Heydər Əliyevin vətənə xidmət nümunəsi əsl örnəkdir

Ümummilli liderimiz Heydər Əliyevin idarəçilik təcrübəsi bu günümüz və sabahımız üçün zəngin həyat məktəbidir. Bu gün həmin məktəbdən bizə böyük dövlətçilik təcrübəsi, səriştəli diplomatik ənənə, şəxsi nüfuz, iradə, qətiyyət, cəsarət, insanlığa qayğı, vətənə bağlılıq kimii keyfiyyətlər miras qalmışdır.

Heç təsadüfi deyil ki, altımışıncı illərin sonunda Heydər Əliyev respublikaya rəhbərlik fəaliyyətinə sosial ədaləti bərpa etməkdən, korrupsiya və digər neqativ hallara qarşı mübarizəni gücləndirməkdən başladı. O vaxtlar Heydər Əliyevin “Literaturnaya qazeta”da çap edilmiş “Qoy, ədalət zəfər çalsın” adlı məşhur müsahibəsi bütün ölkədə sensasiyaya səbəb oldu, mərkəzin yüksək çinli məmurlarını şok vəziyyətinə saldı. O vaxtlar ölkədə hər şey problemsiz və qırmızı rəngdə göstərildiyi üçün Heydər Əliyev əvvəllər ciddi müqavimətlə üzləşdi. Lakin zaman keçdikcə o, dönməz dəst-xəttini mərkəzə qəbul etdirdi və bu təkamül üzərində dünyada özünü cəsarətli və prinsipial lider kimi təsdiqlədi, Heydər Əliyev dövlətçilik fenomenini hamıya qəbul etdirdi.

Heydər Əliyev dünya təcrübəsindən bilirdi ki, gələcəkdə yaranacaq müstəqil Azərbaycan dövlətinin ərazi bütövlüyünün, suveren hüquqlarının qorunması üçün onun milli ordusu, milli zabitləri olmalıdır.

Heydər Əliyev Bakıda milli hərbi kadrlar hazırlayan məktəblər açılmasını, ittifaqın hərbi təhsil məktəblərinə azərbaycanlıların qəbulunu təmin etdi. Nəticədə 15 il ərzində hərbi sənətin müxtəlif sahələri üzrə yüksək ixtisaslı milli zabitlər korpusu yetişdirildi.

Heydər Əliyev ikinci dəfə hakimiyyətə gələndə ölkə xaos, böhran, qarşıdurma vəziyyətində idi. Qarabağın böyük hissəsi işğal edilmişdi, ölkədə ikihakimiyyətlilik hökm sürür, silahlı dəstələr tüğyan edirdi. Meydan demokratları ölkəni milli fəlakət həddinə çatdırmışdılar. Silahlı qarşıdurma Bakıya yaxınlaşır, dövlət çevrilişi təhlükəsi artırdı. Xalq çaşqınlıq içində, yol ayrıcında qaldığı üçün onun düşüncəli zümrəsi dəfələrlə Heydər Əliyevə müraciət edib, ondan vətəni düşdüyü ağır vəziyyətdən çıxarmaq üçün hakimiyyətə qayıtmağı təkidlə xahiş etdi. Xalqın bu ağır günündə millətin faciəli taleyinə biganə qala bilməyən qeyrətli vətən oğlu Heydər Əliyev dövlətçilik məsuliyyətini öz üzərinə götürdü, ölkəni parçalanmaq, dağılmaq təhlükəsindən xilas etdi, ictimai sabitlik, siyasi və sosial-iqtisadi inkişaf konsepsiyasını hazırlayıb həyata keçirdi.

Görülən tədbirlər nəticəsində islahatlar başlandı, inflyasiya, tənəzzül dayandırıldı, müstəqilliyimiz təmin edildi, böyük neft strategiyası reallaşdı, beynəlxalq aləmə inteqrasiya prosesi geniş vüsət aldı, ölkənin iqtisadi yüksəlişinin təməli qoyuldu, milli inkişaf strategiyası qərarlaşdı.

Heydər Əliyevin qayıdışı ilə milli dövlətçiliyimizin siyasi və ideoloji prinsipləri müəyyən edildi. Milli konstitusiyanın qəbul edilməsi, hakimiyyət bölgüsünün təmin olunması, sivil idarəçilik sisteminin, hüquqi dövlətin yaradılması, insan hüquqlarının və azadlıqlarının qorunması kimi prinsiplər məhz Heydər Əliyevin hakimiyyətə gəlişindən sonra inkişafını tapdı.

Heydər Əliyevin hazırlayıb həyata keçirdiyi düşünülmüş tədbirlər nəticəsində 1995-ci ildən başlayaraq respublikada ictimai-siyasi sabitlik tənzimləndi, qanunun aliliyi təmin edildi, müxtəlif siyasi qruplara məxsus 8500 cinayətkar dəstə zərərsizləşdirildi, əhalidə olan qanunsuz silahlar müsadirə edildi. Bu reallıq 1994-cü ilin may ayının 12-də əldə edilən atəşkəsdən sonra Azərbaycanın qazandığı ən böyük nailiyyət idi. Artıq bu gün Azərbaycan bütün MDB məkanında əməliyyat şəraitinə tam nəzarət edən, cinayətkarların sayının aşağı səviyyəsinə nail olan və cinayətlərin açılması faizini ən yüksəyə qaldıran yeganə ölkədir.

Qayıdışın ilk dövrlərindən hüquq-mühafizə orqanlarının fəaliyyətini nəzarətinə götürən ünlü dövlət başçısı polisə böyük etimad göstərdi. Layiqli, peşəkar kadrları irəli çəkdi. Heydər Əliyevin bu barədə dedikləri polis orqanlarının əməli fəaliyyət proqramına çevrildi: “Polis əməkdaşları yalnız və yalnız qanun çərçivəsində fəaliyyət göstərməlidirlər, qanunun aliliyini daim rəhbər tutmalıdırlar. Polis əməkdaşları Vətəninə, torpağına hədsiz sədaqətli və istənilən vaxt öz vəzifəsini yerinə yetirərək həyatını belə qurban verməyə hazır olmalıdır”. Məhz bu tövsiyə və tapşırıqlar illərdir ki, mayak kimi bizə yol göstərir, məqsəd və məramımızı işıqlandırır.

Ulu öndər sabitlik, əmin-amanlıq olmayan yerdə inkişaf və irəliləyişin də ola bilmədiyini dəfələrlə vurğulamışdır. Dahi öndər demişdir: “...Hər bir müstəqil dövlət bir neçə böyük sütun üstündə fəaliyyət göstərə bilir. Hər bir dövlət üçün, o cümlədən müstəqil Azərbaycan dövləti üçün də bu sütunlardan biri Daxili İşlər Nazirliyidir”. Bu gün fəxrlə söyləmək olar ki, ölkəmizdə möhkəm ictimai-siyasi sabitldiyin əldə edilməsində və kriminogen durumun tam nəzarət altına götürülməsində daxili işlər orqanları xalqımızın böyük oğlu, ümummilli liderimiz Heydər Əliyevin həyata keçirdiyi siyasətin sadiq icraçıları olmuşlar. Fəaliyyətini günbəgün təkmilləşdirən, müasir iş üslublarını uğurla mənimsəyib tətbiq edən, cinayətkarlığa qarşı məhz beynəlxalq standartlara uyğun mübarizə aparan DİO əhalinin böyük inam və etimadını qazanmışdır. Biz buna görə Heydər Əliyevin uzaqgörən siyasətinə borcluyuq.

Bu günlərdə Milli Məclisdə “Polis haqqında” Qanuna əlavə və dəyişikliklər edilməsi təqdirəlayiq hal kimi qiymətləndirilməlidir. Çünki bu, qanunları təkmilləşdirir, müasirləşdirir və daha da demokratik edir. Əsas məqsəd ulu öndərin bizə əmanət kimi qoyub getdiyi sabitliyin, əminamanlığın daim və hər yerdə qorunub möhkəmləndirilməsini təmin etməkdən ibarətdir. Geniş ictimaiyyət də asayiş keşikçilərinə daim kömək etməlidir. Əlavə və dəyişikliklərə görə yaşayış yeri üzrə ayrı-ayrı şəxslər könüllü olaraq, öz qəlblərinin hökmü ilə təhlükəsizliyin təminatı və cinayətkarlığa qarşı bizimlə birgə mübarizəyə cəlb ediləcəklər. Birgə fəaliyyət, birgə səylər həm səmərəli nəticə, həm aşkarlıq, həm də birlik nümunəsinə çevriləcəkdir. Bu zaman laqeydlik, biganəlik kimi hallar minimum səviyyəyə enəcəkdir. Bu, həm də ulu öndərin vəsiyyətlərinə sadiqlik baxımından mənəvi bir amil kimi diqqətəlayiqdir.

...Mən ictimai təhlükəsizlik sahəsində uzun illər çalışmış polis əməkdaşı kimi yaxşı xatırlayıram: 1993-cü ilə qədər müstəqilliyini yenicə qazanmış ölkəmiz idarəetmədə təcrübəsi olmayan naşı adamların əlinə keçmişdi. O vaxtkı dövlət orqanlarının fəaliyyətsizliyindən, rəhbər kadrların qətiyyətsizliyindən, hüquq-mühafizə sisteminin öz vəzifəsinin öhdəsindən gələ bilməməsinin ucbatından ölkədə cinayətkar ünsürlər əl-qol açmışdı. Hava qaralandan sonra küçələrə çıxmaq mümkün deyildi. Silahlılar zorakılıq əməlləri törədir, insanların həyatına qəsd edir, ictimai-siyasi sabitliyi sarsıdır, adamları vahimədə saxlayırdılar. Məhz Heydər Əliyevin uğurlu daxili siyasəti, qətiyyəti, “cinayət cəzasız qalmamalıdır” prinsipini reallaşdırması sayəsində ölkədə sabitlik bərpa olundu, necə deyərlər, qanun-qadağa öz yerini tutdu. Ölkə vətəndaş müharibəsi təhlükəsindən birdəfəlik qurtuldu, asayişin qorunması daha da gücləndi.

Heydər Əliyevin təşəbbüsləri ilə ölkədə aparılan islahatlar çərçivəsində daxili işlər orqanlarının da təkmilləşdirilməsi, maddi-texniki təchizatın yüksəldilməsi, sosial təminatın genişləndirilməsi sahəsində çox işlər görülmüşdür. Məhz ulu öndərimiz polis işçilərinə həmişə atalıq qayğısı göstərmiş, onların fədakar əməyini layiqincə qiymətləndirmişdir. Şəxsən mən, adi bir polis zabiti kimi, 2002-ci ildə ümummilli liderimizin imzaladığı fərmanla “İgidliyə görə” medalı ilə təltif olunmuşam.

Bu gün dərin razılıq hissi ilə qeyd edirik ki, Azərbaycan Prezidenti İlham Əliyev ulu öndərin siyasətini davam etdirərək DİO-nun işinin yüksək tələblər səviyyəsində qurulmasından ötrü böyük qayğı və dəstək göstərir. Onun imzası ilə həyata vəsiqə almış “Azərbaycan Respublikasının polis orqanlarının fəaliyyətinin təkmilləşdirilməsinə dair Dövlət Proqramı” cinayətkarlığa qarşı mübarizənin səmərəliliyinin yüksəldilməsi, şəxsi heyətin xidmət şəraitinin və sosial müdafiəsinin yaxşılaşdırılması, polis şöbələrinin maddi-texniki təchizatının möhkəmləndirilməsi üçün geniş imkanlar yaratmışdır. Ötən il Azərbaycan polisinin 90 illik yubileyinin böyük təntənə ilə qeyd edilməsi bizi hədsiz sevindirmişdir.

Bu yaxınlarda Milli Məclisdə “Polis haqqında” Qanuna əlavə və dəyişikliklərin edilməsi barədə” Qanun layihəsinin ətraflı müzakirəsi və yaşayış yeri üzrə ictimai asayişin və ictimai təhlükəsizliyin təmin edilməsi ilə bağlı yaranan problemlərin birgə həlli üçün addımlar atılması olduqca zəruridir. Yaradılacaq ictimai şuralarda könüllü olaraq çalışacaq şəxslərin fəaliyyətinin əlaqələndirilməsi yalnız və yalnız ümumi işin xeyrinə olacaqdır.

Ümummilli liderimiz Heydər Əliyevin bizə əmanət etdiyi sabitliyi və əmin-amanlığı göz bəbəyi kimi qoruyur, ictimai asayişi, vətəndaşların həyatının və fəaliyyətinin təhlükəsizliyini məhz qanuni şəkildə təmin edirik. Bu, Azərbaycan polisinin həm də böyük və şərəfli vətəndaşlıq borcudur.

Şamil SEYİDLİ,

Yardımlı Rayon Polis Şöbəsinin rəisi,

polis polkovniki

Xalq qəzeti.- 2009.- 6 iyun.- S. 6.