Əhaliyə xidmətin yüksək nümunəsi

Azərbaycan xalqının ümummilli lideri Heydər Əliyevin sosial-iqtisadi inkişaf strategiyasının uğurlu davamçısı möhtərəm Prezidentimiz cənab İlham Əliyevin hakimiyyəti dövründə Azərbaycanda sosial müdafiə, o cümlədən sosial yardım sisteminin qabaqcıl dünya ölkələrinin təcrübəsi əsasında təkmilləşdirilməsi, bu sistemin daha səmərəli qurulması, dövlət yardımlarının verilməsində ünvanlılıq prinsiplərinin təmin olunması daim diqqət mərkəzində olmuşdur. Belə ki, möhtərəm Prezidentimiz İlham Əliyev 16 noyabr 2005-ci il tarixli Fərmanı ilə “Ünvanlı dövlət sosial yardım haqqında” Azərbaycan Respublikasının Qanununu imzalamışdır.

Həmin qanunun tətbiqi ilə əlaqədar olaraq Yasamal rayon Əhalinin Sosial Müdafiəsi Mərkəzində geniş tədbirlər planı işlənib hazırlanmış və qanundan irəli gələn bir sıra vəzifələr həyata keçirilmişdir. Belə ki, 2006-cı ilin mart ayından başlayaraq rayonumuzda əhali ilə geniş izahat işi aparılmış, aztəminatlı ailələrlə məhəlli görüşlər keçirilmişdir. Bu görüşlərə Əmək və Əhalinin Sosial Müdafiəsi Nazirliyinin məsul şəxsləri də dəvət olunmuş, ünvanlı sosial yardımın məqsəd və prinsipləri əhaliyə izah edilmişdir. Bundan sonra Əmək və Əhalinin Sosial Müdafiəsi Nazirliyinin göstərişi ilə 2006-cı il aprelin 15-dən Yasamal rayon Əhalinin Sosial Müdafiəsi Mərkəzində aztəminatlı ailələrdən sənədlərin qəbuluna başlanmışdır. Həmin ilin iyulundan isə “Ünvanlı dövlət sosial yardım” proqramı rəsmi fəaliyyətə başlamışdır. Proqramın icrası 2006-2008-ci illərdə müvəffəqiyyətlə həyata keçirilmiş, cari ildə də uğurla davam etdirilir. Yasamal rayon Əhalinin Sosial Müdafiəsi Mərkəzində 2009-cu ilin beş ayı ərzində 3823 ailə ünvanlı sosial yardımdan bəhrələnmişdir. Həmin ailələrin 14145 nəfərdən ibarət ailə üzvləri vardır. Müharibə əlillərinin 24, digər səbəbdən əlil olanların ailələri 787, məcburi köçkün ailələrinin sayı 396 nəfərdən ibarət olmuşdur.

Respublikamızda sosial müdafiə sisteminin daim təkmilləşdirilməsi, yaşayış minimumunun və ehtiyac meyarının məbləğinin, minimum əmək haqqının, pensiyaların və müavinətlərin mütəmadi olaraq artırılması respublikamızda yoxsulluq səviyyəsinin kəskin şəkildə aşağı düşməsinə səbəb olmuşdur. Belə ki, əgər 2003-cü ildə ölkədə yoxsulluq səviyyəsi 49 faiz təşkil edirdisə, hazırda bu göstərici 13,2 faizdir. Bütün bunlar bir daha sübut edir ki, həyata keçirilən hərtərəfli inkişaf strategiyası xalqın həyat səviyyəsinin yüksəlməsinə, əhalinin aztəminatlı hissəsinin sosial müdafiəsinin gücləndirilməsinə xidmət edir.

Bütün bunlarla yanaşı, Yasamal rayon Əhalinin Sosial Müdafiəsi Mərkəzində sosial müavinət, Prezident təqaüdü alan əlil və şəhid ailələrinin, müharibə iştirakçılarının da sosial müdafiəsinin gücləndirilməsi, onlara xüsusi qayğı göstərilməsi daim diqqət mərkəzində saxlanılır. Mərkəzimiz tərəfindən 420 ahıl, tənha qocaya evlərdə sosial-məişət xidməti göstərilir. Bu kateqoriyadan olan vətəndaşların təqaüd və sosial müavinətlərinin vaxtlı-vaxtında çatdırılması üçün mərkəzdə işçi qrupu fəaliyyət göstərir və daim rəhbərliyin nəzarətində saxlanılır.

Qarşıya qoyulmuş vəzifələrin layiqincə həyata keçirilməsi üçün Əmək və Əhalinin Sosial Müdafiəsi Nazirliyinin və Yasamal Rayon İcra Hakimiyyətinin birgə səyi nəticəsində mərkəzimiz 2008-ci ilin iyun ayında yeni tikilmiş inzibati binaya köçürülmüşdür. Burada normal işləmək və məqsədyönlü fəaliyyət göstərmək üçün lazımi şərait yaradılmış, iş otaqları mebel və kompyuter avadanlığı ilə təchiz olunmuşdur.

Yasamal rayon Əhalinin Sosial Müdafiəsi Mərkəzinin kollektivi Azərbaycan Respublikasının Prezidenti cənab İlham Əliyevin ölkənin daim artan iqtisadi imkanlarının ilk növbədə sosial məsələlərin həllinə yönəldilməsi ilə bağlı məqsədyönlü siyasətini əldə rəhbər tutaraq öz işini günün tələbləri səviyyəsində quraraq, ünvanlı sosial yardımın bundan sonra da uğurla həyata keçirilməsi üçün bütün imkanlardan səmərəli istifadə edəcəkdir.

Arif ABBASOV,

Yasamal ƏSMM-nin direktor müavini

Xalq qəzeti.- 2009.- 1 iyul.- S. 6.