Azərbaycanın tərəqqisi naminə

1969-cu il iyulun 14-ü ümummilli liderimiz Heydər Əliyevin Azərbaycanda ilk dəfə hakimiyyətə gəldiyi gündür. Qədirbilən xalqımız həmin günü müstəqil, qüdrətli Azərbaycanın tarixində əlamətdar bir gün hesab edir.

Həmin vaxt Azərbaycan o zamankı SSRİ-nin geridə qalmış respublikalarından biri hesab edilirdi. Bu dövrdə Azərbaycan iqtisadiyyatı dərin böhran içərisində idi, sənaye və kənd təsərrüfatı tənəzzülə uğramışdı. Belə bir şəraitdə Heydər Əliyev dərin zəka və böyük bacarığına güvənərək geniş islahatlara başladı. Qısa müddət ərzində Azərbaycan SSRİ-nin qabaqcıl respublikaları sırasına çıxdı.

Heydər Əliyevin Azərbaycana rəhbərlik etdiyi birinci dövrdə respublikamızda yüzlərlə zavod, fabrik, istehsal sahələri yaradıldı. Respublika dünyanın 65 ölkəsinə 350 adda məhsul ixrac etməyə başladı.

Ulu öndər xalqın xoşbəxt gələcəyi, müstəqilliyi üçün zəruri işləri yorulmadan həyata keçirirdi. Onun ən böyük xidmətlərindən biri milli kadrların hazırlanması idi. Bu məqsədlə respublikamızda ali və orta ixtisas təhsili şəbəkəsi genişləndirildi. SSRİ-nin 170 aparıcı təhsil müəssisəsinə hər il yüzlərlə azərbaycanlı gənc oxumağa göndərilirdi. Görkəmli dövlət xadimi Heydər Əliyev hələ o dövrdə müstəqil Azərbaycan üçün milli hərbi kadrların zəruriliyini əsas götürərək hərbi təhsilin inkişafına böyük önəm verirdi. Onun sayəsində Bakı Ümumqoşun Komandirləri Məktəbinə azərbaycanlı gənclərin qəbulu bir neçə dəfə artırılmış və C.Naxçıvanski adına Hərbi Lisey fəaliyyətə başlamışdı. 1978-ci ildə qəbul edilmiş Konstitusiyada Azərbaycan dilinin dövlət dili kimi təsbit olunması Heydər Əliyevin müdrikliyinin və dahiyanə uzaqgörənliyinin daha bir parlaq nümunəsi idi.

Ümummilli liderimizin Azərbaycana ilk dəfə rəhbərlik etdiyi 1969-1982-ci illərdə həyatımızın elə bir sahəsi yox idi ki, sürətlə inkişaf etməsin. Milli dirçəlişin əsası məhz keçən əsrin 70-ci illərində qoyuldu.

Azərbaycanda elmin inkişafına xüsusi qayğı göstərilir, bu sahəyə böyük vəsait sərf edilirdi. Mədəniyyət və incəsənətimiz böyük intibah dövrünə qədəm qoymuşdu. Ulu öndərimiz mədəniyyətin inkişafını uzaqgörənliklə həm xalqımızın özünüdərkinin vacib şərti və həm də Azərbaycanın beynəlxalq arenaya çıxmasının ən optimal yolu hesab edirdi. Heydər Əliyevin Azərbaycana rəhbərliyinin birinci dövrü respublikamızın bütün sahələrdə inkişafı ilə əlamətdardır. Ümummilli liderimiz 40 il əvvəl, 1969-cu ildə hakimiyyətə gələndə geridə qalmış, keçmiş SSRİ-nin yalnız xammal regionu olan Azərbaycan 1982-ci ildə Heydər Əliyev ittifaqın yüksək dövlət vəzifəsinə irəli çəkiləndə yüksək inkişaf etmiş sənaye və kənd təsərrüfatı ölkəsinə çevrilmişdi.

Qeyd etmək lazımdır ki, ulu öndərimizin Azərbaycanda birinci dəfə hakimiyyətdə olduğu həmin dövrdə bütün sahələrdə olduğu kimi hüquqşünasların hazırlanması, qanunçuluğun möhkəmləndirilməsi, cinayətkarlığa və korrupsiyaya qarşı mübarizə istiqamətində də böyük işlər görülürdü.

Heydər Əliyevin Azərbaycanın inkişafına, onun bütün istiqamətlərdə tərəqqi edərək qüdrətli dövlətə çevrilməsinə yönəlmiş fəaliyyətinin ikinci mərhələsi 1993-cü ildə başladı. Ölkəmizi dağılıb məhv olmaqdan, dünya xəritəsindən silinməkdən, xalqı vətəndaş müharibəsi alovlarından xilas edərək müstəqil, qüdrətli Azərbaycanın memarı olmaq ulu öndərimizin şərəfli missiyasına çevrildi. Qısa müddət ərzində Azərbaycan dahi siyasətçi, böyük azərbaycanlı, bütün şərəfli ömrünü doğma xalqının inkişafına həsr etmiş xilaskar Heydər Əliyevin titanik fəaliyyəti sayəsində böyük tərəqqi yoluna qədəm qoydu.

Azərbaycanın inkişafına yönəlmiş bu siyasət indi ulu öndərimiz Heydər Əliyev siyasi məktəbinin ən layiqli davamçısı möhtərəm Prezidentimiz cənab İlham Əliyev tərəfindən uğurla davam etdirilir. Dövlət başçımızın Azərbaycanın hərtərəfli inkişafına yönəlmiş, ölkəmizi regionun lider dövlətinə çevirmiş, xalqımızın maddi rifah halının durmadan yaxşılaşmasına və ölkəmizin daha da qüdrətlənməsinə istiqamətlənmiş fəaliyyəti hər bir azərbaycanlının qəlbində qürur hissi doğurur. Azərbaycan Prezidentinin son altı il ərzində həyata keçirdiyi böyük işlər, dövlətimizin günü-gündən artan siyasi-iqtisadi qüdrəti, xalqımızın maddi rifah halının durmadan yaxşılaşması Heydər Əliyev ideyalarının xəlqiliyinin və əbədiyaşarlığının parlaqtəzahürüdür.

Rəşadət SADIQOV,

ədliyyə müşaviri

Xalq qəzeti.- 2009.- 12 iyul.- S. 3.