışmışdır.

Çıxışda Ermənistanın Azərbaycana qarşı davam edən təcavüzü, onun ağır nəticələri və Azərbaycan hökuməti tərəfindən qaçqın və məcburi köçkünlərin sosial vəziyyətinin yaxşılaşdırılması istiqamətində həyata keçirilən tədbirlərdən söhbət açılmışdır.

Müzakirələrdə iştirak edən dövlətlərin nümayəndələri Azərbaycan hökumətinin universal dövri icmal üzrə hazırladığı milli məruzəsini və onun müzakirələrə təqdim edilməsini, insan hüquqları və əsas azadlıqlarının təmin olunması istiqamətində qazanılmış nailiyyətləri və həyata keçirilən tədbirləri, bir sıra sahələrdə, xüsusilə də iqtisadi-sosial sahədə aparılan uğurlu islahatları yüksək qiymətləndirmişlər.

Daha sonra nümayəndə heyətinin başçısı və üzvləri digər dövlətlərin nümayəndələri tərəfindən məruzə üzrə verilən sualları və şərhləri ətraflı cavablandırmış, onlarla bağlı Azərbaycan Respublikasında görülmüş tədbirlər, atılmış addımlar və davamlı surətdə göstərilən səylərin mahiyyəti və nəticələri haqqında ətraflı şərhlər vermişlər.

Müzakirələr interaktiv dialoq formasında davam etmiş, Azərbaycan nümayəndə heyətinin başçısı X.Xələfovun yekun çıxışı ilə başa çatmışdır.

Fevralın 5-də Azərbaycan xarici işlər nazirinin müavini X.Xələfov BMT-nin insan hüquqları üzrə yeni seçilmiş Ali Komissarı xanım Navanethem Pillay ilə görüşmüşdür.

Görüşdə tərəflər Azərbaycan Respublikası hökuməti ilə İnsan Hüquqları üzrə Ali Komissarlığın ofisi arasında hazırkı əməkdaşlıq səviyyəsindən razılıqlarını bildirmiş, əməkdaşlığın istiqamətləri və perspektivləri ətrafında geniş fikir mübadiləsi aparmışlar. Xanım Ali Komissar Azərbaycan tərəfindən insan hüquqları sahəsində həyata keçirilən islahatları və görülən kompleks tədbirləri müsbət qiymətləndirmişdir.

Xarici işlər nazirinin müavini ölkədə aparılan islahatlar, insan hüquqları və əsas azadlıqlarının təmin olunması sahəsində həyata keçirilən tədbirlər, Ermənistanın Azərbaycana qarşı hərbi təcavüzü və onun nəticəsində insan hüquqlarının kobud və kütləvi pozuntusunun qurbanı olmuş qaçqın və məcburi köçkünlər, o cümlədən itkin düşmüş və girov götürülmüş insanlar barədə həmsöhbətinə məlumat vermişdir.

Səfər çərçivəsində fevralın 6-da X.Xələfov BMT-nin Qaçqınlar üzrə Ali Komissarı Antonio Guteres ilə görüşmüşdür.

Görüşdə Ali Komissar Azərbaycan Respublikası hökumətinin qaçqın və məcburi köçkünlərin hüquqlarının təmin olunmasına yönəlmiş siyasətini yüksək qiymətləndirmiş və onların vəziyyətinin yaxşılaşdırılmasının, əhəmiyyətli sayda olan hissəsinin çadır şəhərciklərindən yeni salınmış qəsəbələrə köçürülməsinin digər ölkələr üçün nümunə olduğunu qeyd etmişdir.

Azərbaycan Respublikası hökuməti ilə BMT-nin Qaçqınlar üzrə Ali Komissarlığı arasında əməkdaşlıq istiqamətləri, qaçqın və məcburi köçkünlərin sosial problemlərinin həllinə beynəlxalq donorların cəlb olunmasında Ali Komissarlığın rolu, qaçqın və məcburi köçkünlər üçün yeni salınmış şəhərciklərdə təhsil, məşğulluq, səhiyyə sahəsində Azərbaycan hökuməti və BMT-nin Qaçqınlar üzrə Ali Komissarlığı tərəfindən birgə layihələrin işlənib hazırlanması, Ermənistan-Azərbaycan, Dağlıq Qarabağ münaqişəsinin həlli, qaçqın və məcburi köçkünlərin öz doğma yurdlarına qayıtması məsələləri ətrafında geniş fikir mübadiləsi aparılmışdır.

Xalq qəzeti.-2009.-8 fevral.-S.2.