Ağdaş: islahatlardan qaynaqlanan hərtərəfli yüksəliş

Yaz köçünü çəkib gedib. Yayın isti nəfəsi aranla dağ arasında yerləşən Ağdaşda adamların qayğılarını artırıb. Mal-qara yaylağa qaldırılır, əkinlərin su tələbatını ödəmək üçün zəruri işlər görülür. Tikinti-quruculuq sahəsində çalışanlar da isti ayların çətinliklərini dəf etmək üçün hazırlıqlarını artırırlar. Builki yazın səxavətindən bolluca bar götürmüş zəmilərdə, tarlalarda gecə-gündüz tər tökən, əziyyət çəkən ağdaşlılar daha bir uğurlu ili yarıya çatdırmışlar.

Ulu öndər Heydər Əliyevin adı ilə bağlı aqrar islahatların, özəlləşdirmə proqramlarının yüksək səviyyədə aparıldığı rayonda Prezident İlham Əliyevin rəhbərliyi ilə hazırlanmış beşillik regional inkişaf proqramı da tarixi nailiyyətlərlə əlamətdar olmuşdur. Rayonun giriş-çıxış qapılarından tutmuş idarə və müəssisələrinədək, Ağdaş şəhərinin küçə, məhəllə, meydan və parklarından başlamış ucqar kəndlərədək hər yerdə, hər addımda yeniləşmənin, inkişaf və yüksəlişin şahidi olursan. Ağdaş Rayon İcra Hakimiyyətinin başçısı Rafiq Niftəliyevlə söhbətimiz də əvvəlki 10 illik islahatlar dövrü üzərində bərqərar olan son 5 illik quruculuq işləri barədə oldu.

Əzəmətli 5 il

Son 5 ilin uğurlarını Azərbaycan Respublikasının Prezidenti İlham Əliyevin 11 fevral 2004-cü il tarixli fərmanı ilə təsdiq edilmiş “Azərbaycan Respublikası regionlarının sosial-iqtisadi inkişafı Dövlət Proqramının (2004-2008-ci illər)” vüsət və əzəməti ilə bağlayan rayon rəhbəri bildirdi ki, nəzərdə tutulmuş tədbirlərin icrası müntəzəm olaraq nəzarətdə saxlanılmış, rüblər, yarımilliklər və illər ərzində görülmüş işlər təhlil edilmiş, növbəti dövrlər üçün vəzifələr müəyyənləşdirilmişdir. Dövlət Proqramında abadlıq və sosial sahənin inkişafının ön plana çəkilməsi bu sahəyə xüsusi diqqət tələb edirdi. Ona görə də 2003-2008-ci illər ərzində rayonda quruculuq-abadlıq sahəsində tədbirlərin həyata keçirilməsi və əhalinin xidmətlərlə normal təmin olunması üstün istiqamət kimi seçilmiş, bu sahədə məqsədyönlü işlər görülmüşdür.

Əvvəlki 5 ildə Ağdaş şəhərinin küçələrinə 93700 kvadratmetr tamet döşənmiş, küçə və yollara 372,3 min kvadratmetr asfalt vurulmuşdur. 10,5 kilometr uzunluğunda Ağdaş — Pirkəkə, Ləki — Pirəzə — Qaxay yolunun 2 kilometr hissəsi, Orta Ləki kəndində kəndarası 3,2 min kvadratmetr yol, Əmirarx — Güvəkənd — Ləki kəndlərarası 8 min kvadratmetr yol, Ağdaş şəhərinin mərkəzi küçələri, Ləki qəsəbəsinin iki mərkəzi küçəsi də asfaltlaşdırılmışdır.

Ağdaş şəhərinin Heydər Əliyev prospekti və digər mərkəzi küçələri — M. Ə. Rəsulzadə, M. İsayev, Vaqif, 20 Yanvar, M. Ə. Rəsulzadə, Maşad və C. Cabbarlı küçələrinə yenidən asfalt çəkilmişdir. Küçələrə 600 müasir elektrik dirəyi basdırılaraq gecə işıqlanma sistemi yeniləşdirilmişdir.

Kükəl və Ərəb kəndlərinin 3 kilometr, Yenicə kəndinin 8 kilometr, Birinci Aral kəndinin 6,5 kilometr, Qaradeyin kəndinin 6 kilometr, Tofiqi kəndinin 5,5 kilometr, Mürsəl kəndinin 7,4 kilometr yolu, Eymur — Ərəbski — Ağcaqovaq kəndlərinin 5 kilometr yolu və Şordəhnə kəndinin kəndarası 5,4 kilometr yolu çınqılla əsaslı təmir olunmuşdur. Bələdiyyələr kənd yaşayış məntəqələrinin daxili yollarına 56,1 min kubmetr çınqıl tökdürmüşdür. Beynəlxalq “İpək yolu” layihəsinin tərkib hissəsi olan “Ucar — Yevlax yolunun rekonstruksiya layihəsi”ni həyata keçirən “Polat Yol” Şirkətinin Azərbaycan filialı Ağdaş rayonunda yerləşir. Hazırda bu şirkət Ucar — Yevlax yolunun rayon ərazisindən keçən hissəsində tikinti və yenidənqurma işlərini davam etdirir.

İnsana qayğı və diqqət

Başçı xidmət sahəsindəki uğurlardan söz açaraq dedi ki, elektrik enerjisi və təbii qaz yanacağı ilə təminatı yaxşılaşdırmaq üçün ötən dövr ərzində əsaslı yenidənqurma və təmir işləri görülmüşdür. Rayonda 2005-ci ildə 2X16 MVA gücündə 110\35\10 KV-luq “Ağdaş” elektrik yarımstansiyası tikilib istifadəyə verilmişdir. 7,4 kilometr uzunluğunda yeni elektrik xətti çəkilməklə, “Pirəzə” və “Pirkəkə” 35\10 KV-luq yarımstansiyaları, həmçinin 3 kilometr uzunluğunda yeni elektrik xətti çəkilməklə, “Kükəl” və “Xosrov” 10 KV-luq xətlər “Ağdaş” yarımstansiyasına qoşulmuşdur. 10 KV-luq “Kükəl” xəttinin 7,5 kilometr uzunluğunda elektrik dirəkləri yenisi ilə əvəz olunmuşdur. Ümumiyyətlə, bu dövrdə rayonda 54 yeni elektrik transformatoru qoyulmuşdur. Rayon üzrə 19006 elektrik sayğacı quraşdırılmışdır. Elektrik enerjisi verilməsində fasilələr tamamilə aradan qaldırılmışdır.

Rayonda əhalinin normal təbii qaz yanacağı ilə təmin edilməsi üçün 2006-cı ildə 5,5 kilometr uzunluğunda qaz xətti çəkilərək, “Şəmsabad” qazpaylayıcı stansiyası işə salınmışdır. Ağdaş şəhərində təbii qazla təminatı yaxşılaşdırmaq üçün 2,5 kilometr dairəvi qaz xətti çəkilmiş, 1600 metr xətt yer üstünə çıxarılmış, 1400 metr yeni xətt çəkilmişdir. Cücük, Qolqəti, Yuxarı Qəsil, Qülbəndə, Gürcuva, Nehrəxəlil, Qarağan — Sədi, Bulaqotağı, Qarağan — Şıxlar, Qəsil, Qumlax, Kotanarx, Şordəhnə, Ərəb, Birinci Aral, Şəmsabad, Aşağı Qəsil, Kükəl və Orta Ləki kəndlərində isə qaz kəmərlərinin təmiri başa çatdırılmış və təbii qaz yanacağı verilmişdir. Rayon üzrə 10026 qaz sayğacı quraşdırılmışdır.

Daha sonra öyrəndik ki, Ağdaş şəhər M. Şeyxzadə, M. İsayev adına və 3 saylı məktəblərin, Ləki qəsəbə, Kükəl kənd məktəblərinin, Güvəkənd kənd orta məktəbinin yeni tikilmiş korpusunun istilik sistemləri qurulmuşdur. Ağdaş şəhərində şəhid ailələri və əlillər üçün tikilən 48 mənzilli yaşayış binası istifadəyə verilmişdir.

Ağdaş şəhərinin su-kanalizasiya sisteminin yenidən qurulması üçün layihə-smeta sənədləri hazırlanmışdır. Ağdaş şəhərinin su-kanalizasiya sisteminin yenidən qurulması layihəsi çərçivəsində 2 artezian quyusu qazılmış, idarə və anbar binalarının tikintisinə başlanılmışdır. Orta Ləki, Qoşaqovaq, Yuxarı Nemətabad kəndində isə modul tipli sutəmizləyici qurğu quraşdırılmışdır. Qəsil, Qəribli, Abad və Xosrov kəndlərində artezian su quyuları qazılmış və supaylayıcı sistem tikilmişdir.

Regional inkişaf proqramı üzrə rayonda humanitar sahənin yeniləşdirilməsindən söz açan başçı bildirdi ki, tibb xidmətinin səviyyəsinin yüksəldilməsi üçün Mərkəzi Xəstəxanada, poliklinikada, doğum evində təmir və abadlıq işləri aparılmışdır. Orta Ləki, Aşağı Ləki və Ərəb kəndlərində həkim ambulatoriyaları tikilmişdir. Ağdaş şəhərində 100 çarpayılıq yeni xəstəxana binasının və 9 kənddə sağlamlıq mərkəzinin tikintisi üçün müvafiq torpaq sahələri ayrılmışdır. 2008-ci ilin fevral ayında Dövlət Neft Şirkəti Mərkəzi Xəstəxanaya 381,9 min manatlıq 35 adda müxtəlif tibb avadanlıqları vermişdir.

Dövlət Proqramına uyğun olaraq, rayonda təhsilin inkişafına da xüsusi diqqət yetirilmişdir. Bu dövrdə 264 şagirdlik Kotavan, 200 şagirdlik Pirkəkə, 200 şagirdlik Kükəl kənd orta məktəblərinin binaları tikilib istifadəyə verilmişdir. Ağdaş şəhər 3 saylı orta məktəbinə 200 yerlik 10 sinif otağı, Yuxarı Ləki kənd orta məktəbinə 100 yerlik 5 sinif otağı, Yenikənd kənd əsas məktəbinə 40 yerlik 2 sinif otağı, Güvəkənd kənd orta məktəbinə 160 yerlik 8 sinif otağı, Dəhnəxəlil kənd orta məktəbinə 160 yerlik 8 sinif otağı, Mürsəl kənd orta məktəbinə 120 yerlik 6 sinif otağı tikilmişdir.

Ağdaş şəhər M.Şeyxzadə adına internat, 3 saylı, M.İsayev adına və Ləki qəsəbə 6 saylı orta məktəbləri əsaslı təmir olunmuşdur. 2008-ci ildə 320 şagirdlik Yuxarı Ləki və 320 şagirdlik Qaradeyin kənd orta məktəbləri üçün binanın tikintisinə başlanılmışdır. Hazırda həmin binaların tikintisi davam etdirilir. Azərbaycan Respublikasının Prezidenti İlham Əliyevin tapşırığı əsasında Ağdaşda tikilməsi nəzərdə tutulmuş Olimpiya İdman Kompleksində və Heydər Əliyev Fondunun vəsaiti hesabına tikintisinə başlanılmış Musiqi məktəbində də tikinti işləri davam edir.

Azərbaycan Respublikasının birinci xanımı, YUNESKO və İSESKO-nun xoşməramlı səfiri Mehriban xanım Əliyevanın təşəbbüsü ilə 2006-cı ildə əsaslı təmir olunmuş Ağdaş şəhər M.Şeyxzadə adına internat məktəbinin bazasında gimnaziya yaradılmışdır. Rayonun bütün məktəblərinə 387 kompyuter, 16 proyektor-noutbuk və müxtəlif avadanlıq verilmişdir.

Rayonda rabitə xidmətinin yaxşılaşdırılması üçün Mərkəzi Avtomat Telefon Stansiyasının (ATS-in) elektron ATS-lə əvəz edilməsi məqsədilə tender elan edilmişdir. Orta Ləki, Abad və Aşağı Zeynəddin kəndlərinin hər birində yeni 256 nömrəlik elektron ATS istifadəyə verilmişdir. Cardam kəndində 100 nömrəlik yeni ATS quraşdırılmışdır. Hapıtlı kəndində isə 96 nömrəlik yeni elektron ATS-in tikinti-quraşdırma işləri aparılır. Ləki qəsəbə ATS-nin tutumu 200 nömrə, Kükəl, Qoşaqovaq və Dəhnəxəlil kəndlərindəki ATS-in hər birinin tutumu 50 nömrə artırılmışdır. Rayonun Orta Ləki kəndində və Ləki qəsəbəsində yeni poçt binaları istifadəyə verilmişdir. Ağdaş şəhərində “Azərsell — Ekspress” müştəri xidməti mərkəzi yaradılmışdır.

Əhalinin Sosial Müdafiəsi Mərkəzinin inzibati binasının əsaslı təmiri başa çatmışdır. Dövlət Sosial Müdafiə Fondunun rayon şöbəsinin yeni binası və 9 saylı Ərazi Vergilər İdarəsinin xidməti terminalı tikilib istifadəyə verilmişdir.

İqtisadi uğurlar

Rayonda kənd təsərrüfatı məhsulları istehsalının artımını təmin etmək üçün də ardıcıl tədbirlər görülmüşdür. 2008-ci ilin məhsulu üçün əkilmiş 13812 hektar payızlıq taxıl sahələrindən 43,3 min ton taxıl istehsal olunmuşdur. Ümumiyyətlə, bitkiçilik məhsulları istehsalının inkişaf etdirilməsi sahəsində həyata keçirilmiş tədbirlər nəticəsində 2003-cü ilə nisbətən 2008-ci ildə taxıl 15964 ton artaraq 43347 tona, kartof 3388 ton artaraq 9985 tona, tərəvəz 15339 ton artaraq 54142 tona, bostan məhsulları 5613 ton artaraq 21233 tona, meyvə və giləmeyvə 5067 ton artaraq 19150 ton, üzüm istehsalı 1727 ton artaraq 2396 tona çatmışdır.

Taxıl məhsulları istehsalının artırılması üçün rayonda 7 yeni toxumçuluq təsərrüfatı yaradılmışdır. 2009-cu ilin məhsulu üçün 15528 hektar sahədə taxıl əkilmişdir. Bu, ötənilkindən 1716 hektar çoxdur. Zəmilərdən bol məhsul gözlənilir. Kənd təsərrüfatı məhsulları istehsalçılarına dövlət dəstəyi haqqında Prezident sərəncamına uyğun olaraq, ilk dəfə 15065 nəfər istehsalçıya 2170,3 min manat dövlət yardımı verilmişdir. Bu il üçün aqrar sektorda çalışanlara güzəştli qiymətlərlə 529 ton gübrə satılmışdır.

Rayonda heyvandarlıq məhsulları istehsalının artırılması üçün əhalidə olan mal-qaraya baytarlıq xidmətləri göstərilir, vaksinləşmə işləri aparılır. 2003-cü ilə nisbətən 2008-ci ildə iri malın sayı 17061 baş artaraq 72068-ə, xırda malın sayı isə 17698 baş artaraq 87428-ə çatmışdır. Son beş ildə ət istehsalı (kəsilmiş çəkidə) 2226 ton, süd 9807 ton, yun 34,6 ton, yumurta isə 4 milyon 88 min ədəd çoxalmışdır. Rayonda 7 yeni süni mayalandırma məntəqəsi yaradılmışdır. 2005-ci ildən rayonda şəkər çuğunduru istehsalına başlanmışdır.

Şirvan Kollektorlar və Ucar Meliorasiya idarələri ilə birlikdə rayonun Abad, Yuxarı Nemətabad, Xosrov, Binələr, Dovutlu, Qəribli, Yenicə və Kükəl kəndlərində mövcud kollektorların və şor kanallarının lildən təmizlənməsi layihələşdirilmişdir.

Son 5 ildə 50 min tut tingi, 35 mindən çox şam ağacı əkilərək, müxtəlif ərazilərdə yaşıllıq zolaqları salınmışdır. Bakı şəhərində təşkil edilmiş kənd təsərrüfatı məhsullarının satışı yarmarkalarına 683 tondan çox mal göndərilmişdir.

2005-ci ildə rayonda “Aqrotexservis” yaradılmışdır. Hazırda 8 şum traktoru, 8 taxılbiçən kombayn və 19 müxtəlif aqreqat və qurğu ilə aqrar sektora xidmət göstərilir. Fiziki şəxslər 5 kiçik aqrotexservis yaratmışdır.

Dövlət Proqramına uyğun olaraq rayonda olan tikinti materiallarının yataqları müəyyənləşdirilmişdir. Sənaye ehtiyatı 1500 min kubmetr olan Kükəl, 2197 min kubmetr olan Xaldan gil yataqları, ehtiyatı 10957 min kubmetr olan Türyançay qum-çınqıl yatağı mövcuddur. Ötən dövr ərzində Kükəl kərpic istehsalı zavodunda yeni texnologiya tətbiq olunaraq, istehsal fəaliyyəti bərpa edilmişdir. Burada müasir avadanlıq quraşdırılmış, istehsal gücü artırılmışdır. 2 yeni qim-çınqıl karxanası və 2 kərpic istehsalı sahəsi yaradılmışdır.

Plastik materiallardan qapı-pəncərə istehsal edən 3 yeni müəssisə fəaliyyət göstərir. 2 yeni nar şirəsi istehsalı sahəsi və “Ərəş” sərinləşdirici sular istehsalı müəssisəsi işə salınmışdır. 2004-cü ildə tikiş və trikotaj məhsulları istehsalı üçün yaradılmış müəssisəyə əlavə olaraq, 2,5 min kvadratmetr sahəsi olan üçmərtəbəli bina ayrılmışdır. Həmin binada hazırda təmir və yenidənqurma işləri davam etdirilir. Rayonda sənayenin inkişafı sahəsində həyata keçirilmiş tədbirlər nəticəsində 2003-cü ilə nisbətən 2008-ci ildə sənaye məhsulu istehsalı 3,1 dəfə və ya 6011 min manat artmışdır.

Əhaliyə göstərilən bank xidmətlərinin yaxşılaşdırılması üçün ötən dövr ərzində “Azəriqazbank”ın, “Dəmiryolbank”ın filialları və “FİNCA” kredit təşkilatının mərkəzi yaradılmışdır. Regionların sosial-iqtisadi inkişafı Dövlət Proqramının həyata keçirilməsi nəticəsində 2003-2008-ci illərdə rayonda 10907 iş yeri yaradılmışdır. Onun 3873-ü daimidir. Daimi iş yerlərinin 3792-si yeni yaradılmış müəssisə, təşkilat və xidmət obyektlərinin, 81-i isə mövcud müəssisələrinin payına düşür.

Yeni hüdudlar

Son 5 ildə əldə edilmiş uğurlar 2009 — 2013 illəri əhatə edən yeni dövlət proqramında nəzərdə tutulan irimiqyaslı işlərlə davam etdirilir, artırılır. Bu proqramda qarşıdakı illərdə sənaye, kənd təsərrüfatı, təbii sərvətlərdən istifadə, yol-nəqliyyat şəbəkəsi sahəsində yeni hüdudlar müəyyənləşdirilmişdir. Xidmət sahələrinin inkişaf etdirilməsi, meliorasiya və irriqasiya işlərinin genişləndirilməsi, quruculuq-abadlıq işlərinin artırılması da zəruri işlər sırasında yer alıb. İlin əvvəlindən əldə olunmuş nailiyyətlər göstərir ki, ağdaşlılar bu proqramda göstərilən müddəaları ardıcıl, dəqiq yerinə yetirirlər.

Bu müddətdə Ağdaş şəhərinin əsas mərkəzi küçələrinin abadlaşdırma işləri davam etmiş, bələdiyyələr tərəfindən kənd yaşayış məntəqələrinin daxili yollarına 2,8 min kubmetr çınqıl tökülmüşdür. Ucar-Yevlax yolunun rayon ərazisindən keçən hissəsində tikinti və yenidənqurma işləri davam etdirilmişdir. Ağdaş şəhərinin su-kanalizasiya sisteminin yenidən qurulması sahəsində də işlər sürətlənmiş, inzibati binanın, baza binasının və 6 min tonluq içməli su anbarının tikintisində xeyli iş görülmüşdür. “Azərsu” Səhmdar Cəmiyyətinin və Asiya İnkişaf Bankının nümayəndələrinin rayonda keçirilən görüşlərində işlərin layihədə nəzərdə tutulduğu müddətdə başa çatması qeyd olunmuşdur. Rayonun Qaradeyin kəndində əhalinin içməli su ilə təminatını yaxşılaşdırmaq üçün artezian quyusu qazılmışdır.

Elektrik enerjisi və təbii qaz yanacağı ilə təminatı yaxşılaşdırmaq məqsədilə təmir işləri davam etdirilmişdir. Dəhnəxəlil və İkinci Aral kəndlərdə yaşayan abonentlərin mənzillərinə qaz sayğacları quraşdırılaraq, təbii qaz yanacağı verilmişdir. Rabitə xidmətinin yaxşılaşdırılması sahəsində müəyyən işlər görülmüş, 84 yeni telefon çəkilmişdir. Rabitə olmayan kəndlərdə və yeni xəttin çəkilməsi mümkün olmayan şəhər ərazisində 35 abonentə CDMA telefonları quraşdırılmışdır.

İlin əvvəlindən sənaye sahələrinin inkişaf etdirilməsi sahəsində lazımi tədbirlər görülmüşdür. Yerli xammaldan istifadə edən qum-çınqıl karxanalarında, Kükəl kərpic istehsalı müəssisəsində istehsal prosesləri davam etmişdir. “Orelay” şirniyyat istehsalı müəssisəsinin yeni istehsal sexinin yaradılması sahəsində tikinti-quraşdırma işləri aparılmışdır. Birinci rübdə keçən ilin eyni dövründəkindən 27,8 faiz çox sənaye məhsulu istehsal olunmuşdur. Sahibkarlara 542 min manat kredit verilmişdir. Onların şəxsi vəsaiti hesabına iki şadlıq sarayının və bir istirahət mərkəzinin tikintisi davam edir.

2009-cu ilin məhsulu üçün əkilmiş 16 min 857 hektar taxıl sahəsində aqrotexniki qulluq işləri davam etdirilmiş, biçinə ciddi hazırlıq aparılmışdır. 868 hektar təzə yonca, 563 hektar kartof, 1218 hektar tərəvəz, 73 hektar bostan əkilmişdir.

Heyvanlara zoobaytar xidmətlərinin aparılması, heyvandarlığın inkişafı və onun cins tərkibinin yaxşılaşdırılması sahəsində ardıcıl tədbirlər həyata keçirilmişdir. Dövlət Baytarlıq Xidmətindən vaksin və dərmanların gətirilməsi və sahə baytar həkimlərinə paylanması təmin edilmişdir.

Yeni yaşıllıq zolaqlarının salınması və şəhərin mərkəzi küçələrindəki ağacların budanması, gül-çiçəklərin əkilməsi işləri aparılmışdır. Yaşıllıq zonaların artırılması məqsədilə 8 min şam və müxtəlif növlü bəzək ağacları əkilmişdir. Bakı şəhərinə 70 tondan çox müxtəlif kənd təsərrüfatı məhsulları göndərilmişdir.

2009-cu ilin birinci rübündə istehsalçıları müxtəlif növbə 125 ton güzəştli qiymətlərlə mineral gübrələr satılmışdır. 2009-cu il üçün buğda əkən 2468 nəfər istehsalçıya 436 min manat vəsait ödənilmişdir. Həyata keçirilmiş tədbirlən nəticəsində rayonda keçən ilin müvafiq dövrünə nisbətən ümumi məhsul istehsalı 16,7 faiz və ya 3 milyon 378 min manat artaraq, 23 milyon 738 min manat olmuşdur.

Xoş günlərə doğru

Aztəminatlı ailələrin sosial müdafiəsi ilə bağlı hazırda rayonda 2630 ailənin 12131 üzvünə ayda 275 min manat ünvanlı dövlət sosial yardımı verilir. 7 min 177 nəfərin pensiyalarının sığorta hissəsində indeksləşmə aparılmış və əlavə hesablanmış 17,4 min manat vəsait fevral ayında pensiyaçılara çatdırılmışdır.

5 nəfər Qarabağ, 1 nəfər Çernobıl və 11 nəfər Böyük Vətən müharibəsi əlili, pulsuz avtomaşın almaq üçün növbəyə götürülmüşdür. Bir nəfər Qarabağ əlilinə fərdi ev tikilmişdir. Ağdaş ƏSMM tərəfindən rayon ərazisində yaşayan 209 nəfər tənha, ahıl və kimsəsiz qocaya evlərdə sosial-məişət xidməti göstərilmişdir. 2009-cu ilin I rübü ərzində rayon üzrə sosial müavinətlərin ödənilməsi üçün dövlət büdcəsindən 1 milyon 413 min manat vəsait sərf olunmuşdur ki, bu da əvvəlki ilin eyni dövründəkindən 825 min manat və ya 2,4 dəfə çoxdur.

Rayon rəhbərliyi əhalinin problemlərinin, arzu və istəklərinin yerindəcə həll edilməsi üçün adamlarla canlı görüşlərə üstünlük verir. Bu yaxınlarda Qəşil və Binələr kəndlərində keçirilən belə görüşdə adamların istəklərinin bir çoxu dərhal həyata keçirilmişdir. Şikayətlərin və yuxarı orqanlara müraciətlərin sayı getdikcə azalır.

Rayonda təhsilin səviyyəsinin yüksəldilməsi, onun maddi-texniki bazasının mözhkəmləndirilməsi sahəsində dövlətin qayğı və diqqəti bu ilin əvvəlində daha sürətlə davam etmişdir. Məktəblərə 5 min 500 əyani dərs vəsaiti alınmış və kompyuter texnologiyasının tətbiqinin genişləndirilməsi üçün kimya, biologiya və Azərbaycan tarixi fənlərinin tədrisi ilə əlaqədar 271 kompyuter diski paylanmışdır. Rayon kitabxanalarına 403 nüsxə müxtəlif yeni bədii kitab alınmışdır.

Azərbaycan Respublikası regionlarının 2009 — 2013-cü illərdə sosial-iqtisadi inkişafı Dövlət Proqramı ağdaşlıların da qarşısında mühüm vəzifələr qoymuşdur. Rayon İcra Hakimiyyəti Aparatı, idarə, müəssisə və təşkilatlar, yerli icra nümayəndəlikləri və bələdiyyələr öz fəaliyyətlərini daha səmərəli quraraq proqramda nəzərdə tutulmuş tədbirlərin vaxtında həyata keçirilməsini təmin etməyə çalışırlar.

Ağdaş yurdsevər, halallığa bağlı insanların əzmi, iradəsi sayəsində günbəgün dəyişir, artan imkanlar rifahın daha da yüksəlməsinə xidmət edir. Adamlar bugünkü həyat və güzəranlarından razı qalır, sabaha daha böyük inamla gedirlər.

Ziyəddin SULTANOV,

“Xalq qəzeti”nin bölgə müxbiri

Xalq qəzeti.- 2009.- 20 iyun.- S. 5.