Gəmiçilərin peşə bayramı qeyd edilmişdir

Xəzər Dəniz Gəmiçiliyi işçilərinin peşə bayramı münasibətilə bu qurumun mədəniyyət evində təntənəli iclas keçirilmişdir.

İclas iştirakçıları əvvəlcə Fəxri Xiyabana gələrək, müasir Azərbaycan dövlətinin memarı və qurucusu, ümummilli lider Heydər Əliyevin xatirəsini ehtiramla yad etmiş, məzarı önünə əklil qoymuşlar.

Görkəmli oftalmoloq, akademik Zərifə xanım Əliyevanın da xatirəsi yad edilmiş, məzarı üzərinə gül dəstələri düzülmüşdür.

Təntənəli mərasimdə gəmiçiliyin rəisi Aydın Bəşirov demişdir:

— Bu gün bizim üçün çox dəyərli gündür. 1998-ci il iyulun 2-də ulu öndərimiz Heydər Əliyev Azərbaycan Respublikasının iqtisadi və sosial həyatında Xəzər Dəniz Cəmiçiliyinin əhəmiyyətli rolunu nəzərə alaraq, gəmiçilik işçilərinin peşə bayramı gününün təsis edilməsi haqqında sərəncam imzalamışdır. Bu, böyük rəhbərin gəmiçiliyimizə göstərdiyi daimi diqqət və qayğının məntiqi davamı idi.

Natiq bildirmişdir ki, dənizçilər həmişə yüksək əzmkarlığı, zəhmətsevərliyi ilə seçilirlər. Azərbaycanın nəqliyyat kompleksində özünəməxsus yeri olan Gəmiçilik hər zaman qarşıya qoyulan tapşırıqları ləyaqətlə yerinə yetirir. Cari ilin birinci yarısında da dənizçilər yaxşı işləmişlər. Belə ki, altı ayda donanmada 6 milyon 380,8 min ton müxtəlif təyinatlı yüklər daşınmışdır. Bunlardan 4 milyon 660 min tonu tankerlərlə, 510,1 min tonu universal gəmilərlə, 1 milyon 210,7 min tonu isə gəmi-bərələrlə həyata keçirilmişdir. Ötən ilin müvafiq dövrü ilə müqayisədə yükdaşımalarda artım 11,3 faiz olmuşdur.

A. Bəşirov daha sonra qeyd etmişdir ki, bu gün donanmanın yaşaması, rəqabət qabiliyyətinin artması üçün böyük işlər görülür. Məsələn, donanmanın təzələnməsi həmişə Gəmiçiliyin diqqət mərkəzində olan əsas məsələlərdən biridir. Sevindirici haldır ki, bu sahədə ölkə rəhbərliyi də gəmiçiliyə dəstək verir. Təkcə 2008-ci ildə möhtərəm Prezidentimiz İlham Əliyevin xeyir-duası ilə dörd gəmi alınmışdır. “Akademik Zərifə Əliyeva” və “Qarabağ” gəmi-bərələri, “Zəngəzur” və “Cabbar Həşimov” tankerləri bu gün Xəzərdə yük daşıyırlar. İndi nəqliyyat donanmasının tərkibində 79 gəmi var. Bunlardan 37-si quru yük gəmisi, 42-si isə tankerlərdir.

Dənizçilərin peşə bayramı ərəfəsində Rusiyanın Nijni Novqorod şəhərindəki “Krasnoye Sormovo” gəmiqayırma zavodunda gəmiçiliyin sifarişi ilə tikilən daha bir gəminin — “Şuşa” tankerinin suyasalınma mərasimi oldu. Yaxın zamanlarda biz Azərbaycanın ayrılmaz hissəsi olan Şuşanın adını daşıyan tankeri Bakıda qarşılayacağıq. “Şuşa” son yeddi ildə bizim “Krasnoye Sormovo” zavodundan aldığımız 10-cu, ümumilikdə isə 13-cü təzə gəmi olacaq.

A. Bəşirov sonda bildirmişdir:

— Peşə bayramı ilə əlaqədar Prezident İlham Əliyev 14 nəfər Gəmiçilik işçisinin “Tərəqqi” medalı ilə təltif olunması haqqında sərəncam imzalamışdır. Bu, dəniz nəqliyyatına dövlət qayğısının göstəricisidir. Biz möhtərəm Prezidentimizə dərin təşəkkürümüzü bildiririk. Azərbaycanın bugünkü sürətli inkişafına, iqtisadi artım tempinə görə lider ölkəyə çevrilməsi məhz Prezidentin adı ilə bağlıdır. Biz dənizçilər onu daim dəstəkləyirik, bütün göstəriş və tövsiyələrinin yerlərdə həyata keçirilməsi üçün əlimizdən gələni əsirgəməyəcəyimizə söz veririk.

Mərasim iştirakçıları adından ölkə Prezidenti İlham Əliyevə müraciət qəbul edilmişdir.

Tədbir bayram konserti ilə başa çatmışdır.

Vaqif BAYRAMOV

Xalq qəzeti.- 2009.- 5 iyul.- S. 7.