“... Var olsun amalım!”

Neçə illərdən bəri yaşayan ənənəyə görə, may ayının son günləri ölkəmizdə böyük şairimiz Mirzə Ələkbər Sabirin şərəfinə poeziya günləri keçirilir. Bu ənənənin əsası 40 il əvvəl — 60-cı illərin sonlarında qoyulmuşdur. İlk dövrlərdə Sabir Poeziya Günləri xalq şairi Rəsul Rzanın təşkilatçılığı ilə keçirilmişdir. Sonralar uzun müddət bu tədbirin təşkilatı işlərinə xalq şairi Qabil rəhbərlik etmişdir. Son üç ildə isə Azərbaycan Yazıçılar Birliyi Sabir Poeziya Günlərinin təşkilatçılıq işlərini tanınmış şair Əjdər Ola həvalə etmişdir.

Bu illərdə poeziya günlərinin proqramı daha da zənginləşmiş, əhatə dairəsi və coğrafiyası genişlənmişdir. İndi Sabirin şərəfinə poeziya bayramları təkcə ölkəmizin paytaxtı Bakıda və şairin doğma yurdu Şamaxıda deyil, həm də hər il respublikamızın bölgələrindən birində keçirilir. Bu il Sabir poeziya bayramının estafetini qəbul etmək şərəfi İsmayıllı rayonuna nəsib olmuşdu.

Bu ildən başlayaraq Sabir Poeziya Günlərinin təşkilatçısı sırasına Yazıçılar Birliyi ilə yanaşı, Mədəniyyət və Turizm Nazirliyi də qoşulmuşdur ki, bu da tədbirlərin daha əhatəli, daha vüsətli keçirilməsinə imkan yaratmışdır.

Ənənəyə uyğun olaraq, tədbir iştirakçıları mayın 30-da səhər tezdən paytaxtımızda M.Ə.Sabirin adını daşıyan bağa toplaşdılar. Əsaslı təmir və abadlaşdırmadan sonra daha da gözəlləşmiş Sabir bağı həmin yaz səhəri çox füsünkar görünürdü. Azərbaycan Yazıçılar Birliyinin, Mədəniyyət və Turizm Nazirliyinin təmsilçilərinin, tanınmış qələm adamları və kütləvi informasiya vasitələri nümayəndələrinin toplandığı bu mərasimdə böyük şairin xatirəsi yad edildikdən sonra onun möhtəşəm abidəsi qarşısına tər çiçək dəstələri düzüldü.

Bundan sonra tədbir iştirakçıları Şamaxı şəhərinə yola düşdülər. Şamaxıda paytaxtdan gəlmiş qonaqlar rayon ictimaiyyətinin nümayəndələri ilə birgə şairin məqbərəsini ziyarət edərək məzarı üzərinə gül dəstələri qoydular. M.Ə.Sabir bütün Azərbaycanın şairidir, amma hər halda onu Vətənimizə öz tarixi ənənələri ilə məşhur olan Şamaxı torpağı bəxş etmişdir. Xaqani, Nəsimi, Seyid Əzim kimi ulu sələfləri ilə yanaşı, Sabir də bu şəhərin adını xalqımızın mədəniyyət tarixinə əbədi yazmışdır. Təəssüf doğuran cəhətdir ki, Şamaxının yerli hakimiyyət orqanları bu böyük sənətkarların, o cümldən də Sabirin adı ilə fəxr eləməklə işlərini bitmiş hesab edirlər. Sabir poeziya günlərinin ənənəvi olaraq hər il keçirildiyini, tədbirlər marşrutunun mütləq Şamaxıdan da keçdiyini bilə-bilə tədbirə layiqli hazırlıq işləri görülmür. Şairin məzarı yerləşən qəbiristanlığın yolu bərbad, məqbərəsi və onun ətrafı baxımsız vəziyyətdədir.

Böyük şairin məzarını ziyarətdən sonra poeziya günlərinin iştirakçıları Sabir poeziya bayramının keçiriləcəyi İsmayıllı rayonuna yola düşdülər.

Dağlar qoynunda yerləşən İsmayıllı şəhərinin mərkəzi meydanı bayramsayağı bəzədilmişdi. Meydana şəhərin sakinlərindən başqa, əsasən rayonun ziyalıları və bir də həmin gün özlərinin “son zəng”lərini qeyd edən bayram əhval-ruhiyyəli məktəblilər toplaşmışdılar.

Bakıdan gələn qonaqlar rayon nümayəndələrilə birgə ümummilli liderimiz Heydər Əliyevin meydanda ucalan əzəmətli heykəli qarşısına gül-çiçək dəstələri düzdükdən sonra ulu öndərin adını daşıyan muzeyin ekspoziyası ilə tanış oldular. Burada ümummilli liderimizin həyat və fəaliyyətini əks etdirən eksponatlarla yanaşı, İsmayıllı rayonunda yaşayan ustaların əl işi olan tətbiqi sənət nümunələri də nümayiş etdirilir.

Sonra meydanda möhtəşəm poeziya və musiqi bayramı keçirildi. Sabir Poeziya Günlərinin təşkilat qrupunun rəhbəri şair Əjdər Ol tədbiri açaraq böyük şairin poeziyası haqqında giriş sözündən sonra İsmayıllı Rayon İcra Hakimiyyətinin başçısı Nizami Ələkbərovu tribunaya dəvət etdi. N. Ələkbərov qonaqları salamlayaraq Sabirin xatirəsinin və sənətinin bütün Azərbaycan xalqı kimi, İsmayıllı camaatı üçün də çox əziz olduğunu bildirdi. İcra başçısı Azərbaycan Prezidenti cənab İlham Əliyevin xüsusi diqqət və qayğısı ilə İsmayıllı rayonunda görülən işlər, aparılan abadlıq tədbirləri haqqında məlumat verdi.

Sonra söz Azərbaycan Yazıçılar Birliyinin sədri, xalq yazıçısı Anara verildi. Anar müəllim meydana toplaşan poeziya həvəskarlarını salamladı, həmin gün həm də unudulmaz “son zəng” bayramlarını qeyd edən məktəbliləri xüsusi təbrik etdikdən sonra Sabir sənətinin ədəbiyyat tariximizdəki əzəmətli mövqeyindən, Sabir Poeziya Günlərinin keçirilməsi ənənələrindən danışdı. Azərbaycan Mədəniyyət və Turizm Nazirliyinin şöbə müdiri, şair Vaqif Bəhmənli öz çıxışında bu il Sabir Poeziya Günlərinə həsr olunmuş poeziya almanaxının nəşri ənənəsinin də bərpa olunacağını bildirdi. Poeziya bayramının qonağı, Gürcüstan Yazıçılar Birliyinin sədri, tanınmış şairə Maqlava Qonaşvili, xalq yazıçısı Gülhüseyn Hüseynoğlu, şairlərdən Yusif Həsənbəy, Oqtay Rza, Musa Yaqub, Firuzə Məmmədli, Rəfiqə Nuray, Taleh Həmid, Həzi Həsənli, Maarif Soltan, Adil Cəmil, Tofiq Nurəli, AMEA-nın müxbir üzvü, professor Teymur Kərimli və başqalarının səmimi çıxışlarını, oxuduqları şeirləri tamaşaçılar hərarətlə qarşıladılar.

Tanınmış bədii qiraət ustası, əməkdar artist Ağalar Bayramovun ifasında səslənən poeziya nümunələri, gənc muğam ifaçıları, muğam müsabiqəsinin laureatları Aidə Əliyeva və Şaiq İbayevin oxuduqları xalq mahnısı və muğam parçaları poeziya bayramına xüsusi yaraşıq verdi.

Mayın 31-də Sabir Poeziya Günlərinin tədbirləri ölkəmizin paytaxtında davam etdirildi. M.F.Axundov adına Azərbaycan Milli Kitabxanasında Sabir Poeziya Günlərinə həsr olunmuş poeziya axşamı keçirildi. Tədbiri giriş sözü ilə açan Əjdər Ol bir daha Sabir poeziyasının ölməzliyindən, bədii məziyyətlərindən, xalqımızın taleyi ilə bağlı olmasından danışdı, bu poeziyanı bizim “milli xasiyyətnaməmiz” adlandırdı və xüsusi vurğuladı ki, Sabir və onun məsləkdaşları öz həyat və sənətlərini Vətənimizin məhz bugünkü azadlığı naminə mübarizələrə həsr etmişlər. Bu fikri Sabirin öz sözləri də bir daha təsdiq edir:

Mən gedərsəm, var olsun amalım,

Yaşasın şəhriyarı – hürriyyət!

Poeziya axşamında Azərbaycan Yazıçılar Birliyinin birinci katibi, xalq şairi Fikrət Qoca, Vaqif Bəhmənli, Ədalət Əsgəroğlu, Fərqanə Mehdiyeva, Məlahət Yusifqızı, Qəşəm Nəcəfzadə, gənc şairlər Rəbiqə Nazimqızı, Aqşin, Əli Əlioğlu və başqaları çıxış edərək böyük Sabirin sənəti və şəxsiyyəti barədə ürək sözlərini dedilər, özlərinin yeni şeirlərini oxudular.

M.F.Axundov adına Milli Kitabxananın direktoru Kərim Tahirovun öz çıxışında vurğuladığı kimi, bu cür tədbirlər ölkəmizin mədəni həyatında çox önəmli rol oynayır.

Bununla da 2009-cu ilin Sabir Poeziya Günləri başa çatdı. Ancaq tədbirin sonunda qeyd olunduğu kimi, Sabir təkcə bu poeziya günlərində yad edilmir, o, hər gün, həyatımızın hər məqamında, xoş gələcək uğrunda mücadiləmizin hər anında bizimlədir.

İlham ABBASOV

Xalq qəzeti.- 2009.-4 iyun.- S. 7.