Los Ancelesdə Azərbaycana həsr olunmuş sərgi

İyunun 27-dən Los Anceles şəhərində amerikalı rəssam Karen Koblitzin “Torpağın ritmləri” adlı fərdi sərgisi keçirilir. Sərgi Azərbaycanın mədəniyyəti və tarixinin təbliği məqsədilə hazırlanıb.

Karen Koblitz Azərbaycana dəfələrlə səfərlər edib, Azərbaycanın mədəni irsi ilə yaxından tanış olub. Xüsusən Azərbaycan incəsənəti və mədəniyyətinin simvolikası, maddi mədəni irs nümunələri Koblitzi çox maraqlandırıb. Bunların təsiri altında, o, sərgi keçirmək və Azərbaycanın mədəni irsini Amerika Birləşmiş Ştatlarında təbliğ etmək qərarına gəlib. Sərgidə K. Koblitzin təşəbbüsü və dəstəyi ilə hazırlanmış Qobustan qaval daşının modeli nümayiş olunacaq. Sərgi zamanı mərhum Çingiz Mehdiyev tərəfindən qaval daşda ifa olunmuş Azərbaycan ritmləri DVD vasitəsilə geniş auditoriyaya nümayiş olunacaqdır.

Sərgi iyulun 25-dək davam edəcək.

M.MÜKƏRRƏMOĞLU

Xalq qəzeti.- 2009.- 4 iyul.- S. 6.