Dövlətin diqqət və qayğısı “Azərikimya”nı iqtisadi böhrandan qorumuşdur

Bu gün şirkətdə istehsalat sahələrinin genişləndirilməsi, yeni texnologiyaların tətbiqi, keyfiyyətin yüksəldilməsi ilə bağlı məqsədyönlü tədbirlər həyata keçirilir

“Azərikimya” Dövlət Şirkəti müəssisələrinin istehsal etdiyi və dünya bazarında tələbatın yüksək olduğu neft-kimya və kimya məhsullarının istehsal həcmi və keyfiyyəti ildən-ilə artırılır. Təsadüfi deyildir ki, son iki ildə şirkətin məhsulları beynəlxalq qurumlar tərəfindən “Keyfiyyət və biznes prestijinə” görə “Qızıl” mükafata və digər yüksək təltiflərə layiq görülmüşdür.

Geniş texnoloji-istehsalat və güclü kadr potensialına, zəngin əmək ənənələrinə malik “Azərikimya” Dövlət Şirkəti dünya iqtisadiyyatındakı mövcüd problemlərə baxmayaraq, son illərdə, eləcə də bu ilin birinci yarısında neft-kimya məhsullarının istehsalı sahəsindəki nailiyyətlərini davam etdirmişdir. Bir çox dünya ölkələrinin iqtisadiyyatına təsiri olan qlobal iqtisadi böhran Azərbaycandan yan keçməsə də, kimyaçılarımızın istehsalat ahəngini zəiflətməmişdir. Nazirlər Kabinetinin 2009-cu ilin birinci yarısında sosial-iqtisadi inkişafın yekunları ilə bağlı keçirilmiş geniş iclasında Azərbaycan Prezidenti cənab İlham Əliyev ölkə iqtisadiyyatının elə bir ciddi dəyişikliyə uğramadan sabit inkişafını xüsusi qeyd etmişdir. Bütün dünyanın nəhəng firma və şirkətlərinin belə, ağır böhran keçirdiyi bir dövrdə respublikamızın iqtisadiyyatının inkişaf ahənginin qorunub-saxlanmasına səbəb olan əsas amillərindən biri dövlətimizin yalnız neft sektorunun deyil, həm də qeyri-neft sektorunun tərəqqisinə göstərdiyi diqqət və real qayğıdır. Məhz bunun nəticəsidir ki, Azərbaycan iqtisadiyyatı dünyanın ən qabaqcıl ölkələrinin üzləşdiyi maliyyə böhranı fonunda qətiyyətlə duruş gətirməyi bacarmışdır.

Ölkə kimyaçılarının qarşıya çıxa bilən hər cür çətinliklərin öhdəsindən uğurla gəlmək, istehsalat ahəngini, iş ritmini qoruyub-saxlamaq əzmi ilə yanaşı, Azərbaycanın neft-kimya kompleksinin güclü və etibarlı texnoloji bazaya, ən müxtəlif kimyəvi məhsulların istehsalını təmin edə bilən texnoloji qurğu və unikal avadanlıqlara malik olması respublikamızın kimya sənayesinin sabit fəaliyyətinin əsasını təşkil edir.

Kimya sənayesinin nəinki dünən və bu gün, hətta on illər sonra da dinamik inkişafını təmin etməyə qadir olan belə bir böyük istehsalat kompleksini, bu cür zəngin texnoloji bazanı, nəhəng qurğu və avadanlıqları isə ulu öndərimiz, öz dahiyanə fəhmi ilə gələcəyi irəlicədən görmək, duymaq qüdrətinə malik olmuş Heydər Əliyev müasir Azərbaycanımızın tərəqqisi üçün hələ neçə illər əvvəl məqsədyönlü və ardıcıl şəkildə gördüyü strateji tədbirlər sayəsində əbədi bir miras kimi xalqımıza yadigar qoymuşdur.

Onu deyim ki, dahi şəxsiyyət Heydər Əliyev hakimiyyətə gəldikdən sonra onun qətiyyəti və iradəsi sayəsində Azərbaycanın kimya sənayesinin yenidən qurulmasında, müasirləşməsində əsaslı dönüş mərhələsi başlandı. Məhz Heydər Əliyev Azərbaycan iqtisadiyyatında kimya kompleksinin roluna xüsusi əhəmiyyət verdiyindən özünəməxsus müdriklik, qətiyyət və inadkarlıqla SSRİ-nin o vaxtkı rəhbər orqanlarında Azərbaycanın neftçıxarma və neft-kimya sənayesində əsaslı yenidənqurmanın inkişafı üçün xüsusi hökumət qərarlarının qəbul edilməsinə nail olmuşdu. 1971-ci ildə respublikada kimya sənayesinin qarşısında duran həlli vacib məsələləri diqqətlə araşdıran Heydər Əliyev ilk növbədə bu sahənin bütün texniki-iqtisadi və sosial baxımdan yeniləşdirilməsi proqramının yaradılması işini təşkil etməklə kimya sənayesinin inkişaf konsepsiyasının əsasını qoydu. Dahi öndərin SSRİ-də böyük nüfuza malik olması, mövqe prinsipiallığı, işə gündəlik nəzarəti, eyni zamanda köməyi obyektlərin müəyyənləşdirilmiş vaxtda tikilib istifadəyə verilməsi üçün yüksək tələbkarlığı sayəsində neft emalı və kimya müəssisələrinin yenidən qurulması dövrün reallığına çevrilmişdi.

Hələ ötən əsrin 70-80-ci illərində keçmiş Sovet İttifaqı rəhbərliyini Azərbaycanın kimya sənayesinin gələcək sürətli inkişafı naminə “EP-300” və “Polimir-120” kimi müasir istehsalat komplekslərinin məhz Sumqayıtda inşasının labüdlüyünə inandırmış və şəxsi iradəsi, qətiyyəti və böyük nüfuzu sayəsində öz məqsədinə nail olmuş ulu öndər artıq XXI əsrin əvvəllərində — ölkəmizin müstəqillik əldə etdiyi, lakin sənaye sahələrinin, o cümlədən kimya sənayesinin kəskin enerji böhranı ilə üzləşdiyi ağır bir dövrdə daha bir nəhəng kompleksin - unikal buxar-generator qurğusunun Yaponiyadan dövlət zəmanəti üzrə kreditlə alınaraq, onun inşasını qısa bir müddət ərzində reallığa çevirə bilmişdi. Məhz uzaq perspektiv nəzərə alınmaqla inşa olunmuş həmin komplekslərin sayəsində bu gün “Azərikimya” Dövlət Şirkəti müəssisələrinin ahəngdar işi, 8000-dən artıq kimyaçının iş yerlərinin qorunub-saxlanması təmin olunmuşdur. Bütün bunları bir daha yada salaraq, dahi rəhbərimizin Azərbaycanın neft-kimya sənayesinin inkişafındakı çox böyük və əvəzsiz xidmətlərini bütün aydınlığı və əzəməti ilə dərk etməli oluruq. Bu gün obrazlı şəkildə tam inam və fərəhlə demək olar ki, bilavasitə ulu öndər Heydər Əliyevin təşəbbüsü və qətiyyəti, ilk növbədə isə vətənpərvərliyi sayəsində inşa edilmiş həmin nəhəng komplekslər bu dahi şəxsiyyətin kimya sənayesinə göstərdiyi diqqət və qayğıya elə onun özü tərəfindən ucaldılmış “istehsalat abidələri” kimi qalmaqdadır və onlar hələ uzun illər xalqımıza xidmət edəcəkdir.

Bəli, ulu öndərimiz Heydər Əliyevin respublika rəhbərliyinə gəldiyi 1969-cu ildə də, qüdrətli xilaskar kimi yenidənt hakimiyyətə qayıtdığı 1993-cü ildə də böyük uzaqgörənlik və dahicəsinə gördüyü geniş miqyaslı, bütün dünyaya səs salan qlobal tədbirlər yalnız kimya və neft-kimya sənayesini deyil, bütövlükdə Azərbaycanı üzləşdirdiyi həm iqtisadi, həm də siyasi bəlalardan qurtarmaqla yanaşı, müstəqillik əldə etmiş Vətənimizin bugünkü yüksək sürətli, dünyanı heyrətdə qoyan inkişafının möhkəm təməlini qoymuşdur. Bütün dünyanın siyasi xaos və müharibə alovları ilə üzləşdiyi, nəhəng dövlətlərin siyasi-iqtisadi maraqlarının kəskin toqquşduğu mürəkkəb bir dövrdə dahi rəhbərin neft strategiyasında seçdiyi yeganə düzgün yol bu gün Azərbaycanı sabit inkişaf magistralına çıxarmış, bütün lider dövlətlərin Azərbaycana olan münasibətində köklü müsbət dəyişiklik yaratmış, ona olan diqqət və marağı artırmışdır.

Məhz Heydər Əliyev dühasının bəhrəsidir ki, bir zamanlar SSRİ-dən kənarda o qədər də yaxşı tanınmayan Azərbaycan indi dünyanın bütün qitələrində tanınır. Həm də təkcə neft və qaz ehtiyatları ilə zəngin bir ölkə kimi yox, eyni zamanda, yüksək inkişaf yolunda olan, güclü iqtisadiyyata malik bir ölkə kimi!..

Bu gün bunu da böyük bir qürur hissi ilə etiraf etməliyik ki, Heydər Əliyev siyasətinin layiqli davamçısı İlham Əliyevin həyata keçirdiyi bir sıra strateji xarakterli tədbirlərin nəticəsi olaraq Azərbaycanın bir çox sənaye sahələrində olduğu kimi, kimya və neft-kimya sənayesində də dünyanı sarsıtmaqda olan qlobal iqtisadi böhran öz fəsadlarını geniş şəkildə göstərə bilməmişdir. Bir çox dünya ölkələrinin nüfuzlu şirkət və firmalarını, sənaye və kənd təsərrüfatını az qala iflic vəziyyətinə salmış maliyyə böhranı Azərbaycan iqtisadiyyatının müxtəlif sahələrinin, həmçinin kimya kompleksinin fəaliyyətinə müəyyən təsir göstərsə də, butövlukdə müəssisələrin iş rejimində ciddi maneəyə çevrilməmişdir. Ölkə kimyaçıları buna ulu öndərimizin müdrik daxili və xarici siyasətinin layiqli davamçısı, dövlətimizin başçısı İlham Əliyevin kimya sənayesinə, onun inkişafına göstərdiyi daimi diqqət və qayğının sayəsində nail ola bilmişlər. Təkcə bunu demək kifayətdir ki, son illər ərzində neft sindromunun bütün dünyada iqtisadi problemlərlə müşayiət olunmasına baxmayaraq, bilavasitə ölkə rəhbərinin qayğısının real nəticəsi kimi respublikamızın kimya müəssisələrinin xammalla və enerji daşıyıcıları ilə təchizatında heç bir fasilə, heç bir çətinlik nəzərə çarpmamışdır.

Kimyaçılarımız böyük fərəh hissi duyurlar ki, ölkə Prezidenti İlham Əliyevin apardığı uğurlu iqtisadi siyasətin nəticəsi olaraq Azərbaycanda kimya və neft-kimya sahəsinin inkişafı üçün yeni və daha böyük perspektivlər açılmaqdadır. Bu gün onlarla adda və çox qiymətli, yüksək keyfiyyətli kimyəvi məhsullar dünyanın 30-dan artıq ölkəsinə ixrac edilir. Beynəlxalq bazarda özünə layiqli yer tutmuş Azərbaycanın neft-kimya kompleksinin ən müasir texnologiyalar və yüksək məhsuldarlıqlı avadanlıqlar əsasında yenidən qurulması, habelə tələbatın daha yüksək olduğu yeni kimya məhsullarının istehsalına başlanılması istiqamətində aparılan geniş miqyaslı işlər yaxın gələcəkdə ölkəmizi kimya sənayesi məhsullarının istehsal həcmi və keyfiyyəti baxımından dünyanın aparıcı, lider dövlətlərindən birinə çevirəcəkdir. Hələ bugünün özündə belə “Azərikimya” Dövlət Şirkəti müəssisələrinin istehsal etdiyi onlarla qiymətli kimya və neft-kimya məhsulları dünyanın ən qabaqcıl və yüksək inkişaf etmiş ölkələrinin - Rusiya, Çin, Türkiyə, İran, Yunanıstan, Ukrayna, Hollandiya və s. dövlətlərin nüfuzlu firma və şirkətləri tərəfindən yüksək tələbatla alınır. Məmnunluq doğuran haldır ki, şirkətimizin ən qiymətli və yüksək keyfiyyətə malik məhsullarına - yüksək təzyiqli polietilenə və mütləqləşdirilmiş izopropil spirtinə (MİPS) olan tələbat yüksək olduğundan onların sifarişləri üzrə ən azı yarım il qabaqcadan müraciətlər daxil olur. Bu da onunla bağlıdır ki, həmin məhsullar öz keyfiyyətinə görə onların istehsalçısı olan digər xarici ölkə müəssisələrinin məhsullarından xeyli üstündür. Bu, bütün dünya miqyasında keyfiyyətə nəzarət edən beynəlxalq assosiasiyalar tərəfindən də rəsmi olaraq təsdiqlənmişdir. Məsələn, “Sintezkauçuk” zavodunda istehsal edilən ”MİPS"in keyfiyyət göstəricisi 99,99-a bərabərdir ki, bu da dünyada həmin məhsulun istehsalçısı olan firmalar arasında ən yüksək nəticədir. Buna görə də onun potensial alıcıları həmin məhsulu məsafə baxımından özlərinə daha yaxın və Avropa Birliynə daxil olan qonşu ölkələrdən deyil, qat-qat uzaq olan Azərbaycandan almağa üstünlük verirlər. Bu da təsadüfi deyildir ki, məhz bizim istehsal etdiyimiz “MİPS” onun istehsalçısı olan firma və müəssisələr arasında öz yüksək keyfiyyət göstəricilərinə görə beynəlxalq qurumlar tərəfindən “Arka Avropa” qızıl mükafatına layiq görülmüşdür.

Kimyaçılarımız üçün böyük fərəh doğuran haldır ki, bu ilin əvvəllərində “Üzvi sintez” zavodu Beynəlxalq Kommersiya Rəhbərləri Klubunun (Madrid) qərarı ilə ”Texnologiya və keyfiyyətə görə” beynəlxalq mükafatına, bütünlükdə isə “Azərikimya” Dövlət Şirkəti Beynəlxalq İdarəetmə və Məsləhətləşmə Assosiasiyasının (Fransa) qərarı ilə “Keyfiyyət və biznes prestijinə görə” Qızıl mükafata layiq görülmüşdür.

***

Əlbəttə, bütün bunlar dövlətimizin diqqət və qayğısına cavab olaraq kimyaçılarımızın gərgin əməyinin, əzmkarlığının real nəticəsidir. Bunu ötən illərin və bu ilin istehsalat göstəriciləri də təsdiq edir. Təkcə bunu demək kifayətdir ki, son 5 il ərzində — 2003-cü illə müqayisədə ötən il əmtəəlik məhsul istehsalı həcmi 2,3 dəfədən çox, həmin dövr ərzində məhsul ixracı 3,6 dəfə artmışdır. Bu da respublikaya xarici valyuta axınına müsbət təsir göstərmişdir. Bu nailiyyətlər həm kimyaçılarmızın onlara son illərdə göstrilən diqqət və qayğıya cavab olaraq hər bir iş yerində məsuliyyət və diqqətinin, əzmkarlığının daha da artması nəticəsində əmək məhsuldarlığının yüksəlməsi (bir işçiyə düşən məhsul istehsalının həcmi rekord səviyyədə - 2,57 dəfə artmışdır), həm də xammaldan, enerji daşıyıcılarından qənaətlə istifadə edilməsi nəticəsində 1 manatlıq məhsul istehsalına çəkilən xərcin 109,8 (ziyan olaraq!..) qəpikdən 79,2 qəpiyə salınması (30,6 qəpik fərqlə) sayəsində mümkün olmuşdur. Bütün bunların nəticəsi kimi şirkətin ümumi əmək haqqı fondu 2,2 dəfə, müvafiq olaraq isə kimyaçılarımızın orta aylıq əmək haqqı 2,5 dəfə artmışdır. Bu ilin 6 ayı ərzində isə əməkçilərimizin orta aylıq maaşı ötən ilin müvafiq dövrünə nisbətən daha 14,4 faiz artmışdır.

***

Əldə olunmuş uğurlarda əmək və texnoloji intizamın yüksəlməsi, kimyaçıların əzmkarlığı ilə yanaşı, iş şəraitinin yaxşılaşdırılması, hər bir işçinin sağlamlığının qorunmasının və istehsalat təhlükəsizliyinin təmin edilməsi istiqamətində şirkət üzrə görülən tədbirlərin daha ciddi və müntəzəm xarakter almasıdır. Çünki kimya müəssisələri təhlükə ehtimalının nisbətən daha çox olduğu obyektlərdir. Bu səbəbdən də şirkət üzrə və müəssisələrdə keçirilən müşavirələrdə əməyin mühafizəsi, təhlükəsizlik texnikası və yanğın təhlükəsizliyi məsələləri geniş və ciddi şəkildə müzakirə olunur, əməkçilərə sağlam və təhlükəsiz əmək şəraitinin yaradılmasına yönəldilmiş tədbirlər həyata keçirilir. Bu gün bütün sex və istehsalat rəisləri, digər məsul işçilər çox yaxşı bilirlər ki, onlardan hər biri məhsul istehsalındakı kəm-kəsirdən öncə işçilərin təhlükəsizliyində yol verə biləcəkləri hər hansı bir məsuliyyətsizliyə, laqeyd münasibətə görə daha ciddi cəzalandırıla bilərlər. Ölkə Prezidenti İlham Əliyevin Nazirlər Kabinetinin bu il iyulun 22-də keçirilmiş iclasında Bakı və onun ətraf ərazilərində, bütünlükdə Abşeron yarımadasında, o cümlədən Sumqayıtda da ekoloji vəziyyətin yaxşılaşdırılmasında yaşıllaşdırma tədbirlərinə xüsusi əhəmiyyət verməsi bu sahədə aparılan işlərə dövlət rəhbərinin necə böyük diqqət göstərdiyni, ilk növbədə, əhalınin sağlamlığını ön plana çəkdiyini, görülən yaşıllaşdırma işlərinin son dərəcə vacib, hətta sosial-iqtisadi baxımdın da böyük əhəmiyyətə malik olduğunu təsdiq edir. Ölkə başçısının ekologiyanın qorunması, yaşıllığın genişləndirilməsi ilə bağlı tövsiyələrini mühüm bir tapşırıq kimi qəbul edən kimyaçılarımız bu sahədə gördükləri geniş miqyaslı işləri bundan sonra daha böyük həvəslə davam etdirmək, Sumqayıtın bütün sənaye zonasını yaşıllığa bürümək əzmindədirlər.

...Artıq dördüncü ildir ki, şirkətin və onun müəssisələrinin ərazisində müntəzəm olaraq və ardıcıllıqla aparılan yaşıllaşdırma işləri də bilavasitə insan amilini əsas tutmaqla, kimyaçılarımız üçün ekoloji cəhətdən daha təmiz və sağlam iş şəraitinin yaradılmasına xidmət edir. Açığını etiraf etmək lazımdır ki, hələ 2006-cı ilin əvvəllərində yaşıllaşdırma işlərinin kütləvi və daimi xarakter alması üçün tədbirlərə başlayanda bir çoxları bu işin müvəqqəti, ötəri olacağını düşünsə də, son iki ildə zavodətrafı ərazilərdə boy verməkdə olan həmişəyaşıl ağaclar, meyvə tingləri, bəzək kolları indi zövq oxşadığından həmin insanlarda yaşıllığa münasibət dəyişmiş, onu artırmaq həvəsi yaratmışdır. Bu gün fərəhlə deyə bilərik ki, Heydər Əliyev Fondunun prezidenti, YUNESKO və İSESKO-nun xoşməramlı səfiri Mehriban xanım Əliyevanın “Hərəyə bir ağac əkək!” təşəbbüsündən ruhlanan kimyaçılarımızın yaşıllaşdırma sahəsində başladıqları iş daha geniş vüsət almışdır. Yalnız son dövr ərzində kimyaçılarımız tərəfindən zavodətrafı ərazilərdə, həmçinin magistral yollar boyunca 42 mindən artıq (hərəyə bir yox, 5 ədəd!) ağac əkilmiş, yeni yaşıllıq və istirahət sahələri salınmışdır. Bütün bunlar, əlbəttə ki, ilk növbədə kimyaçılarımızın, bütünlükdə Sumqayıt sakinlərinin sağlamlığına, ekoloji vəziyyətin yaxşılaşdırılmasına xidmət edir.

***

Bu gün ölkə iqtisadiyyatının inkişafında və ixrac potensialının artmasında mühüm rol oynayan “Azərikimya” Dövlət Şirkətində istehsalat sahələrinin genişləndirilməsi, yeni texnologiyaların tətbiqi və məhsulların keyfiyyətinin dünya standartlarına çatdırılması sahəsində aparılan məqsədyönlü tədbirlər onun sabahkı güclü və sürətli inkişafı üçün real zəmin yaradır.

Azərbaycan Respublikası Prezidentinin neft-kimya sənayesinin daha da inkişaf etdirilməsi və istehsalata ən müasir texnologiyaların tətbiqi ilə bağlı tapşırıqlarına uyğun olaraq “Azərikimya” Dövlət Şirkətinin Azərbaycanda ən yüksək beynəlxalq standartlara cavab verən yeni neft-kimya və gübrə kompleksinin yaradılması sahəsində apardığı işlər bu gün dünyanın bir çox aparıcı neft-kimya şirkətlərinin diqqət mərkəzindədir.

İnşasının yaxın dövrdə başlanılması nəzərdə tutulan yeni neft-kimya kompleksinin texniki-iqtisadi əsaslandırma sənədlərinin hazırlanaraq, başa çatdırılması istiqamətində son illər şirkət rəhbərliyi tərəfindən real nəticələrə nail olunmaqla intensiv iş aparılmaqdadır. Son iki il ərzində yeni komplekslə bağlı müvafiq sənədlər bütün prosedur qaydalarına uyğun olaraq dünyanın ən qabaqcıl şirkətləri ilə birlikdə hazırlanmış və beynəlxalq banklar və investorlar tərəfindən qəbul edilmişdir. Bu işlərin birinci, ilk mərhələsində “Technip” firması tərəfindən yalnız respublikamızın müxtəlif daxili xammal ehtiyatları bazası əsasında yeni neft-kimya kompleksinin prinsipial konsepsiyası hazırlanmışdır. İkinci mərhələ ”Nexant” firması tərəfindən yeni neft-kimya və gübrə kompleksləri üçün texniki-iqtisadi əsaslandırma sənədlərinin hazırlanması ilə bağlıdır. Bu mərhələdə maliyyə məsləhətçisinin iştirakı ilə “Societe Generale” bankı ilə və hüquq məsləhətçisinin “White & Jase” firması ilə birgə layihənin mümkün olan maliyyə mənbələrinin analizi ilə kommersiya və korporativ strukturu üzərində iş aparılmışdır.

Xüsusilə qeyd etmək lazımdır ki, yeni yaradılacaq neft-kimya və gübrə kompleksi Aralıq dənizi ilə Xəzər regionu hövzəsində ən müasir və ən yüksək texnologiyalar tətbiq edilən dünya səviyyəli bir layihədir. Layihədə “Exxon Mobile” (ABŞ), “İneos” (İngiltərə), “Basell” (Hollandiya), “Uhde” (“Thysenn Krupp” - Almaniya), “Technip” (Fransa), KBR (İngiltərə) firmalarının müasir texnologiyalarının tətbiqi nəzərdə tutulmuş və əməkdaşlıq haqqında memorandum imzalanmışdır. Bu dünya səviyyəli transmilli firma və şirkətlər kimya və neft-kimya məhsullarının, xüsusilə də poliefirlər, gübrə və digər üzvi sintez məhsullarının istehsalı üzrə dünya liderləridirlər. Hazırda “Azərikimya” Dövlət Şirkətində layihənin reallaşdırılması işləri yüksək texniki səviyyədə həyata keçirilir. Heç şübhəsiz ki, əsası ümummilli liderimiz Heydər Əliyev tərəfindən qoyulmuş yeni neft strategiyasının uğurla həyata keçirilməsi ölkəmizdə neft-kimya sənayesinin də dinamik inkişafı üçün böyük perspektivlər açacaqdır. Möhkəm özülə malik bu strategiya Azərbaycanı nəinki dünyanı sarsıdan iqtisadi və maliyyə böhranlarından qətiyyətlə qoruyacaq, hətta ölkəmizin güclü və qüdrətli iqtisadiyyata malik bir ölkə kimi liderlər sırasında olmasını etibarlı və dönməz şəkildə təmin edəcəkdir.

Məcid KƏRİMOV,

“Azərikimya” Dövlət Şirkətinin prezidenti,

Milli Məclisin deputatı, əməkdar elm xadimi

Xalq qəzeti.- 2009. 30 iyul.- S. 4.