Abşeron Rayon Əhalinin Sosial Müdafiə Mərkəzi mükafatlandırıldı

Azərbaycan Həmkarlar İttifaqı Konfederasiyasının 15 illiyinə həsr olunmuş və “Mənim həyatım, mənim işim, mənim təhlükəsiz əməyim” devizi ilə keçirilmiş respublika baxış-müsabiqəsinə yekun vurulmuşdur. Müsabiqənin əsas məqsədi işçilər üçün əlverişli, sağlam şərait yaradılan kollektivlərin seçilməsi və mükafatlandırılmasıdır. Nəticələrə görə, müsabiqədə iştirak edən 116 təşkilatın 35-i birinci, 50-si isə ikinci yerə çıxmışdır. Qaliblər arasında Əmək və Əhalinin Sosial Müdafiəsi Nazirliyinin Abşeron rayon şöbəsi də var. Şöbə qazandığı uğurlara görə dövlət idarə, ictimai xidmət işçiləri həmkarlar ittifaqının diplomuna layiq görülmüş və “Samsunq” markalı televizorla mükafatlandırılmışdır.

Bu məqsədlə fevralın 10-da Abşeron rayon Sosial Müdafiə Mərkəzində tədbir keçirildi. Dövlət idarə, ictimai xidmət işçiləri həmkarlar ittifaqının sədr müavini Aida Əliyeva bildirdi ki, əhalinin daha çox diqqət və qayğıya ehtiyacı olan təbəqəsi — təqaüdçülərlə işləyən təşkilatın fəaliyyəti qənaətbəxş olduğundan Əmək və Əhalinin Sosial Müdafiəsi Nazirliyinin və Abşeron Rayon İcra Hakimiyyətinin diqqətini çəkmiş, razılığını qazanmışdır. Hazırda şöbənin yeni və müasir tipli, hər cür şəraitlə təmin olunmuş inzibati binası kollektivin ixtiyarındadır.

Əvvəlki inzibati binada iş şəraitinin dözülməz həddə olması da heç kimin yadından çıxmayıb və iş əmsalına göstərdiyi mənfi təsir danılmazdır. İndi isə bütün xoşagəlməz hallar arxada qalıb. Mərkəzin müdiri Ələkbər Ələkbərzadənin qeyd etdiyi kimi, son illər Abşeron rayonunda aparılan geniş miqyaslı abadlıq-quruculuq işləri, rayon icra hakimiyyətinin başçısı Zakir Fərəcovun rəhbərliyi ilə həyata keçirilən tədbirlər öz bəhrəsini verməkdədir. Mərkəzin müdiri dedi: “Məsəl var, deyərlər ki, görünən kəndə bələdçi lazım deyil. Bizim üçün yaradılmış şərait də, bizim işimiz də göz qabağındadır. İş şəraitimiz sözün əsil mənasında ideal səviyyədədir. Bir neçə il əvvəlki bərbad vəziyyəti isə sadəcə olaraq, xatırlamaq istəmirik.

Yaradılmış şərait fəaliyyətimizə inanılmız dərəcədə müsbət təsir göstərir. İndi istənilən təqaüdçünün problemini dinləməyə və yerindəcə həll etməyə imkanımız var. Bu da, sözsüz ki, ilk növbədə insanların narazılıqlarını aradan qaldırmaq baxımından müstəsna əhəmiyyət kəsb edir. Mən çox kollektivdə çalışmışam, ancaq tam səmimiyyətlə deyə bilərəm ki, kollektivlə təması, səmimi ünsiyyətdə olmağı daha çox bu təşkilatda öyrəndim. Bizim işimizin uğurlu alınmasını şərtləndirən amillər mövcuddur.

Ən başlıca amil isə əmək və əhalinin sosial müdafiəsi naziri Füzuli Ələkbərovun, Abşeron Rayon İcra Hakimiyyətinin başçısı Zakir Fərəcovun bizə göstərdikləri yüksək etimaddır. Heç şübhəsiz, ulu öndərimiz Heydər Əliyevin müəyyənləşdirdiyi strategiya və bu strategiyanı uğurla davam etdirən möhtərəm Prezidentimiz İlham Əliyevin yorulmaz fəaliyyəti, işgüzar mühitin yaradılması istiqamətində atdığı addımlar, həyata keçirdiyi tədbirlər ölkəsini, xalqını ürəkdən sevən hər kəs üçün ən gözəl örnəkdir. Bizim öhdəmizə düşən isə odur ki, bundan sonra da uğurların davamını gətirə bilək və yeni mükafatlar qazanaq. Ən böyük mükafatımız isə insanların üzündəki təbəssüm və razılıq hissi olsun.

Səməd HÜSEYNOĞLU

Xalq qəzeti.-2009.-13 fevral.-S.7.