Görkəmli alimin 100 illiyi qeyd olundu

Bir neçə gün bundan öncə Nərimanov rayonu F.X. Xoyski küçəsi, 127-də yeni istifadəyə verilmiş “Divani-Hikmət mədəni məclis”ində tanınmış alim, pedaqoq Muxtar Hacıyevin anadan olmasının 100 illiyinə həsr olunmuş “İrsi uğurlar” adlı ədəbi bədii gecə keçirildi. Gecəyə dəvətli qonaqlar sırasında respublikanın tanınmış elm, incəsənət xadimləri, yazıçı və jurnalistlər, eləcə də Muxtar Hacıyevin doğmaları və yaxın qohumları iştirak etdi.

Tədbiri giriş sözüylə açan Muxtar Hacıyevin oğlu Musiqi Akademiyasının professoru, əməkdar incəsənət xadimi Telman Hacıyev atasının keçdiyi mənalı ömür və çoxşaxəli yaradıcılıq yolundan, qazandığı nailiyyətlərdən, bu gün də bu irsi layiqincə davam etdirən ailə üzvlərindən söz açdı. Daha sonra Telman Hacıyev digər ailə üzvlərini, qardaşı, konservatoriyanın müəllimi Elmar Hacıyevi, oğlu fəlsəfə elmləri namizədi Vaqif Hacıyevi, qızı fəlsəfə elmləri doktoru, professor Mina xanım Hacıyevanı, nəvəsi diplomat Nərgiz Hacıyevanı tədbir iştirakçılarına təqdim etdi. Çıxış edən akademik Ziyad Səmədzadə, Fuad Qasımzadə, fəlsəfə elmləri doktoru, professor İmran Cəfərzadə, filologiya elmləri doktoru, professor Şahin Fazil, jurnalist Hacı Rafiq Əliyev və digərləri Muxtar Hacıyevin elmi nailiyyətlərindən, insani keyfiyyətlərindən və milli musiqimizə, ulu muğam sənətinə olan rəğbətindən söz açdılar. Bəlkə elə bu səbəbdən də divardan asılmış möhtəşəm portretin altından yubilyarın sevimli tarı asılmış, məclisə xoş ovqat bəxş edən muğam üçlüyü dəvət olunmuşdu. Tarzən Sahib Paşayevin, kamançaçı Toğrul Əsədullayevin müşayiətilə “Muğam 2007” televiziya müsabiqəsinin laureatı Könül Tağıyevanın oxuduğu muğam nümunələri, eləcə də klassik musiqi ifaçıları o gecə hamının könlünü oxşadı. Sonra Telman Hacıyev bütün ailəsi adından qonaqlara təşəkkürünü bildirdi.

P.S. Ola bilsin ki, bu gün Muxtar Hacıyevi tanıyanların sayı o qədər deyil, lakin önəmlisi onu yaxından tanıyanların, ona rəğbət bəsləyən insanların olmasıdır. Demək, ömrü hədər keçməyib. Demək, yaddan çıxmaq qorxusu hələ bundan 100 il də sonra olmayacaq.

Rafiq SALMANOV

Xalq qəzeti.- 2009.- 9 iyul.- S. 7.