14 yaşlı dünya çempionu

İspaniyanın Madrid şəhərində iyun ayının 21-dən 28-dək keçirilən KICKBOXING üzrə dünya çempionatında 26 ölkənin idmançıları iştirak etmişlər. Ölkəmizi bu mötəbər turnirdə 35 idmançı ilə təmsil edən milli komandamız yüksək peşəkarlıq və əzmkarlıq nümayiş etdirərək ümumi hesabda II yerə sahib çıxmışdır. I yerə İspaniya, III yerə isə Rusiya idmançıları layiq görülüb. Müxtəlif növlər üzrə keçirilən çempionatda komandamız 16 qızıl, 14 gümüş və 19 bürünc medal qazanıb.

Milli komandamızın belə yüksək nailiyyətlər qazanmasında xüsusi xidmətləri olan idmançılardan biri də Ramil Həsənovdur. 14 yaşlı idmançımız layt kontakt yunior(+55) yarışında bütün rəqiblərinə qalib gələrək qızıl medala layiq görülməklə Dövlət Himnimizi İspaniyada səsləndirib.

Semi kontakt yunior(-55) növü üzrə keçirilən yarışda isə Ramil gümüş medal qazanıb. Onu da qeyd etmək istərdik ki, Ramil rəqiblərindən biri olan erməni idmançısı üzərində nokautla inamlı qələbə qazanmışdır. Yeniyetmə çempion keçirdiyi yarışlar barədə danışaraq qeyir ki, mənim idmanla peşəkar səviyyədə məşğul olmağıma səbəb ümummilli liderimiz Heydər Əliyevin “İdman kimi Azərbaycanın müstəqilliyinin rəmzlərini nümayiş etdirən ikinci bir vasitə yoxdur” müdrik kəlamı oldu. Bu müdrik fikrin mahiyyətini dərk edəndən sonra müstəqil respublikamıza ləyaqətlə xidmət etmək üçün öz üzərimdə daha çox çalışmağa başladım. Məşqçilərimizin bütün tapşırıqlarına layiqincə əməl etməklə yanaşı fərdi qaydada məşq edirdim. Azərbaycan çempionatında birinci yeri tutanda qələbənin sevincini o qədər də hiss etmirdim. Çünki məqsədim beynəlxalq səviyyəli yarışlarda qalib gələrək bayrağımızın dalğalanmasını və himnimizin səslənməsini görmək və xoşbəxtliyi hiss etmək idi.

Dünya Çempionatında rəqiblərimdən birinin erməni olması isə döyüş əzmimi daha da artırdı. Bütün qüvvəmi qələbə naminə birləşdirmişdim. Həmin yarış başqalarından tamamilə fərqləndi. Azarkeşlərin də dəstəyi böyük idi. Bu səbəbdən də ilk andan rəqibə aman vermədim və nokauta salaraq məğlub etdim. Final qarşılaşmam da çətin oldu. Budəfəki rəqibim daha güclü idi. 13 dəfə Ukrayna çempionu olan rəqibim haqqında eşitmişdim, fiziki və taktiki cəhətdən güclü olduğunu bilirdim. Lakin buna baxmayaraq qələbə əzmi ilə meydana çıxaraq son ana qədər mübarizə apardım. Rəqibimin məndən ehtiyat etdiyini bilən kimi aramsız hücumlara keçərək məqsədimə nail oldum. Qələbə sevincini yaşamaq mənə də qismət oldu. Ali mükafatı almaq üçün üçrəngli bayrağımıza bürünərək meydana daxil olanda hansı hisslər keçirdiyimi indi də təsəvvür edə bilmirəm. Bütün bunlara görə Prezidentimiz cənab İlham Əliyevə, məşqçilərimə dərin minnətdarlığımı bildirirəm.

Dövlət başçımızın idmanın inkişafı üçün gördüyü genişmiqyaslı işlər olmasa ölkəmiz idman aləmində bu qədər saysız-hesabsız qələbələr sərgiləməzdi.

V.ƏLİYEV

Xalq qəzeti.- 2009.- 4 iyul.- S. 7.