Ümummilli lider Heydər Əliyevin xatirəsinə həsr olunmuş “Qızıl Qran-Pri” turniri

Bütün xalqımızın ulu öndər Heydər Əliyevin Azərbaycana rəhbər seçilməsinin 40 illiyini sonsuz məhəbbət və dərin ehtiramla bayram etdiyi bu günlərdə təbii ki, idman ictimaiyyətinin də deməyə sözü çoxdur. Ümummilli lider respublikamıza rəhbərlik etdiyi uzun illər ərzində həyatın digər sahələri kimi, bədən tərbiyəsi və idmanın da inkişafını daim diqqət mərkəzində saxlamış, ona xüsusi qayğı və hərtərəfli kömək göstərmişdir. Təsadüfi deyil ki, dünya şöhrətli müdrik şəxsiyyət xatirələrdə həm də idmanımızın və idmançılarımızın ən yaxın, bir nömrəli dostu kimi yaşayır.

Azərbaycanda zəngin ənənələri olan güləş Heydər Əliyevin ən çox sevdiyi idman növlərindən biri idi desək, yanılmarıq. İdman həvəskarlarımız onun bu növ üzrə yarışları maraqla izləməsinin dəfələrlə şahidi olmuşlar. Atlanta (ABŞ) Olimpiadası — 96-da isə ilk dəfə müstəqil komanda kimi çıxış edən nümayəndə heyətimizə yeganə medal-gümüş mükafat qazandıran sərbəst güləş ustası Namiq Abdullayevin müvəffəqiyyəti o zaman Prezident Heydər Əliyevə hədsiz sevinc gətirmişdi. Yadınızdadırsa, ulu öndər okeanın o tayından yenicə qayıdan olimpiayaçıları qəbul edərkən həmin tarixi qələbəni çox yüksək qiymətləndirərək, gümüş medalı qızıla bərabər tutmuşdu.

Budur, Bakıda Azərbaycan xalqının ümummilli lideri Heydər Əliyevin xatirəsinə həsr edilmiş beynəlxalq güləş turniri start ərəfəsindədir. Özü də dünyada ən nüfuzlu yarışlardan biri — “Qızıl Qran-Pri” turniri. Bu çox mötəbər idman hadisəsində bizi təkcə sərbəst güləşdə deyil, həm də yunan-Roma və qadın güləşində, yəni birdən-birə üç növdə maraqlı və gərgin görüşlər gözləyir.

Ümummilli liderin xatirəsini yad etmək, ona dərin ehtiramlarını bildirmək üçün otuz ölkənin güləş ustaları Azərbaycan paytaxtına toplaşmaqdadırlar. Sabah başlanıb iyulun 19-dək davam edəcək turnirin mükafatları uğrunda 400-ə qədər iştirakçının mübarizə aparacağı gözlənilir.

Təşkilatçıların 441 min manat məbləğində mükafat fondu təsis etmələri də qarşıdakı yarışın yüksək nüfuzundan xəbər verir. Hər çəki dərəcəsində qaliblərin uğuru 10 min manatla qiymətləndiriləcəkdir. Gümüş və bürünc mükafatçılar müvafiq surətdə 5 və 3 min manat qazanacaqlar.

Son illər paytaxtımız ikinci dəfə dünya güləşinin mərkəzinə çevrilir. 2007-ci ilin sentyabrında Heydər Əliyev adına İdman — Konsert Kompleksində keçirilmiş sərbəst güləş, yunan-Roma və qadın güləşi üzrə Pekin Olimpiadasına lisenziya xarakterli dünya çempionatında rekord miqdarda, səhv etmirəmsə, 103 ölkə nümayəndələri mübarizə aparmışdılar. Yenə bir çox ölkədən güləşin hər üç növünün ustaları Bakıya qonaq gəlirlər. Azərbaycan xalqının ümummilli lideri Heydər Əliyevin xatirəsinə həsr edilmiş “Qızıl Qran-Pri” turniri ölkəmizdə 2009-cu ilin ən əlamətdar idman hadisələrindən birinə çevriləcəkdir. Güləş həvəskarlarımız Bakı İdman Sarayında keçiriləcək yarışda bir çox mahir ustanın, o cümlədən dünya və Avropa, Olimpiya oyunları çempionlarının və mükafatçılarının ustalığını qiymətləndirmək imkanı qazanacaqlar. Bu turnirin həm də sentyabrda Danimarkada təşkil olunacaq növbəti dünya çempionatına hazırlıq baxımından əhəmiyyəti böyükdür.

Oqtay BAYRAMOV

Xalq qəzeti.- 2009.- 16 iyul.- S. 8.