Yeni Dövlət Proqramı ölkəmizin növbəti beşillikdə bütün sahələr üzrə inkişafını özündə əks etdirir

Azərbaycan Prezidenti cənab İlham Əliyev 14 aprel 2009-cu il tarixli fərmanı ilə “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nı təsdiq etməklə ölkəmizin növbəti beşillikdə inkişaf strategiyasını müəyyənləşdirdi.

Məlum olduğu kimi, “Azərbaycan Respublikası regionlarının sosial-iqtisadi inkişafı Dövlət Proqramında (2004-2008-ci illər)” regionların sosial-iqtisadi inkişafı ilə bağlı nəzərdə tutulmuş tədbirlər, qarşıya qoyulmuş vəzifələr uğurla icra olunmuş, bunun da sayəsində əhalinin həyat səviyyəsi xeyli yüksəlmiş, 750 mindən çox yeni iş yerləri açılmış, yoxsulluğun səviyyəsi 49 faizdən 13 faizə qədər azalmışdır. Bu müddət ərzində dövlət büdcəsi on dəfə artmış, regionların siması tamamilə dəyişmişdir. Bunun davamı olaraq dövlət başçımızın fərmanı ilə yeni Dövlət Proqramı təsdiq olunmuşdur. Yeni proqramın əsas məqsədi ölkədə qeyri-neft sektorunun inkişafının sürətləndirilməsinə, iqtisadiyyatın diversifikasiyasına, tarazlı regional və davamlı sosial-iqtisadi inkişafa, əhalinin həyat səviyyəsinin daha da yaxşılaşdırılmasına nail olmaqdır.

Yeni Dövlət Proqramı ölkəmizin hərtərəfli inkişafının təmin olunması baxımından böyük əhəmiyyət kəsb edir. Tanınmış iqtisadçılar, alimlər, görkəmli xadimlər də bunu təsdiqləyirlər.
Azərbaycan Respublikasının Prezidenti yanında Dövlət İdarəçilik Akademiyasında “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı: əsas vəzifələr və onların yerinə yetirilməsi mexanizmləri” mövzusunda keçirilən “dəyirmi masa”da ölkəmizin tanınmış iqtisadçıları bu sənədin əhəmiyyətindən söhbət açdılar.

Tədbiri giriş sözü ilə açan akademiyanın rektoru, əməkdar elm xadimi, professor Seyfəddin Qəndilov “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nın vacibliyindən danışdı. Rektor əsası ümummilli lider Heydər Əliyev tərəfindən qoyulan siyasi kursun Azərbaycanı daim yüksəkliyə apardığını xüsusi olaraq qeyd etdi. Bu siyasi kursun hazırda möhtərəm Prezidentimiz cənab İlham Əliyev tərəfindən nəinki davam etdirildiyini, həm də dövrün ruhuna uyğun olaraq təkmilləşdirildiyini və yaradıcılıqla inkişaf etdirildiyini diqqətə çatdırdı. Qeyd etdi ki, cəmiyyət həyatının müxtəlif sahələrində olduğu kimi bunu biz cənab Prezident İlham Əliyevin hələ beş il bundan əvvəl imzaladığı və 2004-2008-ci illəri əhatə edən “Azərbaycan Respublikası regionlarının sosial-iqtisadi inkişafı Dövlət Proqramı”nın timsalında aydın gördük. Bu proqramın həyata keçirilməsi ölkəmizin bütün regionlarında böyük canlanma yaratdı. Proqramın uğurla həyata keçirilməsi ölkəmizin bütün bölgələrinin sürətli inkişafına səbəb oldu. Belə ki, əvvəllər heç bir istehsal sahəsi olmayan bəzi rayonlarda yeni müəssisələr, fabriklər yaradıldı, ən yüksək səviyyədə tikinti-quruculuq və abadlıq işləri aparıldı, müxtəlif infrastruktur layihələri həyata keçirildi. Təkcə bunu demək kifayətdir ki, proqramın əhatə etdiyi son beş ildə Azərbaycan iqtisadiyyatı 2,6 dəfə artdı.

Adambaşına düşən gəlir xeyli çoxaldı, nəzərdə tutulduğundan daha çox yeni iş yeri açıldı. S. Qəndilov dedi ki, iqtisadi islahatların uğurla aparılması nəticəsində bir çox sosial problemlər həll olundu. Sahibkarlığın inkişafı üçün imkanlar genişləndi, əyalətlərdən əhalinin Bakıya və rayon mərkəzlərinə axını xeyli səngidi. Cənab Prezidentin bu illər ərzində Dövlət Proqramından əlavə bu sahədə daha 17 sərəncam imzalaması da bu nailiyyətlərin qazanılmasında mühüm rol oynadı. Büdcə xərclərimiz, valyuta ehtiyatlarımız da çoxaldı. Yəni, son beş il ərzində biz həqiqətən, böyük və uğurlu bir inkişaf yolu keçdik. İndi ölkəmizin qarşısında yeni, daha mühüm vəzifələr durur.

Bu da əldə olunmuş nailiyyətlərə istinad etməklə yerlərdə sənaye sahələrinin və kənd təsərrüfatının inkişafını sürətləndirmək, bu işdə sahibkarlara dəstək olmaq, əhalinin yaşayış səviyyəsini yüksəltməklə, yoxsulluq probleminin həllinə, qeyri-neft sektorunun inkişafının sürətləndirilməsinə nail olmaq və ölkəni iqtisadi cəhətdən hərtərəfli inkişaf etdirməkdir. Cənab Prezident İlham Əliyev tərəfindən “Azərbaycan Respublikası regionlarının 2009-2013-cü illərdə sosial-iqtisadi inkişafı” Dövlət Proqramı da məhz bu məqsədlə təsdiq edilmişdir.

Natiq qeyd etdi ki, yeni Dövlət Proqramının da uğurla həyata keçiriləcəyi heç bir şübhə doğurmur. Hər şeydən əvvəl ona görə ki, artıq belə bir proqramın icrasında Azərbaycanın zəngin təcrübəsi var. İkincisi, Azərbaycan yeni proqramın nəzərdə tutulan səviyyədə icrası üçün lazımi qədər maliyyə imkanlarına da malikdir. Möhtərəm Prezident İlham Əliyev bu proqramla bağlı demişdir: “Bu, mövcud proqramın məntiqi davamı olacaqdır. Bu proqrama bu vaxta qədər həll olunmamış məsələlərin hamısı salınmalıdır ki, növbəti beş il ərzində regionların bütün sosial-iqtisadi, infrastruktur problemləri həll edilsin. Buna bizim gücümüz çatar. Keçən beş ilin təcrübəsi onu göstərir ki, hansı məsələ qarşıya qoyulubsa, o, uğurla icra edilib, bəzi hallarda isə müəyyən edilmiş vaxtdan tez icra olunubdur. Ona görə regionların inkişafı prioritet kimi qalır”.

Bütün bunlarla yanaşı qarşıdakı illərdə digər mühüm vəzifələrin də yerinə yetirilməsi nəzərdə tutulur. Belə ki, biz, elm və təhsil işçiləri üçün çox önəmli olan məsələlərin də sürətli inkişafı ön plana çəkilir. Dövlət Proqramında nəzərdə tutulmuş qarşıdakı illərdə təhsil sahəsində həyata keçiriləcək işlər təhsilin strukturunun və məzmununun yeniləşməsinə istiqamətləndirilir.

Gənclərimizin ümumbəşəri dəyərlər əsasında xarici ölkələrin qabaqcıl ali təhsil müəssisələrində daha keyfiyyətli təhsil almaları işinin genişləndirilməsi də diqqət mərkəzində saxlanılır.

Elm sahəsində də qarşıya bir sıra mühüm vəzifələrin qoyulduğunu diqqətə çatdıran rektor dedi ki, bu vəzifələrdən biri aparılan tədqiqatların praktiki əhəmiyyətinin artırılması, elmi tədqiqat və layihə institutları ilə təsərrüfat subyektləri arasında əlaqələrin daha sıx qurulmasının təmin edilməsindən ibarətdir. Elmi müəssisələrdə və ali məktəblərdə aparılan elmi-tədqiqat fəaliyyətinin əlaqələndirilməsi və istiqamətləndirilməsi üzrə işin daha da gücləndirilməsi, əhalinin sağlamlığının qorunması məqsədilə tibbi xidmətlərin keyfiyyətinin daha da yüksəldilməsinə xüsusi diqqət yetirilməsi nəzərdə tutulur. Yeni regional inkişaf proqramında həyati əhəmiyyətli bütün məsələlər geniş əks olunub. Belə ki, ekoloji durumun yaxşılaşdırılması, infrastruktur layihələrin genişləndirilməsi, mədəniyyət, elm, təhsil, səhiyyə ilə yanaşı yol-nəqliyyat, rabitə və digər sahələrin sürətli tərəqqisi məsələləri də qarşıdakı 5 il ərzində yerinə yetiriləcək vəzifələr içərisində prioritet təşkil edir.

S. Qəndilov yeni Dövlət Proqramının Azərbaycanın regional inkişafında keyfiyyətcə yeni mərhələnin əsasını qoyduğunu diqqətə çatdırdı. O dedi ki, Dövlət Proqramında qarşıya qoyulan bu vəzifələrin reallaşması şübhəsiz ki, Azərbaycanın siyasi və iqtisadi qüdrətini daha çox artıracaqdır.

“Dəyirmi masa”da iştirak edən Dövlət İdarəçilik Akademiyasının Geostrateji Araşdırmalar Mərkəzinin direktoru, AMEA-nın müxbir üzvü, iqtisad elmləri doktoru, professor Əli Nuriyev, Milli Məclisin deputatı, iqtisad elmləri doktoru, professor Rüfət Quliyev, Azərbaycan Respublikasının Prezidenti yanında Sahibkarlar Şurasının sədr müavini, iqtisad elmləri doktoru Qüdrət Kərimov, AMEA-nın İqtisadiyyat İnstitutunun direktoru, iqtisad elmləri doktoru İsa Alıyev, Nazirlər Kabineti Aparatının baş məsləhətçisi, iqtisad elmləri doktoru Elşən Hacızadə, professor Səttar Səfərov, texnika elmləri namizədi, dosent Elşən Nəsirov, iqtisad elmləri namizədi, dosent Roza Əliyeva və iqtisad elmləri namizədi Eldar Azadov yeni Dövlət Proqramının qarşıdakı beşillikdə ölkəmizin hərtərəfli inkişafına göstərəcəyi böyük təsirdən söhbət açmış, bu sənədin yüksək əhəmiyyətə malik olduğunu qeyd etmişlər. Çıxış edənlər Dövlət Proqramının ölkəmizin gələcək inkişafı üçün çox dəyərli töhfələr verəcəyini bildirdilər. Qeyd olundu ki, bu böyük dövlət sənədinin mahiyyəti tələbə və gənclərimizə dərindən izah olunmalı, iqtisadçı alimlər yerlərdə və regionlarda keçiriləcək elmi-praktiki konfranslarda, “dəyirmi masa”larda bütün bu məsələləri geniş şərh etməlidirlər. Yeni Dövlət Proqramının əhalinin, hər kəsin və bütün təşkilatların mənafeyi, inkişafı ilə bağlılığı xüsusi vurğulandı.

“Dəyirmi masa”da fikir mübadiləsi aparıldı, rəy və təkliflər səsləndirildi.

Əliqismət BƏDƏLOV

Xalq qəzeti.- 2009.- 7 iyun.- S. 2.