Sumqayıt: layihələr inkişafın sürətləndirilməsinə xidmət edir

 

İyul ayının 22-də Azərbaycan Respublikasının Prezidenti cənab İlham Əliyevin sədrliyi ilə Nazirlər Kabinetinin 2009-cu ilin birinci yarısının sosial-iqtisadi inkişafının yekunlarına həsr olunmuş geniş iclasında dövlət başçımız dünyadakı maliyyə böhranına baxmayaraq, ölkəmizdə iqtisadi vəziyyətin sabit olduğunu, sosial vəziyyətin isə yaxşılaşdığını vurğulamış, ölkə üzrə ümumdaxili məhsulun 3,6 faiz artdığını, qeyri-neft sektorunda artımın 4,1 faiz olduğunu nəzərə çatdırmışdır.

 

Respublikamızda qazanılan uğurlar gənclik şəhəri Sumqayıtın da dinamik inkişafına geniş imkanlar yaratmışdır. Şəhər sakinlərinin rifah halının yaxşılaşdırılmasına, sosial problemlərin həllinə, infrastrukturun təkmilləşdirilməsinə yönəldilmiş bütün layihələr ölkə Prezidentinin Sumqayıta xüsusi diqqət və qayğısı nəticəsində öz həllini tapmışdır.

Sumqayıtda ilin birinci yarısının yekunlarına həsr edilmiş fəallar yığıncağında şəhər icra hakimiyyətinin başçısı Vaqif Əliyev hesabat məruzəsində bildirmişdir ki, şəhər iqtisadiyyatının əsas göstəricisi olan ümumi məhsul buraxılışının həcmi 167,3 milyon manat olmuş, ötən ilin müvafiq dövrü ilə müqayisədə 65,7 faiz təşkil etmişdir. Ümumi məhsul buraxılışında qeyri-dövlət sektorunun payı ötən ilin müvafiq dövrü ilə müqayisədə 17,3 faiz artaraq 82,1 faizə yüksəlmişdir.

Son 6 il ərzində şəhər üzrə məhsul buraxılışı və göstərilən xidmətlərin həcmi 3 dəfədən çox artmış, ümumilikdə 2 milyard 228 milyon manatdan çox olmuş, əhalinin həyat səviyyəsini səciyyələndirən nominal aylıq əmək haqqı 4 dəfədən çox artaraq 250 manat səviyyəsini ötmüşdür.

Şəhər üzrə bütün maliyyə mənbələri hesabına ayrı-ayrı sahələrin inkişafına 40 milyon manatdan çox investisiya qoyulmuşdur. Son 6 il ərzində isə şəhər üzrə ayrı-ayrı sahələrin inkişafına bütün maliyyə mənbələri hesabına ümumilikdə 1 milyard 395 milyon manatdan çox investisiya yönəldilmişdir.

Birinci yarımillik ərzində şəhərin orta, kiçik sənaye müəssisələrində zəruri məhsul çeşidləri istehsalının mənimsənilməsi istiqamətində mühüm addımlar atılmışdır. Ötən ilin eyni dövrü ilə müqayisədə qida məhsulları istehsalı 9,8 faiz, dəri və dəri məmulatları 2 dəfə, tikinti materialları istehsalı 2,1 dəfə artmışdır.

Bir sıra qeyri-dövlət müəssisələrində — “Azərbaycan Məişət Malları” ASC, “Ürətan LTD” MMC, Dəri istehsalı müəssisəsi, Parket istehsalı müəssisəsində məhsulun həcmi ötən ilin müvafiq dövrü ilə müqayisədə xeyli artmışdır.

İri diametrli şüşə lifli boru istehsalı zavodu “Azkompozit” MMC-də əlavə məhsul çeşidləri istehsalı mənimsənilmiş, biskvit-makaron, un məmulatları emalı müəssisəsi — “Bismak” Qida Sənaye Kompleksi MMC-də məhsul istehsalının həcminin və çeşidlərinin artırılması ilə bağlı əlavə korpusun tikintisi və avadanlıqların quraşdırılması işləri başa çatdırılmışdır. Qənnadı məmulatları emalı müəssisəsi — “Elitar” MMC-də məhsulun çeşidlərinin artırılması və satışının təşkili istiqamətində əhəmiyyətli işlər görülmüşdür.

Şəhər ərazisində inşası aparılan sənaye obyektlərindən 517 MVT gücündə Sumqayıt Elektrik Stansiyasının tikintisi başa çatdırılmış, sutkalıq gücü 200 min kubmetr olan məişət çirkab sularının təmizlənməsi qurğusunda, pambıq iplik istehsalı müəssisəsi — “İnter Tekstil” MMC-də, elektrik naqilləri və kabellər istehsalı müəssisəsində, xam kağız və karton istehsalı sahələri — “Sumqayıt Karton” MMC və Azərsun Holdinqin Sumqayıt fabrikində tikinti-quraşdırma işləri davam etdirilmişdir.

“Ağac emalı” ASC ilin əvvəlindən artan templə fəaliyyət göstərmişdir. Burada ötən ilin müvafiq dövrü ilə müqayisədə mebel və digər məhsulların istehsalı 5 dəfəyədək artmışdır. “Polimer” ASC-də boş sahələr icarəyə verilərək iri mebel istehsalı kompleksi yaradılır. “Dəmirbeton-1" müəssisəsində müxtəlif növlü üzlük daş istehsal edəcək yeni sahə yaranmış və fəaliyyətə başlamışdır.

2009-cu ilin 1-ci yarısında həyata keçirilən tədbirlər nəticəsində ümumilikdə 1524 yeni, daimi iş yeri yaradılmışdır və bundan 104-ü yeni açılmış təşkilatlarda, 358-i mövcud müəssisə və təşkilatlarda, 1062-si isə fəaliyyəti bərpa edilmiş müəssisələrdə olmuşdur.

Hesabat dövrü ərzində şəhərdə fəaliyyət göstərən fiziki şəxslərin sayı artaraq 8000-ə, hüquqi şəxslərin sayı isə 2000-ə çatmışdır. Kiçik və orta sahibkarlar tərəfindən 10 ticarət, 5 xidmət və 2 iaşə obyekti tikilib istifadəyə verilmişdir.

Vaqif Əliyev qeyd etdi ki, son illərdə həyata keçirilmiş iri miqyaslı abadlıq, yenidənqurma, tikinti-quraşdırma və təmir işləri nəticəsində bu ilin noyabrında 60 yaşını qeyd edəcək Sumqayıtın görkəmi gün–gündən dəyişməkdədir. Şəhərimiz, sözün əsl mənasında, müasir bir Avropa şəhərinə çevrilməkdədir. Bütün bunlar, sözsüz ki, dövlətimizin başçısının Sumqayıta, onun sadə əmək adamlarına göstərdiyi daimi diqqət və qayğının nəticəsində mümkün olmuşdur. Şəhərimizdə ölkə başçısının birbaşa dəstəyi ilə bir çox layihələr həyata keçirilmişdir.

Hesabat dövründə şəhərdə yüksəkmərtəbəli binaların tikintisi davam etdirilmişdir. 13 mənzil — tikinti kooperativi tərəfindən 20 korpusda tikinti işləri başa çatdırılmış, hazırda 19 binada tikinti işləri aparılmaqdadır, 6-da işlərin aparılması üçün hazırlıq görülür.

Yubiley ərəfəsində şəhərin görkəminə xüsusi yaraşıq verən hündürmərtəbəli binaların fasadlarının müasir üslubda rənglənməsi davam etdirilmişdir. İlin əvvəlindən 80 çoxmərtəbəli binanın fasadı rənglənmişdir. Ümumilikdə isə şəhərdə belə binaların sayı 231-dir. 16 binanın kürsü hissəsinə üzlük plitə vurulmuşdur, hazırda 1 binada bu iş davam etdirilir.

Şəhərdə bir sıra inzibati binalar, o cümlədən Dövlət Sosial Müdafiə Fondunun Sumqayıt şöbəsinin, Daşınmaz Əmlakın Dövlət Reyestri xidmətinin Ərazi idarəsinin, Maliyyə İdarəsinin binaları tikilib istifadəyə verilmişdir. 18-ci mikrorayonda Qarabağ müharibəsi əlilləri və şəhid ailələri üçün müasir tipli 36 mənzilli yeni yaşayış binasının tikintisi davam etdirilməkdədir.

Hesabat dövründə şəhərin mərkəzində ikimərtəbəli, müasir üslubda inşa edilmiş “Ağsaqqallar evi” istifadəyə verilmişdir. Uzunluğu 10 kilometr olan, istifadəyə yaramayan Şollar su xətti bütövlükdə yeni xətlə əvəz olunaraq istifadəyə verilmiş və şəhər əhalisinin suya tələbatını daha dolğun ödəməyə imkan yaratmışdır. “Heydər parkı” ərazisindən keçən 600 millimetrlik istismara yararsız 1300 poqonmetr su xətti yenisi ilə əvəz olunaraq parkın ərazisindən kənara çıxarılmışdır.

Şəhərin 10-cu mikrorayonu ərazisində Ü.Hacıbəyov küçəsində yeni istirahət parkı yaradılmışdır. Şəhərin girəcəyindəki “Tərəqqi” parkı yenidən bərpa olunmuşdur.

Hesabat dövründə ümumilikdə ərazilərə 100,5 min kvadratmetr asfalt örtüyü salınmışdır. Şəhərlə yanaşı qəsəbələrin abadlaşdırılması diqqət mərkəzində olmuşdur. İlin əvvəlində H.Zeynalabdin qəsəbəsinin küçələrinə 13,5 min kvadratmetr asfalt döşənmiş və bununla da qəsəbənin bütün yolları əsasən asfaltlanmışdır. Corat qəsəbəsinin küçələrinə 7,5 min kvadratmetr asfalt örtüyü salınmışdır.

Hər zaman olduğu kimi, şəhər ərazisinin işıqlandırılması diqqət mərkəzində saxlanılmış, “Bakı” küçəsində, şəhər icra hakimiyyətinin həyətində, Ü.Hacıbəyov küçəsindəki parkda dirəklər basdırılmış, ərazinin işıqlandırılması həyata keçirilmiş, digər prospekt və küçələrdə isə son tamamlama işləri davam etdirilmişdir. H.Zeynalabdin və Corat qəsəbələrində küçə və meydanların işıqlandırılması məqsədilə 114 ədəd fənər quraşdırılmış, 4 kilometrə yaxın kabel xətti çəkilmişdir.

Şəhərin yaşıllaşdırılmasına həmişə olduğu kimi xüsusi fikir verilmiş, park, xiyaban və küçələrdə müxtəlif ağac və kollar, yeni çeşidli dekorativ güllər əkilmiş, yaşıllığa qulluq edilən sahələr xeyli artmışdır.

Şəhər ərazisində əmələ gələn məişət tullantılarının vaxtlı-vaxtında yığılaraq daşınmasının müasir qaydalara uyğun təşkili, ümumilikdə tullantıların idarə olunması aparılan abadlıq və təmizlik işlərinin mühüm tərkib hissəsini təşkil edir. Şəhər icra hakimiyyəti başçısının müvafiq sərəncamı ilə yeni “Sumqayıt şəhər Təmizlik Departamenti” MMC yaradılmaqla bu işlərin təşkilində müəyyən irəliləyişə nail olunmuşdur. Departamentin texniki bazası möhkəmləndirilmiş, küçələrdə təmizlik işləri aparmaq üçün xüsusi təyinatlı yeni texnika alınmışdır. Əsasən şəhərin sənaye zonasında yerləşən və əvvəllər xidmət olunmayan ucqar küçələr departamentin xidmət sahəsinə daxil edilmişdir.

Hesabat dövrü ərzində əhaliyə elektrik enerjisi, təbii qaz, su və digər kommunal xidmətlər göstərilməsi sahəsində bir sıra təşkilati və texniki tədbirlər həyata keçirilmişdir. Ayrı-ayrı avadanlıqlar yeniləri ilə əvəz olunmuş, əlavə xətlər çəkilmiş, müasir sayğaclar quraşdırılmışdır. Bu işlərin görülməsi göstərilən xidmətlərin haqqının vaxtında ödənilməsinə də təsir etmişdir.

Bu gün şəhərdə sakinlərin içməli suya olan tələbatının ödənilməsində problem yoxdur. Bununla belə içməli suyun dəyərinin ödənişində problemlər tam aradan qaldırılmalıdır.

Hesabat dövründə “İstedad” liseyi və 5 nömrəli orta məktəb üçün inşa edilən əlavə korpuslar istifadəyə verilmişdir. 19 nömrəli orta məktəbdə 600 yerlik əlavə korpusun tikintisi tamamlanmış, 42 nömrəli məktəb üçün yeni məktəb binasının tikintisi başa çatmışdır. Şəhərin yubileyinə hazırlıq işləri çərçivəsində Uşaq və Yeniyetmələrin Yaradıcılıq Mərkəzində, öz ölçuləri ilə müasir Olimpiya Kompleksindən heç də fərqlənməyən 1 saylı Uşaq- Gənclər İdman məktəbində, Şahmat məktəbində müasir üslubda əsaslı təmir və yenidənqurma işləri davam etdirilir.

Artıq 7-ci ildir ki, yay tətilində şəhərdən kənarda istirahət etməyə imkanı olmayan şagirdlərin asudə vaxtının səmərəli təşkili, onların idmanla məşğul olmaları, ekskursiyalara, müxtəlif tədbirlərə cəlb edilmələri məqsədilə şəhər məktəblərində yay düşərgələri təşkil edilir. Azərbaycan Respublikası Prezidentinin Sərəncamı ilə 2009-cu ilin “Uşaq ili” elan edilməsi ilə əlaqədar bu il düşərgələrin işi daha da təkmilləşdirilmiş və çox maraqlı proqram əsasında qurulmuşdur.

Yay mövsümünün başlanması ilə əlaqədar şənbə və bazar günləri şəhər əhalisinə mədəni xidmət göstərilməsi məqsədilə mədəniyyət müəssisələri tərəfindən park və xiyabanlarda konsertlər təşkil edilir.

Şəhərin 60 illiyinə böyük töhfə olacaq Tarix Muzeyində əsaslı təmir və yenidənqurma işləri başa çatdırılmışdır. Hazırda tərtibat işləri aparılır. Hesabat dövründə S.Vurğun adına Mərkəzi Kitabxananın əsaslı təmiri başa çatdırılmış, yeni inventar və avadanlıqla tam təmin edilərək istifadəyə verilmişdir.

İlin əvvəlindən icra hakimiyyətinin təşəbbüsü ilə şəhərin 15 idarə və təşkilatının rəhbərləri tərəfindən yaşayış massivlərində sakinlərlə görüşlərin keçirilməsi davam etdirilmişdir. Hesabat dövründə 180 belə görüş keçirilmiş, bu görüşlərdə 6000 nəfərə yaxın sakin iştirak etmişdir. Sakinlərə şəhərdə aparılan abadlıq, quruculuq işləri barədə məlumat verilmiş, onlar tərəfindən 700-dən çox müxtəlif məsələ qaldırılmış və 200-ü araşdırılaraq yerində həll edilmiş, qalan məsələlərin araşdırılması və həlli ilə bağlı aidiyyəti idarə təşkilatlara rəsmi məktublar göndərilmiş və icrası nəzarətə götürülmüşdür.

Yubileylə əlaqədar may ayında “Sumqayıt —60: sosial-iqtisadi tərəqqi, inkişaf və nailiyyətlər” mövzusunda konfrans keçirilmiş və bu tədbirdə bir sıra nazirliklərin, Milli Elmlər Akademiyasının rəhbər vəzifəli məsul şəxsləri iştirak etmişlər. Eyni zamanda iyun ayında “Sumqayıt səhiyyəsi-60" mövzusunda konfrans da keçirilmişdir.

Prezident İlham Əliyev tərəfindən təsdiq edilmiş “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı” növbəti illərdə əhalinin həyat səviyyəsinin daha da yaxşılaşdırılmasına, ölkəmizin regionlarının daha da inkişaf etməsinə xidmət göstərəcəkdir. Proqramda Sumqayıt şəhəri üzrə 15 istiqamətdə tədbirlərin həyata keçirilməsi nəzərdə tutulmuşdur. Bunlar şəhər üçün çox mühüm əhəmiyyət kəsb edən, son nəticədə sakinlərin rifah halının , onlara göstərilən xidmətlərin daha da yaxşılaşdırılmasına yönəldilmiş irimiqyaslı tədbirlərdir.

İşgüzar şəraitdə keçən yığıncaqda qarşıda duran bütün vəzifələrin uğurla yerinə yetirilməsi əzmi ifadə edilmişdir.

 

 

Əli NƏCƏFXANLI,

 

Xalq qəzeti.- 2009.- 28 iyul.- S. 5.