Avrasiya İqtisadi Birliyi antiböhran fondu yaradır

Avrasiya İqtisadi Birliyinə daxil olan ölkələrin Moskvada keçirilən son toplantısı başa çatıb. Tədbirin ən əlamətdar yekunu budur ki, Birliyin nəzdində 10 milyard dollar həcmində xüsusi antiböhran fondunun yaradılacağı elan edilib.

Qlobal böhran Avrasiya İqtisadi Birliyində cəmləşən ölkələrin iqtisadi durumunu çətin vəziyyətə salıb. Birlik üzvləri bəyan ediblər ki, iqtisadi böhranla, ilk növbədə birgə mübarizə aparmaq üçün ən təsirli vasitələrdən birir antiböhran fondunun yaradılmasıdır. Yuxarıda qeyd etdiyimiz kimi, bu fondda 10 milyard dollar vəsait cəmləşməlidir ki, bunun 7,5 milyard dollarının Rusiya Federasiyası tərəfindən ödənilməsi nəzərdə tutulub. Antiböhran fondunun nizamnəməsində qeyd olunub ki, bu qurumun əsas funksiyası iştirakçı ölkələrə suveren borclar və sabitləşdirici kreditlər verməkdir. Rusiyanın maliyyə naziri Aleksey Kudrin bəyan edib ki, fond bütün üzv ölkələrin onun yaradılması haqqında qərarı ratifikasiya etməsindən sonra işə başlayacaq. Cənab A. Kudrinin sözlərinə görə, müvafiq hazırlıq işlərinə təxminən 2 ay vaxt lazım gələcək.

Rusiya hökuməti Avrasiya İqtisadi Birliyiyi ilə yanaşı, MDB ölkələri çərçivəsində Gömrük İttifaqının da inkişafına böyük önəm verir. Rusiyanın Baş naziri Vladimir Putin bəyan edib ki, Rusiya, Belarus və Qazaxıstan arasında vahid gömrük tarifləri artıq 95 faiz uzlaşdırılıb. Müşahidəçilər bildirirlər ki, bu istiqamətdə Rusiya ilə Belarus arasında demək olar ki, bütün məsələlər həll olunub. Bir çox ekspertlərə görə, Rusiya hökuməti antiböhran fondu yaratmaqla MDB ölkələrində öz nüfuz dairəsini genişləndirməyə çalışır. İndiyə kimi rəsmi Moskva özünə siyasi baxımdan daha yaxın Belarus, Qırğızıstan və Ermənistana kreditlər verib. Rəylərə görə, Rusiya öz kreditləriylə MDB-dəki qonşularının siyasi loyallığını qazanmağa çalışır. Avrasiya İqtisadi Birliyinin nəzdində yaradlan antiböhran fondu barədə hazırda Rusiya mətbuatında geniş şərhlər dərc edilir. Moskvalı politoloq Vladimir Jarixinə görə, Rusiyanın öz nüfüzünü artırmaq cəhdləri normal bir şeydir və imkanı olan bütün böyük ölkələr bu yolla gedir. Cənab Jarixin deyib ki, “böhrana Rusiya başqa MDB ölkələri ilə müqayisədə daha yaxşı hazırlıqlı daxil olub.

Ona görə indi Rusiyanın başqa ölkələrə kömək etməyə imkanı var. Bununla da Rusiyanın bu ölkələrdə öz siyasi və iqtisadi nüfuzunu artırmağa imkanı olacaq”.

Ən son məlumatlara görə, Belarus tezliklə antiböhran fondundan 500 milyon dollar kredit ala biləcək. Xatırladaq ki, Belarus Prezidenti Aleksandr Lukaşenko rotasiya qaydası ilə hazırda Avrasiya İqtisadi Birliyinə sədrlik edir.

M. HACIXANLI

Xalq qəzeti.- 2009.- 11 iyun.- S. 6.