Hacıqabul: yeniləşmə prosesi getdikcə güclənir

2009-cü ilin ilk rübündə görülən işlər, həyata keçirilən tədbirlər Hacıqabul rayonunun yeniləşməsinə və inkişafına xidmət edir. Rayonda aqrar islahatların uğurla həyata keçirilməsi kənd təsərrüfatının dinamik inkişaf etdirilməsinə, sahədə qazanılan uğurları ilbəil artırmağa zəmin yaradır. Təsərrüfatlarda 11221 hektar taxıl əkilmişdir ki, bunun 5995 hektarı buğda, qalanı isə arpadır. Həmçinin 352 hektarda tərəvəz, 642 hektarda bostan məhsulları əkilmişdir.

Heyvandarlıq məhsulları istehsalında da nəzərəçarpacaq artım qeydə alınmışdır. Bu ilin birinci rübündə süd istehsalı 3498 ton, ət istehsalı 1160 ton, yumurta istehsalı 26,800 min ədəd olmuşdur. Bunlar isə 2008-ci ilin birinci rübü ilə müqayisədə müvafiq olaraq 2 ton, 12 ton və 3,810 min ədəd çoxdur.

Dövlət başçısının “Kənd təsərrüfatı məhsulları istehsalçılarına dövlət dəstəyi haqqında” 23 yanvar 2007-ci il tarixli sərəncamına müvafiq olaraq “Aqrolizinq” vasitəsi ilə bu ilin I rübündə kənd əməkçilərinə 50 ton fosfor, 100 ton azot gübrəsi paylanmışdır. 2008-ci il üçün əkilmiş buğda məhsulunun istehsalçılarına ilin əvvəlindən 204 min 781 manat dövlət yardımı edilmişdir. Bu il buğda əkinlərinin sahəsi ötən ilə nisbətən 300 hektar artmışdır. Bu, taxıl əkinlərinə torpaq sahiblərinin marağının artdığını göstərir. Torpaq istifadəçilərinə kömək məqsədi ilə birinci rübdə suvarma sistemində 54,8 kilometr lildən təmizləmə, təmir-bərpa işləri aparılmışdır. Həmçinin 4 ədəd hidrotexniki qurğu, 2 elektrik mühərriki, 3 ədəd nasos, 1 ədəd güc transformatoru əsaslı təmir olunmuşdur.

2009-cu ilin birinci rübündə rayonda qeydiyyatdan keçmiş tikinti təşkilatları tərəfindən 202,1 min manatlıq iş görülmüşdür.

Bu ilin 3 ayı ərzində şəhərdə inşa olunan Uşaq Tibb Mərkəzində xeyli iş görülmüş, mədəniyyət evində, rayon təhsil şöbəsi, Sosial Müdafiə Fondu, baytarlıq idarələrinin inzibati binalarında, Xüsusi Dövlət Mühafizə Xidməti əməkdaşları üçün yataqxana binasında və Atbulaq kəndində inşa edilən Kərpic zavodunda tikinti-quraşdırma işləri əsasən başa çatdırılmışdır.

Birinci rübdə büdcə vəsaiti hesabına 27,8 min manatlıq abadlıq və yol təmiri işləri görülmüşdür. 17,8 min manatlıq yerli büdcə vəsaiti hesabına şəhərin S.Vurğun və M.Ə.Rəsulzadə küçələrində təmir və hamarlayıcı qatın düzəldilməsi işləri görülmüşdür. Mərkəzi rayon xəstəxanasına gedən yolun qurulması davam etdirilmişdir. Burada mişar daşından 40 santimetr qalınlığında 300 kvadratmetr divar hörgüsü, 70 metr sütunlar hörülmüşdür. Divarın 200 kvadratmetr hissəsi ağ-lay ilə üzlənmişdir. Bu işlərə 10 min manat vəsait xərclənmişdir.

Büdcədən kənar vəsait hesabına 176,1 min manatlıq quraşdırma və yol təmiri işləri görülmüşdür. Atbulaq kəndində yeni idman meydançası düzəldilərək, metal çərçivələrlə hasara salınmışdır. Stadionda futbol, voleybol, həndbol, paralel qollar, tir nərdivan və maneəli keçid kimi idman qurğuları quraşdırılmışdır.

Atbulaq kəndində 240 metr, Padar qəsəbəsində 60, Rəncbər kəndində 600, Meyniman kəndində 500, Kolanı kəndində 550, Qarasu kəndində 300, Muğan qəsəbəsində 480, Navahı kəndində 4000, Qubalı Balaoğlan kəndində 600 metr, Udullu kəndarası avtomobil yoluna 10 kilometr, Talış kəndində 500 metr avtomobil yoluna qum-çınqıl qarışığından əsas qoyulmuşdur.
Heydər Əliyev küçəsində bardurlar suvanmış, 15 kvadratmetr sahə hörülmüş və ağ-lay daşı ilə üzlənmiş, mişar daşından 20 poqonometr karniz qoyulmuş və dəmir borudan olan dirək beton üzlük ilə üzlənmişdir. M.Əsədov küçəsində ümummilli liderin şəkilini bəzəyən möhtəşəm panno quraşdırılmış və ətrafı abadlaşdırılmışdır. Dağüstü massivdə daha bir pannonun quraşdırılması işi davam etdirilir. Burada abadlıq və yenidənqurma işləri sürətlə davam edir. Bakı istiqamətində şəhərə girişdəki dağın ön hissəsinə mişar daşından 300 kvadratmetr divar hörülmüş, 240 kvadratmetr sahə xüsusi zövqlə qaya daşı ilə üzlənmişdir. Həmin hissələrə gül-çiçək kolları əkilmiş, rahat hərəkət üçün tavalardan pilləkən tikilmişdir. Bu istiqamətdən girişdə üçbucaq adlanan hissədə bütün çökəklər torpaq ilə doldurularaq hamarlanmış, kənarlarına bardur düzülmüş və ərazinin yaşıllaşdırılmasına başlanmışdır. Hissənin mərkəzində bayrağımızın simvoluna uyğunlaşdırılaraq üç rəngli dairələr quraşdırılaraq qüllə ucaldılmışdır. Qüllənin üzərində Azərbaycan Respublikasının bayrağı ucaldılmış, işıqlandırma sistemi başa çatmışdır.

Dağüstü massivdəki Şəhidlər Xiyabanında son tamamlama işləri görülür. Burada ağ-lay daşından üzləmə, dekorativ tavalardan döşəmə işləri görülmüş, işıqlandırma üçün pilsan çıraqları quraşdırılmışdır.

Prezident İlham Əliyevin ekoloji məsələləri də daim diqqət mərkəzində saxladığı bəllidir. Sağlam ekoloji mühit, sağlam hava, təmiz su insan həyatı üçün ən vacib şərtlərdir. Bu məqsədlə həyata keçirilən tədbirlər sırasında yeni yaşıllıqların salınması, onun qorunması və artırılması mühüm yer tutur. Nazirlər Kabinetinin məlum iclasında ölkə rəhbəri qarşıya son dərəcə vacib və əhəmiyyətli vəzifə qoydu: qısa müddət ərzində Bakıda və Bakının ətrafında ən azı 3 milyon ağac əkilməlidir.

Şəhərdə, rayonun qəsəbə və kəndlərində geniş vüsət alan yaşıllaşdırma kampaniyası 2009-cu ilin ilk rübündə də davam etdirilmişdir. Heydər Əliyev Fondunun prezidenti, millət vəkili, YUNESKO-nun və İSESKO-nun xoşməramlı səfiri Mehriban xanım Əliyevanın “Hərəmiz bir ağac əkək” çağırışına həvəslə qoşulan hacıqabullular bu mövsümdə 7,5 min ağac və 8 min gül kolları əkməyə nail olmuşlar. Təkcə şəhərdə 2,5 minə yaxın ağac və 5,1 min ədəd gül kolları əkilmişdir. Yaşıllığın salınması və ona qulluq bu gün də davam etdirilir.

Rayonda ümumi sahəsi 2,7 min kvadratmetr olan yaşayış sahəsi istifadəyə verilmişdir. Bu, əvvəlki illə müqayisədə 900 kvadratmetr çoxdur. Birinci rübdə xırda sahibkarlıqla məşğul olanlar üçün 1476,5 kvadratmetr torpaq sahəsi ayrılmışdır.

Əhalini elektrik enerjisi, təbii qaz və içməli su ilə etibarlı şəkildə təmin etmək məqsədilə bu ilin ilk üç ayında Atbulaqda 25 ədəd, Talışda 230 ədəd, Meynimanda 14 ədəd, Ağacanlıda 28 ədəd, Pirsaatda 10 ədəd SİP kabel vasitəsi ilə yeni elektrik sayğacları quraşdırılmışdır. Mart ayının 1-dən Hacıqabul şəhərində yeni “Smart kart” tipli elektrik sayğaclarının quraşdırılmasına başlanmışdır. Şəhərin Xilə massivində 413 ədəd bu cür sayğac quraşdırılmışdır. Rüb ərzində Xiləmirzə, Qarasu, Rəncbər-Qubalı, Meyniman və Navahı hava xətlərində və transformatorlarda təmir işləri aparılmışdır.

Əhalinin içməli su ilə təminatı sahəsində bir sıra işlər görülmüş, şəhərdə və ayrı-ayrı yaşayış məntəqələrində köhnəlmiş xətlər təzələnmişdir. Bu gün rayonda 46162 abonentə xidmət göstərilir. Ərazidə 294 sayğac quraşdırılmışdır.

Rayonda yeni məktəblərin sırasına bu ilin birinci rübündə daha bir məktəb əlavə olunmuşdur. Təhsil Nazirliyi tərəfindən Tava kəndində tikilən məktəb müasir avadanlıqlarla təchiz olunmuş vəziyyətdə istifadəyə verilmişdir. Rüb ərzində məktəblərin qızdırılması istiqamətində iş davam etdirilmişdir. Bu gün rayonda mərkəzləşdirilmiş qaydada qızdırılan 8 məktəbdən 5-i bu rübdən normal qaydada qızdırılır. Bütün bunlar tədris ocaqlarında davamiyyətin yüksəlməsinə, təlimin daha yaxşı aparılmasına imkan yaradır.

2007-ci ildə istifadəyə verilən 50 çarpayılıq mərkəzi rayon xəstəxanası əhaliyə nümunəvi xidmət göstərməyə çalışır. Ölkə başçısının iştirakı ilə təməli qoyulan Uşaq Tibb Mərkəzinin tikintisi bu ilin birinci rübündə daha da sürətlənmişdir. Hazırda burada son tamamlama işləri görülür. Heydər Əliyev Fondunun prezidenti Mehriban Əliyevanın təşəbbüsünə qoşulan idarə, müəssisə işçilərinin iştirakı ilə fevral ayında mərkəzi rayon xəstəxanasında qanvermə aksiyası keçirilmişdir. 158 nəfər könüllü olaraq 63 litrdən artıq qan vermişdir.

Respublika Prezidentinin tapşırığı ilə rayon mədəniyyət evi müasir tələblərə cavab verəcək səviyyədə yenidən qurulur. “Azərbaycanda kitabxanaların fəaliyyətinin yaxşılaşdırılması haqqında” Prezident sərəncamının icrasını təmin etmək məqsədi ilə rayon Mərkəzi Kitabxanasında avtomatlaşdırılmış kitabxana informasiya sistemi quraşdırılmış və internet saytı açılmışdır.

Rayon İcra Hakimiyyətinin başçısı Əhməd Muxtarov söhbət əsnasında dedi:

— Möhtərəm Prezidentimiz İlham Əliyev aprelin 14-də regionların sosial-iqtisadi inkişafına dair ikinci Dövlət Proqramını təsdiq etdi. 2009-2013-cü illəri əhatə edəcək proqramda bölgələrin daha geniş miqyaslı tərəqqisi, əhalinin rifahının yüksəldilməsi kimi həyata keçiriləcək mühüm tədbirlər öz əksini tapıb. Sənaye və kənd təsərrüfatı istehsalının genişləndirilməsi, ekoloji və təbii sərvətlərdən istifadə, yol təsərrüfatları və nəqliyyatın fəaliyyətini, elektrik enerjisi, istilik və qaz təchizatını və kanalizasiya xidmətlərini yaxşılaşdırmaq tədbirlər planına daxildir. Şəhərin qaz, elektrik, su və kanalizasiya şəbəkələri yenidən əsaslı şəkildə qurulacaq, yollar, küçələr təmir ediləcək, kəndlər qazlaşacaq, ərazidə yeni səhiyyə müəssisələri, mədəniyyət obyektləri, məktəb binalarının tikintisi və təmiri reallaşacaqdır. Gənclər üçün yeni idman-sağlamlıq obyektlərinin inşası da dövlət proqramında əks olunmuşdur. Aqrar rayon kimi tanınan Hacıqabulda qarşıdakı illərdə geniş meliorasiya və irriqasiya tədbirləri həyata keçirmək, yeni torpaq sahələrinin suvarılmasını təmin etmək məqsədilə suvarma kanallarının tikintisi, ərazidəki meliorasiya-irriqasiya obyektlərinin təmiri və yenidən qurulması nəzərdə tutulmuşdur. Təbii ki, bütün bunlar Hacıqabul rayonunun simasını daha da gözəlləşdirəcək, iqtisadiyyatını gücləndirəcək, hacıqabulluların güzəranını xeyli yaxşılaşdıracaqdır.

Səməd HÜSEYNOĞLU

Xalq qəzeti.- 2009.- 11 iyun.- S. 5.