ABŞ və Rusiya rəsmiləri arasında ilk görüş

Bu iki dövlət qarşılıqlı əməkdaşlıq məsələlərini nizama salmağa hazırdır. Rusiya Baş nazirinin birinci müavini Sergey İvanov ABŞ-ın Rusiya ilə münasibətləri normallaşdırmaq barədəki niyyətlərini çox müsbət addım kimi alqışlayıb. İvanov Birləşmiş Ştatların yeni vitse-prezidenti Cozef Baydenlə bazar günü Almaniyada Münhen təhlükəsizlik konfransında görüşüb.

Bundan bir gün əvvəl isə Bayden konfransda ölkəsinin xarici siyasətinin prioritetləri haqqında çıxış etmiş, Rusiya-NATO münasibətlərində olduqca təhlükəli vəziyyətin yarandığını bildirmişdi. Qeyd edək ki, bu, Prezident Barak Obamanın bu ilin yanvarında and içməsindən bəri ABŞ və Rusiyanın yüksək vəzifəli nümayəndələri arasında ilk görüşdür.

Baydenlə görüşdən sonra Rusiya baş nazirinin müavini bəyan edib ki, danışıqlar maraqlı keçib və ABŞ tərəfi Rusiya ilə əməkdaşlığı davam etdirmək niyyətindədir. “ABŞ administrasiyasından Rusiya ilə qarşılıqlı maraq kəsb edən bütün məsələlər üzrə dialoqu bərpa etmək barədə maraqlı siqnal aldıq və bu təklifi qəbul etdik” - deyə Sergey İvanov “Röyter” agentliyinə müsahibəsində bildirib. Onun sözlərinə görə, ABŞ və Rusiyanın yeni liderləri ikitərəfli münasibətlər məsələsinə yeni nəzərlə baxmaq əzmindədirlər.

Xatırladaq ki, Bayden özünün proqram xarakterli çıxışında Şimali Atlantika İttifaqının Rusiya ilə əməkdaşlıq məsələsində bir çox sahələrə yenidən baxmalı olduğunu söyləmişdi. O, eyni zamanda nəzərə çatdırmışdı ki, gələcək münasibətlərdə fikir ayrılıqları da olacaq. NATO-nun genişlənməsi ilə bağlı perspektivlərə toxunan Bayden İvanovla görüşdən əvvəl bəyan etmişdi ki, NATO-ya daxil olub-olmamaq məsələsini Gürcüstan özü həll etməlidir. Rəsmi Moskva isə keçmiş sovet respublikalarının NATO-ya qəbuluna qəti etiraz edir.

Baydenin sözlərinə görə, ABŞ və Rusiya bütün məsələlərdə razılığa gələ bilməz. “Ancaq bu iki ölkə ayrı-ayrılıqda öz fikrində qalsa da, maraqlarımızın üst-üstə düşdüyü sahələrdə birgə işləyə bilərik. Bizim maraqlarımız isə çox sahələrdə üst-üstə düşür”. ABŞ- ın vitse-prezidenti onu da əlavə edib ki, ölkəsi Mərkəzi Avropada RƏM sistemləri yerləşdirmək planından əl çəkməyəcək.

İvanov isə Münhendə keçirdiyi mətbuat konfransında müddəti bu il dekabrın 5-də başa çatacaq strateji hücum silahlarının ixtisarı barədə SNV-1 əvəzinə yeni SNV-2 müqaviləsinin imzalanması məsələsi üzərində xüsusilə dayanıb. “Düşünürəm ki, bununla bağlı hansısa xüsusi mexanizm yaradılmalıdır və Amerika tərəfi buna hazır olan kimi kifayət qədər tez və aktiv danışıqlara başlamaq mümkün olacaq. İndi isə saatlar söndürülüb, sayğaclar işləmir. Bu ilin 5 dekabrına da lap az vaxt qalır. Bizə, əlbəttə, istər ixtisar, istərsə nəzarət və s. məsələlər üzrə yeni mexanizm yaratmaq lazımdır” – deyə İvanov qeyd edib.

Rusiya hökuməti rəsmisinin sözlərinə görə, Rusiya Əfqanıstanda vəziyyətin nizamlanması üçün bu məsələdə maraqlı olan istənilən tərəflə əməkdaşlıq etməyə hazırdır.

Bu günlərdə ABŞ Dövlət Departamenti mətbuat katibinin vəzifəsini icra edən Qordon Duqud da bəyan edib ki, Vaşinqton silahların ixtisarı istiqamətində Rusiya ilə ciddi danışıqlara hazırdır. “Əgər biz yeni müqaviləyə malik olmaq istəyiriksə, o, tezliklə hazırlanmalı, müddəti başa çatmaqda olan SNV-ni əvəz etməyə qabil olmalıdır” – deyə ABŞ nümayəndəsi bildirib.

Paşa ƏMİRCANOV

Xalq qəzeti.-2009.-10 fevral.-S.6.