“O elə bir zirvədir ki...”

Dünən Xətai Rayon İcra Hakimiyyətinin və Yeni Azərbaycan Partiyası Xətai rayon təşkilatının birgə səyi ilə müstəqil Azərbaycanın memarı və qurucusu, xalqımızın dahi oğlu, ümummilli lider Heydər Əliyevin hakimiyyətə gəlməyinin 40 illiyi ilə bağlı geniş toplantı keçirildi. Rayon İcra Hakimiyyətinin başçısının birinci müavini Zaməddin Əkbərov toplantıda ulu öndər Heydər Əliyevin, XX əsr Azərbaycan tarixinə qızıl hərflərlə yazılmış müstəsna fəaliyyətindən bəhs edən geniş məruzə ilə çıxış etdi.

Natiq Heydər Əliyevin 14 iyul 1969-cu il tarixindən başlayan siyasi hakimiyyəti illərində Azərbaycanın iqtisadi, sosial, mədəni inkişafı naminə həyata keçirdiyi əzəmətli layihələrdən, onların sayəsində ölkəmizin tərəqqisindən konkret faktları və rəqəmləri xatırladaraq bildirdi ki, əslində Heydər Əliyev məhz həmin illərdə dövlət müstəqilliyinin təməl daşlarını qoymuşdur.

Tədbirdə millət vəkilləri Musa Quliyev, Səməd Seyidov, YAP Siyasi Şurasının üzvü Vüqar Rəhimzadə də çıxış etdilər. Natiqlər ümummilli liderin xilaskarlıq missiyasından, müstəqil dövlət quruculuğundakı müstəsna xidmətlərindən, müstəqillik illərində formalaşdırdığı iqtisadi strategiyadan, onun əsasını təşkil edən neft siyasətindən və bu siyasətin ölkəmizə gətirdiyi tərəqqidən ətraflı söhbət açdılar.

Sonra söz YAP Xətai rayon təşkilatının sədri, millət vəkili, yazıçı-dramaturq Hüseynbala Mirələmova verildi. Millət vəkili ulu öndər Heydər Əliyevin həyat və fəaliyyətini tədqiq edən bir yazıçı kimi bu dahinin Vətən qarşısındakı böyük miqyaslı xidmətlərdən daim qürur duyduğunu qeyd etdi və bildirdi ki, ulu Tanrının Azərbaycanın xilası naminə göndərdiyi Heydər Əliyev öhdəsinə düşən missiyanı böyük şərəflə başa vurdu. Natiq daha sonra dedi:

— Klassiklərdən biri yazır ki, “Tarixi hər bir insan yarada bilər. Yalnız böyük insanlar onu yazır”. Heydər Əliyev məhz tarixi yazan dahilərdəndi. Bu müstəqil Azərbaycanın tarixidir ki, onun keçmişində də, bu günündə də, sabahında da böyük dahi Heydər Əliyevin dəsti-xətti var. Heydər Əliyev Azərbaycan tarixinin elə bir zirvəsidir ki, zaman onun ucalığına heç bir xələl gətirmir, əksinə, zaman keçdikcə o daha aydın və parlaq görünür.

Heydər Əliyev hakimiyyətinin 40 illiyinə həsr olunmuş toplantı “Heydər Əliyev və doğma Azərbaycan” qısametrajlı filminə baxışla başa çatdı.

İlqar RÜSTƏMOV

Xalq qəzeti.- 2009.- 15 iyul.- S. 7.