Sosial müdafiəni gücləndirmək dövlət siyasətinin prioritetlərindəndir

Dövlət başçısı Prezident İlham Əliyev son 6 ildə ümummilli lider Heydər Əliyevin mahiyyətcə gələcəyə ünvanlanmış inkişaf strategiyasını çox böyük uğurla davam etdirərək Azərbaycanı dünyanın inkişaf etmiş ölkələri sırasına çıxarmışdır. Onun bilavasitə rəhbərliyi ilə iqtisadiyyatımızda həyata keçirilən köklü islahatlar, dünya iqtisadi məkanına sürətli inteqrasiya, davamlı makroiqtisadi sabitlik və iqtisadi artımın dinamikası ölkədə sosial iqtisadi vəziyyətin yaxşılaşdırılmasına və xalqın firavan yaşamasına möhkəm zəmin yaratmışdır.

Bu gün qətiyyətlə demək olar ki, Azərbaycanda əhalinin sosial müdafiə, həmçinin sosial yardım sisteminin qabaqcıl dünya ölkələrinin səmərəli təcrübəsi əsasında təkmilləşdirilməsi, onun daha operativ işləməsi, dövlət yardımlarının verilməsində ünvanlılıq prinsipinin təminatı dövlət başçısının daim diqqət mərkəzində olmuşdur. Xüsusilə Prezident İlham Əliyevin 16 noyabr 2005-ci ildə imzaladığı “Ünvanlı dövlət sosial yardımı haqqında” Azərbaycan Respublikası Qanununun təsdiq edilməsi haqqında fərmanından sonra bu sahədə Əmək və Əhalinin Sosial Müdafiəsi Nazirilyinin həyata keçirdiyi tədbirlər öz müsbət nəticəsini vermiş və qısa vaxtda respublikanın hər yerində Əhalinin Sosial Müdafiə Mərkəzləri konkret tədbirlər planı işləyib hazırlamışlar.

Bakının Əzizbəyov Rayon Əhalinin Sosial Müdafiə Mərkəzində də müvafiq qanunun tətbiqi ilə əlaqədar geniş tədbirlər planı işlənib hazırlanmış və qanundan irəli gələn bir sıra vəzifələr reallaşdırılmışdır.

İlk tədbir kimi, Əmək və Əhalinin Sosial Müdafiəsi Nazirliyinin əməkdaşları və mütəxəssisləri ilə birgə rayonumuzun bütün kəndlərində aztəminatlı ailələr, yardıma ehtiyacı olan insanlar və əhalinin sosial qayğıya ehtiyacı olan nümayəndələri ilə görüşlər keçirilib, geniş izahat işləri aparılmış və sosial yardımın məqsədi və prinsipləri açıqlanmışdır.

2006-cı ilin iyun-iyul aylarından başlayaraq “Ünvanlı sosial yardım” proqramı rəsmən fəaliyyətə başlamış, aztəminatlı ailələrdən toplanan sənədlər araşdırılaraq konkret yardım göstərilməyə başlanmışdır. 2006-2008-ci illərdə uğurla həyata keçirilən yardım proqramı bu il də davam etdirilmiş və əhalinin aztəminatlı qruplarına sosial yardımların vaxtında çatdırılması təmin olunmuşdur.

Bütövlükdə bu il Əzizbəyov rayon Sosial Müdafiə Mərkəzi üzrə 3944 ailəyə ünvanlı sosial yardım göstərilmişdir. Sosial yardım alan 162 ailə öhdəsində 1 yaşadək uşağı olanlar, 886-sı isə məcburi köçkün ailəsidir. Ailə başçısını itirdiyinə görə isə öhdələrində 403 uşaq olan 234 ailədir.

Dövlətin ünvanlı sosial yardımından rayonumuzun 1481 əlil sakini də faydalanmışdır. 18 yaşadək sağlamlıq imkanları məhdud olan 5074 nəfərə də bu növ yardım şamil edilmiş və onlar da vaxtında yardım ala bilmişlər.

Etiraf etmək lazımdır ki, dövlətin çox mühüm əhəmiyyət verdiyi əhalinin sosial müdafiə sisteminin möhkəmləndirilməsi naminə həyata keçirdiyimiz bu tədbirlərdə Əzizbəyov Rayon İcra Hakimiyyətinin başçısı Gülağa İslamov və aparatın kollektivinin də əməyi az deyil. Sevindirici haldır ki, ölkənin sosial müdafiə sisteminin daim təkmilləşdirilməsi, yaşayış minimumunun və ehtiyac meyarının məbləğinin, minimum əmək haqqının, pensiya və müavinətlərin dövlət tərəfindən mütəmadi olaraq artırılması respublikamızda yoxsulluq səviyyəsinin son beş ildə kəskin şəkildə aşağı düşməsinə, əhalinin həyat səviyyəsinin yüksəlməsinə gətirib çıxarmışdır.

Yeri gəlmişkən, qeyd etmək istərdim ki, Əzizbəyov Rayon Əhalinin Sosial Müdafiə Mərkəzində sosial müavinət, təqaüd alan əlil və şəhid ailələrinin, müharibə iştirakçılarının, Qarabağ müharibəsi əlillərinin sosial müdafiəsinin gücləndirilməsi, onlara dövlət yardımlarının çatdırılması daim diqqətdə saxlanılır. Çünki bu həm də əmək və əhalinin sosial müdafiəsi nazirinin qarşımızda qoyduğu əsas vəzifə və tapşırıqlardan biridir.

Kollektivimiz Azərbaycan Respublikasının Prezidenti cənab İlham Əliyevin ölkənin iqtisadi potensialı, neft və sənaye gəlirləri artdıqca əhalinin sosial müdafiəsini də gücləndirdiyinin canlı şahididir.

Biz, dövlət başçımızın Azərbaycanın xoşbəxt və firavan gələcəyinə xidmət edən bu məqsədyönlü siyasətinin reallaşdırılmasında, azacıq da olsa, payı olan insanlar kimi özümüzü məmnun sayır və qürur duyuruq. Çünki əhalinin sosial müdafiəsini gücləndirmək dövlət siyasətinin prioritetlərindəndir.

Adəm İBRAHİMOV,

Əzizbəyov Rayon Əhalinin Sosial

Müdafiəsi Mərkəzinin direktor əvəzi

Xalq qəzeti.- 2009.- 3 iyul.- S. 7.