Qaxda ümumrayon tədbiri

Qax rayonunda 15 İyun — Milli Qurtuluş Gününün növbəti ildönümünə həsr olunmuş rayon tədbiri keçirilmişdir. Ulu öndərimiz Heydər Əliyevin abidəsi önünə əklil və gül dəstələri qoyulmuş, sonra ümumrayon tədbiri başlanmışdır.

Toplantını giriş sözü ilə rayon icra hakimiyyətinin başçısı Mübariz Əhmədzadə açmış, “15 İyun tariximizin parlaq səhifəsidir” mövzusunda məruzə oxumuşdur. Sonra məruzə ətrafında çıxışlara başlanmışdır.

Rayon Mədəniyyət və Turizm Şöbəsinin müdiri Nəzir Omarov, Qaxıngilov kənd orta məktəbinin direktoru Natella Otaraşvili, Rayon Mərkəzi Xəstəxanasının həkimi Mədinə Süleymanova, Rayon Məhkəməsinin sədri Atabəy Kiçibəyov çıxış edərək 15 İyun — Milli Qurtuluş Gününün tarixi əhəmiyyətindən söz açmış, əlamətdar gün münasibətilə toplantı iştirakçılarını və onların timsalında bütün xalqımızı təbrik etmiş, ümummilli lider Heydər Əliyevin xalqımız üçün göstərdiyi misilsiz xidmətlərindən danışmışlar.

Daha sonra Rayon Qeydiyyat Şöbəsinin yeni binasının açılış mərasimi olmuşdur. Tədbiri giriş sözü ilə RİH başçısının təhsil, səhiyyə və mədəniyyət üzrə müavini Ziyafət Xasıyeva açmışdır. Azərbaycan Respublikası Qeydiyyat və Notariat Baş İdarəsinin rəis müavini Mehman Soltanov çıxış edərək möhtəşəm binanın açılışının xoş günə təsadüf etdiyindən, yeni binanın rayon üçün əhəmiyyətindən və son illər respublikada aparılan geniş tikinti-quruculuq işlərindən, Prezident İlham Əliyev cənablarının apardığı uğurlu və uzaqgörən siyasətdən söz açmışdır.

Daha sonra RİH-in başçısı Mübariz Əhmədzadə yekun söz söyləmiş, Qeydiyyat şöbəsinin binasının açılışını bildirən lent kəsilmiş və yeni bina ilə tanışlıq olmuşdur.

İ. MUSAOĞLU,

“Xalq qəzeti”

Xalq qəzeti.- 2009.- 14 iyun.- S. 9.