Sabitlik və asayişin bünövrəsində böyük zəhmət dayanır

Çox az peşə sahibləri var ki, onların fəaliyyət sferası həm dövlətçiliyin, qorunmasında, həm də birbaşa xalqın ictimai-siyasi azadlıqlarının təmin olunmasında müstəsna əhəmiyyət daşıyır. Belə peşə sahibləri sırasında ilk növbədə minnətdarlıqla sadalanmalı kontingent polislərdir.

Mentalitetimizi və yaxın keçmişin siyasi qarışıqlıqlarını nəzərə alsaq, polislərə münasibət heç də birmənalı olmayıb. Üstəlik də cinayətkarlığın artdığı dönəmlərdə “ağsaqqal elçiliyi, yaxşı oğlan” kriteriyası ilə yanaşmalar polis sisteminə onsuz da yaxşı olmayan rəydə bir xeyli deformasiyalara səbəb olmuşdu.

Ulu öndər, müasir Azərbaycanın memarı Heydər Əliyevin kadr siyasətində və seçimində apardığı fundamental dəyişikliklər illərlə formalaşmış neqativ əhval-ruhiyyədə redaktələr etməyə yetərli oldu. Təsadüfi deyil ki, daxili işlər naziri Ramil Usubovun verilən tapşırıqları, imzalanan fərman və sərəncamları yeridilən daxili siyasətə uyğun yüksək səviyyədə icrasına nail olması polis sistemində nəhayət ki, sağlam mühiti bərqərar etdi.

Bu gün bölgələrdə və ən ucqar yaşayış məntəqələrində belə qəti əminlik var: dövlətçiliyin qorunmasında ən sədaqətli strukturlardan biri də polis sistemidir, həm də və eyni zamanda, onlar insanların rahatlığı üçün Konstitusiyada nəzərdə tutulan birgəyaşayış qaydalarının təminatçısıdırlar. Son vaxtlar DİN rəhbərliyi səviyyəsində aparılan kadr dəyişiklikləri də bunu isbat edir ki, ən müxtəlif yollarla maskalanıb, qoyun dərisi altında gizlənib canavar xisləti ilə fəaliyyət göstərənlərə şans qalmayacaq.

Sözümüzə söykək kimi deyək ki, polis polkovniki Elxan Əliyev Lənkəran Şəhər Daxili İşlər Şöbəsinə təyinat alandan az sonra illər uzunu yerli əhalidə nəinki fəaliyyətləri ilə, həm də cəmiyyətdə görüntüləri ilə ikrah doğuran nə qədər üzdəniraq kadr layiqli cəzasını alıb. Lənkəranlılar çin və mundirlə pərdələnərək azğınlaşmış bədnam, bədxislət və bədəməl üzləri görmək əzabından qurtulduqları üçün polis polkovniki Elxan Əliyevə, ilk növbədə isə daxili işlər naziri Ramil Usubova dərin minnətdarlıq hisslərini ifadə etməkdən çəkinmirlər. İnsanlar üçün sərbəst hərəkət etmək azadlığı, təminatlı gələcək, hüquqlarının qorunması həmişə böyük önəm daşıyıb. Bu mənada daxili işlər nazirinin rəhbərliyi və nazirlik xətti ilə konkret olaraq Bərdə rayonunda və ölkənin digər bölgələrində ümumi inkişafa təkan verən hamilik fəaliyyəti insanlarda dövlətçiliyə böyük inam oyadıb. Heç şübhəsiz ki, mərhəmətli və bağışlayan olmağı o qədər fetişləşdirmişik ki, hətta qan bağlamağı da xeyirxahlıq sayırıq. Konstitusiyadan və dövlətçiliyin təməl prinsiplərindən irəli gələn humanizmdən də bütün hallarda yararlanmaq istəyirik. Lakin unutduğumuz bir məqam var ki, cinayətkar cəzasız qalmamalıdır. Bir çox hallarda polislərdən ona görə narazı qalırlar ki, onlar “yaxşı oğlan” ola bilmirlər - çünki cinayətə göz yummurlar, oğurluğu, əliəyriliyi, qəsbkarlığı, insan haqlarının pozulmasını, dövlətçiliyə qarşı atılan addımları yerindəcə dəf edirlər. “Ağsaqqallığı, qan bağlamağı” cani əfvi səviyyəsinə qədər ucuzlaşdıran “səlahiyyətlilər” sözləri keçməyəndə, yüngülsaqqal olmaqlarını bu sistem haqqında dezinformasiyaları mətbuata ötürməklə kompensasiya etmək istəyirlər, dar çərçivədə, yaxın ətraflarının orbitində mənfi və neqativ rəylər yaratmaqla hirslərini soyudurlar.

Dövlətçiliyimizin möhkəmlənməsini şərtləndirən siyasətə və komandaya sədaqətli DİN rəhbərliyi öz əsgər və zabitləriylə birgə nümayiş etdirdiyi fədakarlıq ən yüksək diqqətə və tərifə layiqdir. Bu bayram ərəfəsi yollarda durub, sözün müstəqim mənasında hərəkət azadlığımızı və təhlükəsizliyimizi təmin edən yol polisi əməkdaşlarını da yaddan çıxarmaq olmaz. Qəti əminliklə bildirməkdə özümü haqlı sayıram: əgər yol polisi əməkdaşları olmasa, bizim hər gün qarşılaşdığımız, sorağını aldığımız faciələrin miqyası indikindən qat-qat artıq olacaq. Təsəvvür edin: sükan arxasında sərxoş oturan sürücü yaxalanandan və layiqli cəzasını alandan sonra bütün gücünü səfərbər edib, təhlükəsizliyin keşiyində duranların “yolkəsən” imicini ifadə edən “zəhmətkeş məktubları”nı ən müxtəlif instansiyalara yollamaqdan yorulmur. Qanunu pozanların qanunla cəzalandırılması artıq bir psixoloji müharibəyə çevrilir. İntizama dəvət olunanlar, inzibati qaydada cəzalandırılanlar artıq “potensial qiyamçılar dəstəsi” yaratmış olur. Yol polisi əməkdaşlarının vəzifə mükəlləfiyyətləri və səlahiyyətləri bəlli olsa da, mentalitetdən irəli gələn nüanslar məcbur edir ki, insanlarla psixoloji cinahdan da mübarizə aparsınlar. Bu isə bir neçə dəqiqəlik təmasla mümkün deyil. Bunu bacaranlar isə hörmət və ehtirama layiqdir. Elə buna görə də polislərin peşə bayramı günündə doğma rayonumuzda uzun illər yol polisi bölməsinə rəhbərlik edən Nəsimi Məmmədova, YPX-nin baş inspektoru Sabir Süleymanova, inspektor Yunis Paşayevə həm öz adımdan, həm də sürücülər adından minnətdarlığımı ifadə edirəm.

Əziz oxucular! Gəlin xatırlayaq ki, bizim evimizi yaranda, üstümüzə hücum çəkəndə, maşınımızı qaçıranda, dövlətçiliyimizə əyri baxanda cinayətkarların və onların dəstələrinin üstünə polis gedir. Şəxsi inciklikləri heç olmasa bu bayram günündə unudub etiraf edək: onlar həqiqətən də yaxşı oğlanlardır!

Keşiyimizdə fədakarlıqla duran bu insanları sevindirməyi bacaraq! Onların borcu bizi qorumaqdırsa, bizim də borcumuz onların gərgin zəhmətini etiraf etmək, dəyərləndirməkdir.

Fərq ondadır ki, onlar bizi hər gün qoruyur, biz isə ildə bir dəfə... sadəcə, təbrik edir, sağ ol deyirik!

Bəxtiyar HÜSEYNOV,

Azərbaycan Jurnalistlər Birliyinin üzvü

Xalq qəzeti.- 2009.- 4 iyul.- S. 4.