Bugünkü inkişafımız həm də gələcək firavanlığımızın əsasıdır

Hər bir xalqın qüdrətli sərkərdələrə,ağıllı dövlət başçılarına həmişə ehtiyacı olub. Çünki xalqı düçar olduğu ictimai bəlalardan, maddi-mənəvi yoxsulluqdan, zaman-zaman baş verən düşmən müdaxilələrindən yalnız müdrik başçılar xilas ediblər. Yüz ildə bir dəfə doğulan belə şəxsiyyətlər tarix boyunca millətin taleyində böyük dəyişikliklərə, mənəvi-əxlaqi dəyərlərin yaranmasına, milli ideyaların güclənməsinə səbəb olurlar.

Ötən əsrin sonlarında baş verən əsaslı dəyişikliklər ölkəmizin gələcək inkişafını müəyyənləşdirən başlıca amillərdən biri oldu. Ancaq bu qısa zaman kəsiyində Azərbaycan müstəqillik əldə etməsinə baxmayaraq ərazisinin bir hissəsinin itirilməsi ilə üz-üzə qaldı. Bu faciələr isə erməni daşnakları və onların əlaltıları ilə əlaqəli olmuşdur.

XX əsrdə iki dəfə Azərbaycan dövlətinin yaranması və inkişafı üçün real imkanlar meydana gəlsə də, bunun yalnız sonuncusu öz real təsdiqini tapdı ki, bu da dünya səviyyəli siyasətçi, Azərbaycan xalqının böyük oğlu Heydər Əliyevin xalqın təkidi ilə hakimiyyətə qayıdışından sonra reallaşdı. Azərbaycanın təkcə müstəqillik dövrü deyil, bütöv bir epoxası ulu öndərimiz Heydər Əliyevin adı ilə bağlıdır.

Əsrin sonunda nəhəng sovet imperiyasının dağılması və bu məkanda yayılmış milli azadlıq hərəkatının güclənməsi gözlənilən dəyişikliklərin sonunu daha da yaxınlaşdırırdı. Sovetlər Birliyinə Mixail Qorbaçov kimi bir riyakar və satqının rəhbərlik etməsi də bu proseslərin sürətlənməsində böyük rol oynadı. O dövrdə SSRİ rəhbərlərindən biri olan Heydər Əliyev kimi dahi siyasətçi və görkəmli dövlət xadiminin fövqündə çox cılız göründüyünü hiss edən M.Qorbaçov hansı yolla olursa-olsun, onu aradan götürməyə çalışırdı. Nəhayət, Heydər Əliyev işləməyə imkan verilmədiyini nəzərə alıb 1987-ci ildə vəzifəsindən istefa verdi.

Əvvəllər Azərbaycana qarşı hansısa addım atmağa cürəti çatmayan qüvvələr Heydər Əliyevin istefasından sonra fəallaşmağa başladılar. Heydər Əliyevin istefasından sonra Kremldə özünün güclü dayağını və müdafiəsini itirmiş Azərbaycan xalqının haqq səsini isə eşidən yox idi. Dağlıq Qarabağ və onun ətrafında baş vermiş hadisələrlə bağlı ayağa qalxmış xalqın haqlı tələblərinə baxılmır, Azərbaycanın ünvanına böhtanların ardı-arası kəsilmirdi. Bir tərəfdən mərkəzi hakimiyyətin ermənilərə olan tərəfkeşliyinin getdikcə daha aydın və qabarıq şəkildə özünü büruzə verməsi, digər tərəfdən də respublikaya rəhbərlik edən şəxslərin səriştəsizliyi, kölə psixologiyası, cəsarətsizliyi Azərbaycanın getdikcə tənəzzülə uğraması, torpaqlarımızın get-gedə işğal olunması ölkədə yaranmış böhranı daha da dərinləşdirirdi. Şübhəsiz ki, hadisələrin günü-gündən genişlənməsi və dərinləşməsi mərkəzi hakimiyyətin nəzarətində idi. Məqam yetişəndə – 1990-cı il yanvarın 19-dan 20-nə keçən gecə M.Qorbaçovun əmri ilə Bakıda qanlı faciə törədildi. Əli qana bataraq quduzlaşmış imperiya rəhbərliyinin dünyaya meydan oxuduğu bir vaxtda xalqının mərd oğlu Heydər Əliyev həyatını təhlükə qarşısında qoyaraq heç nədən və heç kimdən çəkinmədən Moskvadakı Azərbaycan nümayəndəliyinə gəldi, bu qanlı faciəni pisləyən ilk bəyanat verdi və onu törədənlərin tarix qarşısında cavabdehlik daşıyacaqlarını söylədi. Özünü tənha hiss edən xalq bundan sonra arxasız və köməksiz olmadığını görüb bir qədər toxtaqlıq tapdı.

Azərbaycanın müstəqillik aktı qəbul edildikdən sonra qarşıda hələ çətin və mürəkkəb vəzifələr dururdu. Bir tərəfdən erməni təcavüzü nəticəsində torpaqlarımız işğal edilir, digər tərəfdən də ölkə daxilində hakimiyyət uğrunda gedən siyasi çəkişmələr güclənirdi ki, bunun da nəticəsində xalq ağır itkilər verirdi. Azərbaycanın belə ağır vaxtında müxtəlif bölgələrdə yaranan silahlı qruplaşmalar ölkəni parçalamaq, hakimiyyəti ələ keçirmək niyyəti ilə çıxışlar etməyə və əhali arasında nifaq salmaq üçün güclü təbliğata başladılar. Azərbaycan çox çətin dilemma qarşısında qalmışdı. 1990-cı illərin əvvəllərində ölkə iqtisadi, siyasi və hərbi böhran içərisində idi. Ağır problemlərlə üz-üzə qalan Azərbaycanda baş verən ciddi siyasi proseslər, Dağlıq Qarabağ problemi və Ermənistan-Azərbaycan müharibəsi respublikanın bütün infrastrukturunu iflic vəziyyətə salmışdı. Müxalifətin ekspansiya siyasəti nəticəsində dünya dövlətlərinin respublikamıza olan inamını daha da azaltmışdır. Amerika Konqresi tərəfindən ölkəmizə qarşı bir sıra qərarların, o cümlədən “Azadlığa dəstək aktı”na 907-ci düzəlişin qəbul edilməsi buna misaldır. Hətta BMT-də Azərbaycanın azadlığını birmənalı qarşılamayan dövlətlər də buna görə fəallıq göstərdilər. Bu böhran 1993-cü ilin iyun ayında özünün son həddinə çatdı. Anarxiya, başıpozuqluq uçurumuna yuvarlanmış Azərbaycan vətəndaş qarşıdurması ilə üzləşdi. Gəncədə başlanan qiyam ölkəni fəlakət həddinə sürükləyirdi.

O vaxtkı Azərbaycan rəhbərliyinin qətiyyətsizliyi və səriştəsizliyi ucbatından qiyam geniş miqyas almışdır. Bu vəziyyətdə nə edəcəyini bilməyən iqtidar öz hakimiyyətini qorumaq üçün əhaliyə güc tətbiq etməkdən belə çəkinmədi. Belə böhranlı və ağır vəziyyətdə xalq çıxış yolunu yenə də təcrübəli dövlət xadimi Heydər Əliyevdə görürdü. Xalqın tələbi ilə 1993-cü il iyunun 9-da Heydər Əliyev Naxçıvandan Bakıya gəldi.

1993-cü il iyunun 15-də isə o, xalqın arzu, istəyi və təkidi ilə Ali Sovetin sədri seçildi. Bu, Azərbaycanın müstəqillik tarixinin yeni erasının başlanğıcı və “ömrümün qalan hissəsini də xalqıma bağışlayıram”, – deyib meydana atılan böyük ürəkli Vətən oğlunun misilsiz fədakarlığı idi.

Belə böhranlı və həyəcanlı günlərdə xalq özünün yeganə ümid yeri, dünya şöhrətli siyasi xadim Heydər Əliyevdə görürdü. Elə buna görə də ümummilli lider yenə də xalqın tələbi ilə həmin il iyun ayının 24-də Prezident səlahiyyətlərini icra etməyə razılıq verdi. Bu, bir faktdır ki, ulu öndər xalqın sonsuz hörmət və rəğbətinə, onun misilsiz gücünə arxalanırdı. Lakin o vaxtlar mövcud siyasi vəziyyətdən faydalanıb hakimiyyətin yuxarı pillələrində özlərinə yer tutmaq istəyən separatçı qüvvələr də az deyildi. Keçmiş müdafiə naziri Rəhim Qazıyev istədiyinə nail ola bilmədikdən sonra cənubda Talış-Muğan Respublikası yaratmaq üçün Lənkəranda Əlikram Hümbətovu separatçılıq fəaliyyətinə sövq etdi. Bununla yanaşı, şimalda “Sadval” qruplaşmasının da törətdiyi hadisələr, apardığı antidövlət təbliğatı ölkəni parçalanma təhlükəsi ilə üz-üzə qoydu. Ancaq Heydər Əliyevin dərin zəkası, uzaqgörən siyasəti və zəngin idarəetmə təcrübəsi bütün bunlara qalib gəldi.

O vaxtlar qaçıb Naxçıvan Respublikasının Kələki kəndində gizlənmiş sabiq Prezident Ə.Elçibəy Bakıya qayıtmadı. Yaranmış ağır vəziyyətdən qorxub qaçdığına görə xalq ona etimadsızlıq göstərərək 1993-cü il oktyabrın 3-də çox yüksək siyasi fəallıqla Heydər Əliyevi özünün Prezidenti seçdi.

Prezident Heydər Əliyev qısa zamanda idarəetmə bacarığından və zəngin təcrübəsindən istifadə edərək ölkənin daxili və xarici siyasətini dağılmış iqtisadiyyatın inkişaf etdirilməsi üçün sosial-iqtisadi, siyasi və mədəni dirçəlişin əsaslandırılmış proqramını hazırladı. İlk növbədə özəlləşdirmə proqramı, torpaq islahatı, iqtisadi, hüquqi, hərbi və dövlət quruculuğu sahəsində islahatlar kursu həyata keçirildi.

Ölkədə ictimai-siyasi sabitliyin tam təminatına nail olan ulu öndər, eyni zamanda Avroatlantik məkana inteqrasiya, ölkədə qanunçuluğun möhkəmləndirilməsi, insan və vətəndaş hüquq və azadlıqlarının təminatı sahəsində də bir sıra vacib və əhəmiyyətli tədbirlər görməyə başladı.

Cəbhədə atəşkəsə nail olundu. Ölkədə mövcud quldur dəstələri, silahlı bandalar ləğv edildi. Respublikada vəziyyət normallaşdıqca quruculuq işləri genişlənir, bunu görən xarici sərmayədarların Azərbaycana marağı artırdı.

Bunun ən uğurlu nəticəsi 1994-cü il sentyabrın 20-də Bakının “Gülüstan” Sarayında imzalanan “Əsrin müqaviləsi” idi ki, bu da ölkəmizin varlığını, gücünü, qüdrətini bütün dünyaya bəyan etdi. Ancaq bütün bunlara qısqanclıqla yanaşıb onunla razılaşmayanlar da var idi ki, onların konspirativ mövqeləri açıq surətdə özünü büruzə verməyə başladı. Elə o vaxt dövlətin iki yüksək çinli məmurunun qəddarlıqla qətlə yetirilməsi də bununla bağlı idi. Bu az imiş kimi onlar 1994-cü ilin oktyabr, 1995-ci ilin mart ayında dövlət çevrilişinə cəhd göstərməyə və digər təxribatlar törətməyə çalışsalar da, bütün bunların qarşısı xalqına arxalanan Heydər Əliyev tərəfindən qətiyyətlə alındı. O vaxt Prezidentin İcra Aparatı iqamətgahının qarşısına toplaşmış yüz minlərlə insan dövlət çevrilişinə cəhd edənlərə “Xalq-Heydər”, “Heydər- Xalq” vəhdətinin təntənəsinin möhkəm olduğunu bir daha göstərdi.

Daha bir böhranlı vəziyyət 1996-cı ildə Lissabon sammitində baş verdi ki, ATƏT-in zirvə toplantısında iştirak edən dahi rəhbərimiz orada qəbul edilən yekun sənəddə Azərbaycanın ərazi bütövlüyünü qoruyacaq müddəalar öz əksini tapmadığına görə həmin sənədə veto qoydu. Zirvə toplantısının nəticəsiz başa çatacağını görən ATƏT rəhbərliyi məcburiyyət qarşısında qalaraq Azərbaycanın ərazi bütövlüyünü nəzərdə tutan dörd mühüm prinsipi Lissabon sammitinin yekun sənədlərinə əlavə etdi. Bax, budur Heydər Əliyev zəkası, Heydər Əliyev hünəri və qətiyyəti!

Ulu öndər bilirdi ki, müstəqil Azərbaycan köhnə qanunlarla idarə oluna bilməz. Odur ki, özünün rəhbərliyi altında Yeni Konstitusiya layihəsini hazırlamaq üçün müvafiq komissiya yaradıldı. Yeni Konstitusiya layihəsi xalqın müzakirəsinə verildi. Xalqın istək, arzu və təklifləri nəzərə alınmaqla hazırlanmış Konstitusiya 1995-ci il noyabrın 12-də böyük səs çoxluğu ilə qəbul edildi.

Konstitusiyanın müddəalarının həyata keçirilməsi, demokratik təsisatların və qanunun aliliyi prinsipinin möhkəmləndirilməsi, hərtərəfli islahatların aparılması üçün dövlət başçısının nəzarəti altında dövlətimizin gələcəyi üçün vacib və əhəmiyyətli qanunlar işlənib hazırlandı ki, bunun sayəsində beynəlxalq aləmə inteqrasiya yolu tutan və demokratik dəyərlərə sadiqliyini bütün dünyaya bəyan edən ölkəmizin beynəlxalq əlaqələri genişlənməyə başladı, bununla yanaşı, həmin vaxtda dövlətin ilk qanunverici orqanına seçkilər keçirildi ki, bu, müstəqilliyimizin möhkəmləndirilməsi üçün hüquqi bazanın yaradılmasına daha geniş imkanlar açdı.

Bundan başqa, ulu öndərimizin misilsiz xidmətlərindən biri olan çox böyük müdriklik və uzaqgörənliklə hazırladığı neft strategiyası ölkə iqtisadiyyatı üçün operativ funksiya daşımaqla yanaşı, digər sahələri də öz arxasınca aparıb iqtisadi böhrana son qoydu.

Xəzər neftinin dünya bazarına çıxarılması istiqamətində Heydər Əliyevin ideyası əsasında Bakı-Novorossiysk kəmərindən başqa daha bir yeni kəmər - Bakı-Supsa neft kəməri çəkildi.

Keçən əsrin 90-cı illərinin axırlarından hasil edilən neft həmin kəmər vasitəsilə dünya bazarına çıxarıldı. Bəzi dövlətlərin pərdəarxası maneələrinə baxmayaraq, Heydər Əliyevin gərgin əməyi və mübarizəsindən sonra Bakı-Tbilisi-Ceyhan əsas ixrac neft kəmərinin çəkilməsinə də başlanıldı. Bütün bunlar onu göstərir ki, ulu öndərin düşünülmüş xarici siyasəti sayəsində ölkəmizə xarici investorların investisiya qoyması üçün əlverişli şərait və imkanlar açıldı ki, bu da dövlətimizin tərəqqisinə və onun hərtərəfli güclənməsinə təkan verdi.

Ümummilli liderimiz ictimai-siyasi sabitliyin davamlılığını təmin etmək üçün ilk növbədə cəmiyyətin şüurunda milli dövlətçilik ideyalarına inamın formalaşdırılmasına üstünlük verirdi. Müstəqilliyimizin tarixi və siyasi əsaslarının möhkəmləndirilməsi, dövlətin tərəqqisi üçün etibarlı iqtisadi bazanın formalaşdırılması Heydər Əliyevin Azərbaycan üçün əvəzsiz və fövqəladə rolunun misilsiz səciyyəsidir. O, rəhbər olduğu dövrdə Azərbaycanı nəinki məhv olmaq təhlükəsindən qorudu, eyni zamanda onu gələcəyə inamla baxan güclü bir dövlətə çevirdi.

Dahi rəhbərin gərgin əməyi, siyasi iradəsi sayəsində reallaşdırdığı nəhəng işlər öz miqyasına görə adamı heyrətə gətirir. Ölkəni dağılmaq və parçalanmaq həddinə gətirib çıxarmış hakimiyyət böhranı, vətəndaş müharibəsi təhlükəsi aradan qaldırılmış, dövlət çevrilişi cəhdlərinin, terror aktlarının qarşısı alınmışdır.

Azərbaycan Prezidenti Administrasiyasının rəhbəri cənab Ramiz Mehdiyev özünün “Milli məfkurə, dövlətçilik, müstəqillik yolu ilə” kitabında qeyd etdiyi kimi, “o zaman əhalinin bəzi təbəqələri və siyasətlə məşğul olanların əksəriyyəti belə hesab edirdi ki, Konstitusiya Aktının qəbulu və özlərini ”milli demokrat" adlandıran bir qrup insanın hakimiyyətə gəlməsi ilə artıq tam müstəqilliyə və suverenliyə nail olmuş və milli dövlətçilik problemləri tamamilə aradan qalxmışdır. Xalq hərəkatına rəhbərliyi ələ keçirmiş siyasətbazların təbliğat tezisləri və bəyanatları bu cür səthi, yanlış təsəvvürlərin formalaşmasına kömək etmişdir. Lakin sərt reallıqlar və xalqa bəla gətirən prinsipsiz siyasi mübarizələr tezliklə öz mənfi təsirini göstərdi. Xalq ölkədə cərəyan edən hadisələri və siyasi prosesləri tədricən saf-çürük edərək, hadisələrə daha ayıq gözlə baxmağa başladı, bir çox “siyasətçilərin” əsl simasını gördü."

Ümummilli liderimizin rəhbərliyi dövründə dünyaya inteqrasiya olunan dövlətimiz beynəlxalq konvensiyalara qoşuldu ki, bu da ölkəmizin dünyadakı nüfuzuna öz müsbət təsirini göstərdi. Əvvəlki on ildə əldə etdiyimiz nailiyyətləri sadaladıqca, qəlbimiz qürur hissi ilə dolur. Bu uğurların qazanılmasında bütün ömrünü xalqına, Vətəninə həsr etmiş, milli tariximizə qurucu və xilaskar rəhbər kimi daxil olmuş Heydər Əliyevin xidmətləri əvəzsizdir. Respublikamızın həyatının bütün sahələrində əsaslı dəyişikliklər məhz ulu öndərimizin böyük istedad və bacarığı sayəsində mümkün olmuşdur. Bu, bir faktdır ki, əsrin əvvəllərində Azərbaycan öz müstəqilliyini itirdiyi halda bizim indiki müstəqillik tariximizdə Heydər Əliyev şəxsiyyətinin nə qədər böyük və əhəmiyyətli rol oynadığını daha aydın dərk edərək görürük.

Onun misilsiz xidmətlərindən biri də hakimiyyətin zorla dəyişdirilməsi kimi xoşagəlməz ənənəyə son qoyması və siyasi mübarizənin sivil metodlarının tətbiqi üçün vacib və zəruri olan bütün imkanları yaratması idi. Bu məqsədlə o, söz və mətbuat azadlığına, plüralizmə geniş meydan vermişdir. Lakin təəssüflə qeyd etmək lazımdır ki, özlərini “müxalifət” adlandıran, hər şeyə qara yaxmağa vərdiş etmiş çirkin niyyətli siyasi qüvvələr gərgin əmək sayəsində əldə edilmiş bütün nailiyyətlərimizə həmişə qara yaxmağa çalışıblar və bu gün də çalışırlar. Azadlıqdan sui-istifadə edən bu siyasətbazlar özlərinin şəxsi maraqlarına xidmət edən mətbuat səhifələrində dövlətimiz və dövlətçiliyimizlə bağlı yalan və iftira dolu cızmaqara yazmaqdan çəkinmirlər. Sosial bazasını itirərək sağlam siyasi rəqabət aparmağa qadir olmayan bu qüvvələr iflasa uğradıqlarını görərək hər cür çirkin vasitələrdən istifadə edir, iqtidarın uğurlarına qısqanclıqla yanaşır və mənəvi dəyərləri unudaraq hətta təhqirlərə belə əl atırlar. Məqsəd ölkədə mövcud olan ictimai-siyasi sabitliyi pozmaq, hakimiyyəti zəbt etməkdir. Bu zavallılar bilmirlər ki, onların bu fikirləri xülyadır.

Azərbaycan Prezidenti Administrasiyasının rəhbəri, akademik Ramiz Mehdiyev özünün “XXI əsrdə milli dövlətçilik: demoqrafik inkişaf və müxalifət” kitabında qeyd edib ki, “müxalifət ideoloqları başa düşürlər ki, növbəti prezident seçkilərindən sonra onlar hakimiyyət uğrunda mübarizə aparmaq bir yana qalsın, sadəcə müxalifətdə qalmaq, bir partiya kimi mövcudluğunu saxlamaq uğrunda mübarizə aparmalı olacaqlar.” Artıq bunların reallığa çevrildiyini gözümüzlə görürük.

Xalqımız müstəqillik illərində ağır sınaqlardan keçərək mətinləşmiş, kimin kim olduğunu çoxdan dərk etmişdir. Onu tutduğu yoldan döndərib səhv istiqamətə yönəltmək mümkün deyil. 1993-cü ildən bəri dəhşətli fəlakətlərdən xilas olduğuna görə yer üzündə olan bütün azərbaycanlılar Heydər Əliyevə minnətdardır, onun rəhbərliyi dövrünü haqlı olaraq “qurtuluş dövrü” adlandırırlar. Bu xilaskar missiya hələ davam edir.

1993-cü il 15 iyun Qurtuluşunun təntənəsi Prezident İlham Əliyevin hakimiyyəti dövründə daha aydın hiss olunur. Yaxşı yadımdadır, möhtərəm Prezidentimiz 14 may 2004-cü ildə Naxçıvanın 80 illiyinə həsr olunmuş mərasimdəki çıxışında qeyd etdi ki, “Azərbaycanı qüdrətli dövlətə çevirmək üçün ölkədə Heydər Əliyev siyasəti davam etdirilməlidir.” Bu gün ölkəmizin hər bir vətəndaşı qürur hissi duyur ki, Prezidentimiz cənab İlham Əliyevin rəhbərliyi altında Azərbaycan öz tarixi nailiyyətlərini, milli ənənələrini bütün dünyaya nümayiş etdirir. Möhtərəm Prezidentimizin sözləri ilə desək, “indi Azərbaycan bölgədə gedən önəmli proseslərin nəinki təşəbbüskarı, həm də icraçısıdır. Azərbaycanın iştirakı olmadan bölgədə heç bir layihə – nə siyasi, nə iqtisadi, nə də nəqliyyat layihəsi həyata keçirilə bilməz.”

O, fəaliyyətinin ilk aylarından regionların inkişaf etdirilməsi üçün ölkənin hərtərəfli potensialını nəzərə alıb özünün sosial-iqtisadi platformasının əsas istiqamətlərini müəyyənləşdirmişdir. Möhtərəm Prezidentimiz mövcud təbii və iqtisadi potensialdan səmərəli istifadəni təmin etmək, qeyri-neft sektorunun inkişafı və təkmilləşdirilməsi, aqrar sahədə islahatları daha da sürətləndirmək, əhalini yeni iş yerləri ilə təmin etmək, infrastrukturu yeniləşdirmək, ərazilərə uyğun müasir müəssisələr açmaq və s. məqsədilə 11 fevral 2004-cü il tarixli fərmanı ilə “Azərbaycan Respublikası regionlarının sosial-iqtisadi inkişafı (2004-2008-ci illər)” Dövlət Proqramını təsdiq etmişdir. Möhtərəm Prezidentimizin dövlətimiz və xalqımızın inkişafı və firavanlığı üçün gərgin əməyi, gördüyü işləri göz qabağındadır. Respublikamızın iqtisadi potensialının yüksək olmasıdır ki, bu gün hər yerdə tikinti, abadlıq, quruculuq işləri görülür. Ölkəmizin bir parçası olan rayonumuz da bu işlərdən kənarda qalmayıb. Möhtərəm Prezidentimizin kursu istiqamətində Siyəzəndə görülən işlər rayon əhalisinin ürəyincədir. Son bir ildən artıq dövrdə rayonda görülən işlərin içərisində ən şərəflisi və siyəzənlilərin çox böyük hörmətlə qarşıladığı ümummilli liderimiz Heydər Əliyevin möhtəşəm abidəsinin ucaldılmasıdır.

Xatirə abidəsi ucaldılan gündən elə bir ümumrayon tədbiri yoxdur ki, ilk öncə ümummilli liderimizin abidəsi ziyarət olunmamış keçirilsin. Bundan başqa, keçirilən bütün tədbirlərin hər biri o dahi şəxsiyyətin adı ilə başlanır və onun adı ilə də yekunlaşır.

Ulu öndərin anadan olmasının 86-cı ildönümü ilə əlaqədar rayon icra hakimiyyəti başçısının imzaladığı sərəncama əsasən keçirilən ümumrayon tədbirində minlərlə siyəzənlinin onun xatirə abidəsini ziyarət etməsi bu dahi rəhbərə olan sevgi və məhəbbətin təcəssümüdür. Tədbirdə çıxış edən rayon RİH başçısı Əflatun Rufiyev qeyd etdi ki, “ümummilli liderimiz Heydər Əliyevin xalqına olan xidmətləri heç nə ilə ölçüyə gəlməz. Azərbaycanda dövlətçilik ənənələrinin XX əsrin sonlarında bərpa edilib zənginləşdirilməsi, dövlət müstəqilliyinin möhkəmləndirilməsi, onun əbədiliyi, ölkəmizin hərtərəfli dinamik inkişaf yolu ilə inamla irəliləməsi, beynəlxalq nüfuzunun artması yalnız ulu öndərimizin misilsiz xidmətləri sayəsində mümkün olmuşdur. Bu gün xalqımızın arzuları Heydər Əliyev kursunun layiqli davamçısı möhtərəm Prezidentimiz cənab İlham Əliyevin rəhbərliyi ilə inamla həyata keçirilir. Azərbaycan xalqı xoşbəxtdir ki, Heydər Əliyevin qurub yaratdığı dövlətə bu gün onun layiqli davamçısı İlham Əliyev rəhbərlik edir və ümummilli liderimizin başladığı taleyüklü işləri ardıcıl surətdə və qətiyyətlə həyata keçirir. Bu gün Heydər Əliyevin qüdrətli zəkasından güc almış inkişaf strategiyası Azərbaycanın müstəqillik yollarında ardıcıl surətdə irəliləməsini təmin edir. Biz siyəzənlilər dövlətimizin rəhbərinə inanırıq. Ötən il prezident seçkilərində və bu il Konstitusiyamıza əlavə və dəyişikliklərlə bağlı keçirilən ümumxalq səsverməsində rayonumuzun əhalisinin yüksək siyasi fəallığı bu inamın aydın təcəssümüdür. Siyəzənlilər bilir ki, bu referendum xalqımızın və gələcək nəsillərimizin firavan yaşamasına hesablanmış proqramdır. İnanırıq ki, ümummilli liderimiz Heydər Əliyev ideyalarının layiqli davamçısı, xalqımızın vətənpərvər oğlu, möhtərəm Prezidentimiz İlham Əliyev işıqlı gələcəyimiz naminə əlindən gələni əsirgəməyəcək, biz siyəzənlilər bundan sonra da Prezidentimizin ətrafında sıx birləşəcək, onun atdığı addımlardan nümunə götürərək rayonumuzun inkişafı üçün əlimizdən gələni əsirgəməyəcəyik.” Ötən dövrdə əldə edilən nailiyyətlər və uğurlardan, regionlarda mövcud olan potensialdan aydın oldu ki, bu imkanlardan daha geniş və səmərəli surətdə istifadə etmək olar. Odur ki, möhtərəm Prezidentimiz bu məqsədlə 2009-2013-cü illərdə regionların sosial-iqtisadi inkişafının daha əhəmiyyətli-ikinci mərhələsini həyata keçirmək üçün Dövlət Proqramını qəbul etdi. Bu proqramda nəzərdə tutulmuş tədbirlərin həyata keçirilməsi üçün artıq möhkəm baza və təcrübə mövcuddur. Dünyada gedən iqtisadi tənəzzül və böhrana baxmayaraq demokratik prinsiplər əsasında iqtisadiyyatımızın müasir dövrün tələblərinə uyğunlaşdırılması, onun inkişafı üçün əlverişli şəraitin yaradılması Dövlət Proqramında nəzərdə tutulan mühüm məsələlərdən biridir.

Azərbaycan Prezidenti Administrasiyasının rəhbəri cənab Ramiz Mehdiyev 19 mart 2009-cu il tarixli “İzvestiya” qəzetinə verdiyi müsahibəsində qeyd etmişdir: “Müasir suveren dövlətlərin hər biri müəyyən şərtlər daxilində demokratik idarəetmə forması əldə edə bilər. Lakin demokratiyanın qorunub saxlanması və onun davamlı xarakter alması üçün müvafiq iqtisadi baza olmalıdır. Buna görə də 2003-2008-ci illərdə İlham Əliyevin prezidentliyinin əsas konsepsiyası modernləşmiş iqtisadiyyatdan konsolidasiyalı demokratiyaya keçidi təmin edən yeni paradiqma yaratmaqdan ibarət idi.”

Bəli, 2009-2013-cü illər üçün təsdiq olunmuş yeni Dövlət Proqramı isə əvvəlki proqramda nəzərdə tutulmuş məsələlərin icrası əsasında yeni iqtisadi münasibətlərin formalaşdırılmasına zəmin yaradacaqdır. Həmin proqramda bizim Siyəzən rayonunun gələcək inkişafı üçün nəzərdə tutulan 12 tədbir qeyd edilmişdir ki, bu da rayon ictimaiyyəti tərəfindən çox böyük razılıq və minnətdarlıqla qarşılanmışdır. Bütün dünyanı bürümüş qlobal maliyyə böhranına baxmayaraq respublikamızda onun təsiri bir o qədər hiss olunmur. Möhtərəm Prezidentimiz ötən aprel ayında Nazirlər Kabinetinin müşavirəsində çıxış edərək demişdir ki, “Azərbaycanda hökm sürən siyasi sabitlik, əlverişli biznes mühiti, iqtisadiyyatımızın investisiyalar üçün cəlbedici olması xarici sərmayədarların ölkəmizə marağını getdikcə artırır. Məhz buna görədir ki, xarici investorların, beynəlxalq maliyyə qurumlarının və Azərbaycanın İnvestisiya Şirkətinin birgə iştirakı ilə nəhəng, region üçün son dərəcə əhəmiyyətli sənaye müəssisələrinin yaradılması prosesi, qlobal maliyyə böhranına baxmayaraq, hazırda davam edir.”

Ölkə Prezidentinin apardığı düzgün daxili və xarici siyasət tam əminliklə deməyə əsas verir ki, ölkəmizin siyasi-iqtisadi inkişafı bundan sonra da güclü olacaq. Bu gün ölkəmiz qarşısında duran ən ağır problem Ermənistan-Azərbaycan, Dağlıq Qarabağ probleminin həllidir. Bu istiqamətdə çoxlu danışıqlar aparılmış, diplomatik addımlar atılmışdır. Artıq ölkə Prezidentinin qətiyyətli mövqeyi problemin həllinə öz müsbət təsirini göstərməkdədir.

Möhtərəm Prezidentimiz Azərbaycanın siyasi və mədəni nüfuzunu daha da yüksəltmək üçün çox böyük səylər nümayiş etdirir. Təsadüfi deyildir ki, əsası ümummilli liderimiz Heydər Əliyev tərəfindən qoyulan və Prezident İlham Əliyevin uğurla davam etdirdiyi diplomatiya sayəsində dünyanın aparıcı dövlətləri Qarabağ münaqişəsinin Azərbaycanın ərazi bütövlüyü çərçivəsində həllini dəstəkləyir, xalqımızın haqq səsini ədalətli qiymətləndirirlər. Dünya birliyi Dağlıq Qarabağ adlı respublika tanımır. Ümummilli liderimizin dediyi kimi, “dünya dövlətlərinin Azərbaycanı bütövlükdə dəstəkləməsi üçün zamana ehtiyac var.” Həmin zaman artıq yetişib. Bu gün bütün dünya, ələlxüsus, problemlərin kökündə və həllində maraqlı olan dövlətlər açıq şəkildə görürlər ki, Qafqazda Azərbaycanın problemi çözülmədən sabitliyə nail olmaq mümkün deyil. Əlbəttə, bu, Heydər Əliyev siyasi kursunun layiqincə davam etdirilməsinin nəticəsidir. Ötən ilin noyabr ayının 20-də Bakıda keçirilmiş “Azərbaycan-XXI əsrdə uğurun strategiyası” mövzusunda beynəlxalq görüşün iştirakçılarını qəbul edərkən möhtərəm Prezidentimiz demişdir ki, “...bizim nəzərdə tutduğumuz planları həyata keçirmək üçün Qafqazda sülh zəruridir.” Dövlətimizin başçısı bütün tədbirlərdə dünya ictimaiyyətini Qafqazda olan siyasi gərginliyi aradan qaldırmaq, regionda və dünyada sülhün bərqərar olması üçün köməklik göstərilməsinə çağırmışdır.

Respublikamızda iqtisadiyyatın hərtərəfli inkişafına ciddi diqqət yetirilməsi təsadüfi deyil. Çünki iqtisadiyyatımız inkişaf etməsə torpaqlarımızın azad olunmasından, milli-mənəvi dəyərlərimizin qorunmasından danışmağa dəyməz. Möhtərəm Prezidentimizin “güclü dövlət müstəqil siyasət deməkdir” kəlamı da bu mənada öz təsdiqini tapır. Regionların sosial-iqtisadi inkişafı ilə bağlı (2004-2008-ci illər) Dövlət Proqramının icrasının yekunları deməyə əsas verir ki, möhtərəm Prezidentimizin məqsədi Azərbaycanın hər bir vətəndaşı üçün layiqli və firavan həyat tərzinin təmin olunmasına, ölkədə azad və demokratik cəmiyyətin qurulmasına, milli-mənəvi dəyərlərimizin qorunub saxlanmasına və onun zənginləşdirilməsinə, elmin, mədəniyyətin inkişaf etdirilməsinə nail olmaqdır. Ona görə də hər kəs öz sahəsində bacardığı qədər bu yolda Prezidentimizə öz köməyini əsirgəməməlidir.

Bu gün Heydər Əliyev Fondunun bu sahədə atdığı addımlar çox böyük hörmət və rəğbətlə qarşılanır. Ümummilli liderimizin hərtərəfli fəaliyyətində, ölkənin iqtisadi, sosial və mədəni inkişafında əsas amillərdən olan elm, təhsil və mədəniyyətin inkişaf etdirilməsi məsələləri əhəmiyyətli yer tutur.

Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, millət vəkili Mehriban xanım Əliyeva bu sahələrlə bağlı layihələrin həyata keçirilməsinə, dünya standartlarına cavab verən yeni məktəblərin tikintisinə, azərbaycançılığın daha da inkişaf etdirilməsinə, böyüməkdə olan nəslin sağlam və hərtərəfli biliyə malik, layiqli vətəndaş kimi yetişməsinə həm kömək, həm də yardım edir. Mehriban xanım Əliyeva Moskvada çıxan “Exo planetı” jurnalına verdiyi müsahibəsində demişdir: “Mən Azərbaycan xalqının rifahına xidmət edən humanitar proqramların səmərəsini artırmaq üçün bütün mövcud imkanlardan istifadə etməyi özümə borc bilirəm.” Ümummilli liderimizin humanist ideyalarını rəhbər tutub öz fəaliyyətilə xalq arasında böyük nüfuz qazanmış Heydər Əliyev Fondu insanlara ən yüksək səviyyələrdə yardım göstərməklə cəmiyyətdə sağlam ənənələrin, zəngin mənəvi dəyərlərimizin möhkəmlənməsinə var gücü ilə köməklik göstərir. Mehriban xanım Əliyevanın həyata keçirdiyi möhtəşəm işləri, reallaşdırdığı layihələri hər bir azərbaycanlı tərəfindən böyük rəğbətlə qarşılanır. Bu gün müstəqil dövlətimizin nə qədər uğurları, nailiyyətləri varsa bütün bunlara görə biz Heydər Əliyevə borcluyuq. İndi Azərbaycan BMT-nin, ATƏT-in, Avropa Şurasının, Avroatlantika Tərəfdaşlıq Şurasının, MDB-nin, Qara Dəniz İqtisadi Əməkdaşlıq Təşkilatının, İslam Konfransı Təşkilatının, İqtisadi Əməkdaşlıq Təşkilatının və digər nüfuzlu beynəlxalq qurumların tamhüquqlu üzvü, GUAM regional təşkilatının təşəbbüsçüsü və fəal iştirakçısıdır.

Azərbaycan yaşadıqca Heydər Əliyev ümummilli liderimiz və fəxri Prezidentimiz olaraq qəlbimizdə həmişə yaşayacaqdır.

Bəzən onu bir çox dahilərə bənzədirlər. Ancaq mən onu heç kimə, yalnız özünə bənzədirəm. O, Azərbaycan üçün Günəşdir.

Xaqani BƏŞİROV,

politoloq

Xalq qəzeti.- 2009.- 9 iyun.- S. 4.