Binəqədi rayonunda bu ilin birinci yarısının yekunları müzakirə olunmuşdur

Azərbaycan Respublikasının Prezidenti İlham Əliyevin Nazirlər Kabinetinin 2009-cu ilin birinci yarısının sosial-iqtisadi inkişafının yekunlarına həsr olunmuş iclasındakı nitqindən irəli gələn vəzifələr Binəqədi Rayon İcra Hakimiyyəti başçısı yanında Şuranın geniş iclasında müzakirə edilmişdir. İclasda rayonun sənaye müəssisələri, təsərrüfat xidmətləri, təhsil, səhiyyə ocaqlarının, hüquq-mühafizə orqanlarının rəhbərləri və rayon ictimaiyyətinin nümayəndələri iştirak etmişlər.

Tədbiri giriş sözü ilə açan Binəqədi Rayon İcra Hakimiyyəti başçısı Alı Qocayev bu ilin birinci yarısında ölkədə sosial-iqtisadi sahələrdə yüksək göstəricilər əldə edildiyini vurğulamış, bunun dövlət başçısı İlham Əliyevin apardığı uğurlu daxili və xarici siyasətlə bağlı olduğunu bildirmişdir. Natiq həmçinin qeyd etmişdir ki, Azərbaycan dövləti bütün sosial məsələlərin həlli istiqamətində səmərəli fəaliyyət göstərir və insanların həyat səviyyəsinin daha da yaxşılaşdırılması üçün müvafiq tədbirlər həyata keçirir.

İclasda icra hakimiyyəti başçısının müavini Vüsal İsmayılov rayonun sosial-iqtisadi inkişafının altı aylıq makroiqtisadi göstəriciləri barədə ətraflı məlumat vermişdir. O, göstərmişdir ki, rayon üzrə sözügedən dövrdə sənaye məhsulunun həcmi 60258,3 min manat təşkil etmişdir. Yanvar-iyun aylarında istehlakçılara 67146,6 min manatlıq sənaye məhsulu göndərilmişdir. Bu məhsulun 58860,3 manatlığı müəssisələrin öz istehsalıdır. Hesabat dövründə sənaye müəssisələrində 6506 nəfər işləmişdir. Rayon üzrə sənaye müəssisələrində əmək haqqı fondu 10646,6 min manat olmuşdur. Bu da ötən ilin müvafiq dövründən 12,5 faiz çoxdur. Orta aylıq əmək haqqı 327,3 manata çatmışdır. Bu isə əvvəlki ilin müvafiq dövründən 24,4 faiz çoxdur.

Natiq göstərmişdir ki, rabitə xidmətindən əldə olunan gəlir 1329,2 min manat təşkil etmişdir ki, bu da keçən ilin müvafiq dövründəkindən 2,7 dəfə artıqdır. Hesabat dövründə rabitə müəssisələrində 546 işçi çalışmışdır, onların orta aylıq əmək haqqı ötən ilin eyni dövrünə nisbətən 38,5 faiz artaraq 305,1 manat olmuşdur.

Əmək haqqının artımı nəqliyyat sahəsində də müşahidə olunur. Bu sahədə yanvar-iyun aylarında 4120 nəfər işçi çalışmışdır. Onların orta aylıq əmək haqqı 23,5 faiz artaraq 249,8 manata çatmışdır.

Pərakəndə əmtəə dövriyyəsi 400599,5 min manat olmuşdur. Bu da keçən ilin müvafiq dövrünə nisbətən 121,6 faiz təşkil edir. Əhaliyə göstərilən pullu xidmətlərin həcmi 83224,6 manat təşkil etmişdir. Xidmətlərin 22,8 faizi dövlət müəssisələrinin payına düşür.Pullu xidmətlərin 23,7 faizini məişət xidmətləri təşkil etmişdir. Yanvar-iyun aylarında 19716,7 min manatlıq və ötən ilin səviyyəsindən 17,2 faiz çox məişət xidmətləri göstərilmişdir.

V.İsmayılov daha sonra demişdir:

— Respublika Prezidenti cənab İlham Əliyev 2009-cu ilin altı ayının sosial-iqtisadi inkişafının yekunlarına dair Nazirlər Kabinetinin iclasında hesabat dövründə Azərbaycanda 35 min yeni iş iş yerinin açıldığını və onlardan 25 mininin daimi iş yeri olduğunu qeyd etmişdir. Yeni açılmış iş yerlərindən 636-sı Binəqədi rayonunun payına düşür. Ümumiyyətlə, 2003-cü ilin oktyabrın 1-dən 2009-cu ilin iyulun 1-nə qədər olan dövrdə rayonda 22703 yeni iş yeri açılmışdır.

İclasda digər sahələrin fəaliyyəti də təhlil edilmişdir. Bildirilmişdir ki, rayon ərazisindəki qaz xətlərində aparılan təmirlə yanaşı, əlavə olaraq müxtəlif ünvanlarda ümumi uzunluğu 10556 poqonometr müxtəlif diametrli borularla yeni qaz xətti çəkilmiş, 18 ədəd siyirtmə və 11 ədəd tənzimləyici şkaf quraşdırılmışdır. Əlbəttə, bu sevindirici haldır. Lakin bununla belə rayon Qaz İstismar İdarəsinin işində bu gün də müəyyən nöqsanlar mövcuddur. İstər əhali tərəfindən istifadə olunan təbii qazın dəyərinin yığılmasında, əhalinin fasiləsiz mavi yanacaqla təminatında, istərsə də baş vermiş qəzaların aradan qaldırılmasında yol verilən nöqsanlar sözügedən təşkilatın rəhbərliyinin və bu sahənin məsul işçilərinin öz xidməti vəzifələrinin icrasına laqeyd yanaşmalarının nəticəsidir...

Rayon Su Kəməri İstismarı və İstehsalat Zonasının işi demək olar ki, qənaətbəxşdir, lakin burada da bəzi nöqsanlar nəzərə çarpır. Belə ki, su kəmərlərində baş vermiş qəzaların vaxtında aradan qaldırılmaması müşahidə olunur ki, bu da insanlarda haqlı narazılıq yaradır.

V.İsmayılov həmçinin bildirmişdir ki, cari ilin birinci yarısında Binəqədi və Biləcəri enerji təchizatı və satışı sahələri tərəfindən bir sıra yeni elektrik transformatorları quraşdırılmış, köhnə xətlər təmir olunmuş, hava xətləri yeraltı kabellərlə əvəz edilmiş və 1800 yeni tipli elektrik sayğacı quraşdırılmışdır.

İclasda ekoloji mühitin sağlamlaşdırılması ilə bağlı rayonda görülmüş işlər haqqında da məlumat verilmişdir. Göstərilmişdir ki, Bakı-Şamaxı yolunun Binəqədi rayonuna aid olan hissəsində, 7-8 və 9-cu mikrorayonların ərazisində, yol kənarlarında 12000-dən çox ağac və bəzək kolu əkilmişdir. Ağacların kəsilməsinə son qoyulmuşdur...

İclasda həllini gözləyən problemlər, çatışmazlıqlar və onların aradan qaldırılması yolları, habelə vətəndaşların müraciətləri ilə əlaqədar məsələlər geniş müzakirə olunmuşdur.

Yığıncaq Şura iclasının qərar layihəsinin oxunması ilə başa çatmışdır.

Vaqif BAYRAMOV

Xalq qəzeti.- 2009.- 30 iyul.- S. 5.